Thursday, February 22, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

រដ្ឋមន្ត្រីក្រសួង​ព័ត៌មាន ស្នើ​រដ្ឋមន្ត្រីក្រសួង​ការបរ​ទេស អន្តរាគមន៍​ទៅ​វិទ្យុ​អាស៊ីសេរី កែសម្រួល​ផ្សាយ​ព័ត៌មាន​មិន​ពិត ជម្លោះ​ដីធ្លី​នៅ​ស្រុក​ស្នួល​

spot_img

​ភ្នំពេញ ​៖ លោក ខៀវ កាញារីទ្ធ រដ្ឋមន្ត្រីក្រសួង​ព័ត៌មាន បាន​ចេញ​លិខិត​មួយ​ច្បាប់​ដោយ​បាន​ស្នើ​ទៅ​លោក​ទេសរដ្ឋមន្ត្រី ប្រាក់ សុខុន រដ្ឋមន្ត្រី​ក្រសួង​ការបរទេស​និង​សហប្រតិបត្តិការ​អន្តរជាតិ សុំ​ជួយ​អន្តរាគមន៍​ទៅ​កាន់​វិទ្យុ​អាស៊ីសេរី (RFA) ធ្វើការ​កែសម្រួល​ការផ្សាយ​ព័ត៌មាន​មិន​ពិត​ស្តីពី​បញ្ហា​ជម្លោះ​ដីធ្លី​នៅ​ខេត្ត​ក្រចេះ តាមរយៈ​ស្ថានទូត​សហរដ្ឋអាមេរិក ប្រចាំ​នៅ​កម្ពុជា​។​

​បើ​តាម​លិខិ​របស់​ក្រសួង​ព័ត៌មាន ៖ ការស្នើសុំ​នេះ យោង​តាម​ការឆ្លើយបំភ្លឺ​របស់​អ្នកស្រី​ទិន សុភ័​ក្រ សាក្សី​កន្លែងកើតហេតុ​ដែល​បាន​សម្ភាសន៍​ជាមួយ​វិទ្យុ​អាស៊ីសេរី កាលពី​ថ្ងៃ​ទី​៨​ខែ​មីនា​ឆ្នាំ​២០១៨​។​

​ក្នុង​លិខិត​ផ្ញើជូន​លោក ប្រាក់ សុខុន នៅ​ថ្ងៃ​ទី​១៦ ខែ​មីនា ឆ្នាំ​២០១៨​នេះ លោក ខៀវ កាញារីទ្ធ បានបញ្ជាក់​ថា ហេតុការណ៍​ហឹង្សា​ទំនាស់​ដីធ្លី​ដែល​បាន​កើតឡើង​នៅ​ស្រុក​ស្នួល ខេត្ត​ក្រចេះ គឺជា​ផែនការ​របស់​វិទ្យុ​អាស៊ីសេរី ដែល​តែងតែ​ឃុបឃិត​ជាមួយ​គណបក្ស​ប្រឆាំង​រៀបចំឡើង​ជា​បន្តបន្ទាប់​បំផុស​ឲ្យ​ប្រជាពលរដ្ឋ​ប្រឆាំងនឹង​រាជរដ្ឋាភិបាល និង​អាជ្ញា​ធរមាន​សមត្ថកិច្ច​បង្ក​ឲ្យមាន​អំពើហឹង្សា​កើតឡើង ដើម្បី​ទម្លាក់​កំហុស និង​ប៉ុនប៉ង​ផ្តួលរំលំ​រាជរដ្ឋាភិបាល​កម្ពុជា​ស្របច្បាប់​។ នេះ​ជា​អំពើ​បំពាន​ច្បាប់ អសីលធម៌ គ្មាន​វិជ្ជាជីវៈ និង​ជា​ចេតនា​ទុច្ចរិត​របស់​អ្នកគ្រប់គ្រង​វិទ្យុ​អាស៊ីសេរី ដែល​តែងតែ​បាន​បង្កើត​បញ្ហា​ជា​បន្តបន្ទាប់​ម្តង​ហើយ​ម្តងទៀត ដោយ​ធ្វើ សកម្មភាព​​ញុះញង់​បង្ក​ឲ្យ​កើតមាន​អំពើហឹងស្សា ការរើសអើង បង្កចលាចល​សង្គម ដែល​អាច​បណ្តាល​ឲ្យ​អន្តរាយ​ដល់​សន្តិសុខ​ជាតិ និង​អរិភាព​ជាមួយ​ប្រទេស​ដទៃ​ផងដែរ​។​

​លោក​បន្តថា ក្រោយ​ហេតុការណ៍​ទំនាស់​ហឹង្សាដីធ្លី​កើតឡើង ក្រុម​អ្នក​យក​ព័ត៌មាន​វិទ្យុ​អាស៊ីសេរី នៅក្នុង​ស្រុក ដែល​មាន​ឈ្មោះ​អេង ជា​ខ្លោង និង​ឈ្មោះ​ជុន ចាន់​បុត្រ ជា​អនុប្រធាន​វិទ្យុ​អាស៊ីសេរី នៅ​សហរដ្ឋអាមេរិក បាន​ប្រាប់​ឲ្យ​អ្នក​ស្រីគិ​ន សុភ័​ក្រ ទទួល​ទូរស័ព្ទ​សម្ភាសន៍​ជាមួយ​វិទ្យុ​អាស៊ីសេរី ហើយ​បាន​បង្គាប់​ឲ្យ​រាយការណ៍​ថា​មាន​ប្រជាពលរដ្ឋ​ចំនួន​៦​នាក់ បាន​ស្លាប់ និង​រងរបួស​ចំនួន​៤០​នាក់ នៅក្នុង​ហេតុការណ៍​ហឹង្សា​ទំនាស់​ដីធ្លី​នៅ​ស្រុក​ស្នួល ខេត្ត​ក្រចេះ កាលពី​ថ្ងៃ​ទី​៨​ខែ​មីនា​ឆ្នាំ​២០១៨​កន្លងមកនេះ​។​

​លោក​រដ្ឋមន្ត្រី ខៀវ កាញារីទ្ធ បាន​ថ្លែងថា វិទ្យុ​អាស៊ីសេរី តែង​ព្យាយាម​ឃុបឃិត​ជាមួយ​គណបក្ស​ប្រឆាំង​ប៉ុនប៉ង​ផ្តួលរំលំ​រាជ​រដ្ឋាភិបាល​នៃ​ព្រះរាជាណាចក្រ​កម្ពុជា​ស្របច្បាប់ ដែល​មិន​អាច​អត់ឱន​បាន និង​ត្រូវ​តែ​កែតម្រូវ​ការផ្សាយ​ព័ត៌មាន​របស់​ខ្លួន​ឲ្យបាន​សុក្រឹត្យ ត្រឹមត្រូវ យុត្តិធម៌ ឈរ​លើ​មូលដ្ឋាន​ការពិត មិន​លំអៀង មាន​តុល្យភាព តាម​ក្រម​សីលធម៌ វិជ្ជាជីវៈ ប្រកបដោយ​ភាពថ្លៃថ្នូរ និង​មាន​ការទទួលខុសត្រូវ​ក្នុងនាម​ជា​សារព័ត៌មាន​ប្រទេស​ជឿនលឿន គោរព​សិទ្ធិមនុស្ស និង​ប្រជាធិបតេយ្យ​។ ដូច្នេះ​សូម​លោក​ទេសរដ្ឋមន្ត្រី រដ្ឋមន្ត្រី​ក្រសួង​ការបរទេស ជួយ​ធ្វើ​អន្តរាគមន៍​ឲ្យ​វិទ្យុ​អាស៊ីសេរី ធ្វើ​ការកែតម្រូវ​ការផ្សាយ​ព័ត៌មាន​អំពី​ទំនាស់​ដីធ្លី​នៅ​ខេត្ត​ក្រចេះ ដោយ​ក្តី​អនុគ្រោះ​៕ ដោយ ៖ បញ្ញា​ស័ក្តិ​

spot_img
×