ក្នុងពេលឆាប់ៗខាងមុខនេះ រោងចក្រផលិតបេតុងកៅស៊ូជាលេីកដំបូង នៅក្នុងប្រទេសកម្ពុជានឹងលេចចេញរូបរាងជាផ្លូវការនៅក្នុងទឹកដីខេត្តកែប ដែលវានឹងបម្រើអត្ថប្រយោជន៍ជាច្រើនដល់ការសាងសង់ផ្លូវប្រភេទបេតុងកៅស៊ូ AC នៅក្នុងប្រទេសកម្ពុជា ដែលកំពុងត្រូវការអភិវឌ្ឍផ្លូវរាប់រយ រាប់ពាន់ខ្សែជាបន្តបន្ទាប់ទៀត។
រោងចក្រផលិតបេតុងកៅស៊ូដំបូងនេះ មានរូបរាងជាបណ្ដើៗហើយ គ្រាន់តែមិនទាន់សម្ពោធជាផ្លូវការតែប៉ុណ្ណោះ ហើយវាមានទីតាំងស្ថិតក្នុងទឹកដី ខេត្តកែប ជាប់ព្រំប្រទល់ខេត្តកំពត វានឹងជួយធ្វើឱ្យដំណើរការសាងសង់ផ្លូវនៅកម្ពុជា ប្រភេទ ផ្លូវAC (ផ្លូវបេតុងខាងក្រោម មានកម្រាស់ក្រាស់អ៊ុតកៅស៊ូពីលើ) កាន់តែមានការអភិវឌ្ឍច្រើនខ្សែ និងការស្ថាបនាមានភាពឆាប់រហ័ស និងមានគុណភាពខ្ពស់ កាត់បន្ថយការចំណាយថវិការដ្ឋច្រេីនក្នុងការទិញ បេតុង កៅស៊ូ មកពីក្រៅប្រទេស ឬក៏ពឹងផ្អែកលើក្រុមហ៊ុនបរទេសទាំងស្រុងពេក។
ការបង្ហាញរោងចក្រផលិតបេតុងកៅស៊ូ សម្រាប់ស្ថាបនាផ្លូវបេតុងកៅស៊ូ AC នេះ ធ្វើឡើងដោយ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងឱកាស ដឹកនាំក្រុមការងារ និងមន្ត្រីជំនាញ ចុះពិនិត្យមើលទីតាំងដាក់ដំឡើងគ្រឿងចក្រផលិតបេតុងកៅស៊ូ នៅក្នុងទឹកដីខេត្តកែប ជាប់ព្រំប្រទល់ខេត្តកំពត នារសៀលថ្ងៃទី០៥ ខែមិថុនា ឆ្នាំ២០២១នេះ ។
រោងចក្រផលិតបេតុងកៅស៊ូនៅក្នុងខេត្តកែបនេះ គឺរឹងរឹតតែបង្កលក្ខណៈងាយស្រួលដល់ការងារយកបេតុងកៅស៊ូទៅសាងសង់ផ្លូវជាតិលេខ ៣១, ៤១ និង ៣៣ ដែលនឹងត្រៀមធ្វេីការជួលជុល កែរប្រែឱ្យទៅជាផ្លូវបេតុងកៅស៊ូ AC ក្នុងពេលឆាប់ៗខាងមុខនេះ។ សម្រាប់រោងចក្រផលិតបេតុងកៅស៊ូនេះដែរ ក្រសួងសាធារណការ ក៏នឹងត្រៀមធ្វើជាកន្លែងស្វ័យ័តមួយ ដើម្បីផលិតបេតុងកៅស៊ូលក់ឱ្យខាងវិស័យឯកជន ដែលត្រូវការផងដែរ៕ ពិសិដ្ឋ CEN
