ជឿជាក់ថា ប្រិយមិត្ត និងមហាជនជាច្រើន នៅក្នុងបណ្តាញសង្គមហ្វេសប៊ុក បានដឹងរឿងរ៉ាវនេះខ្លះរួចហើយ ទាក់ទងនឹងអតីតម្ចាស់ប្រេន CTM ដែលជាតំណាងរបស់ក្រុមហ៊ុន ដាណា ទ្រី មានឈ្មោះ ណើ ចាន់ត្រា ត្រូវបានសមត្ថកិច្ចចាប់ខ្លួន ពាក់ព័ន្ធករណីឆបោក និងរំលោភលើទំនុកចិត្ត ដែលមានទឹកប្រាក់ប្រមាណជិត ៨០ម៉ឺនដុល្លារ រឿងលក់ផលិតផលសម្អាងខ្យល់ ទៅឲ្យតំណាងចែកចាយចំនួន ១២ នាក់ទៀត។
ទោះជាយ៉ាងណា អ្វីដែលគួរឲ្យភ្ញាក់ផ្អើលខ្លាំងនោះ គឺក្រោយរឿងក្តីនេះបានកើតឡើង គេក៏ស្រាប់តែបានឃើញប្តីរបស់ស្ត្រីខាងលើ ដែលមានឈ្មោះថា ម៉េត បាន បានចេញមុខនិយាយមិនខ្លាច ដោយថានេះជាល្បិចកលរៀបអន្ទាក់ធ្វើស៊ីដោយដាក់ចំៗថា អ្នកស្រី ទ្រី ដាណា គឺជាអ្នកដែលស្ថិតនៅពីក្រោយតំណាងទាំង១២នាក់ ដែលនាំឲ្យមានការចាប់ខ្លួនប្រពន្ធរបស់គាត់, ក្នុងនោះ លោក ម៉េត បាន បានបញ្ជាក់តាមរយៈវីដេអូជារឿយៗ និងក៏ដូចសារបង្ហោះនៅលើបណ្តាញសង្គម ដើម្បីឲ្យបងប្អូនមហាជន ជាពិសេសតំណាងៗចែកចាយដទៃទៀត បានដឹងថា «ខ្ញុំធ្វើឡើង ដើម្បីរកយុត្តិធម៌ឱ្យគ្រួសាររបស់ខ្ញុំ ជាពិសេសភារិយារបស់ខ្ញុំ (ណើ ចាន់ត្រា) ដែលត្រូវបានអ្នកស្រី ទ្រី ដាណា និងបក្សពួក ១២នាក់ ទម្លាក់កំហុសទាំងគ្មានភស្តុតាង ហើយត្រូវសមត្ថកិច្ចឃាត់ខ្លួននៅថ្ងៃទី២៧ ខែឆ្នូ ឆ្នាំ២០២០ បច្ចុប្បន្នភរិយារបស់ខ្ញុំកំពុងឃុំខ្លួនបណ្ដោះអាសន្ននៅពន្ធធនាគារព្រៃស។
ប៉ុន្តែ បើទោះជាប្តីរូបនេះ ខំចេញវីដេអូបកស្រាយ និងទម្លាយចេញភស្តុតាងយ៉ាងច្រើន ជុំវិញការការចាប់ខ្លួនប្រពន្ធរបស់គាត់ទាំងអយុត្តិធម៌បែបនេះយ៉ាងណា ក៏គេពុំឃើញមានសារព័ត៌មានណាហាក់ចាប់អារម្មណ៍ ចុះផ្សាយដើម្បីឲ្យរឿងនេះត្រូវបានដឹងឮសុសសាយ ដូចរឿងក្តីដទៃទៀតដែលមិនយូរប៉ុន្មានបានទទួលពន្លឺយុត្តិធម៌នោះទេ។
ពិតណាស់ ព្រោះតែអាណិតកូនស្រី និងជាពិសេស គឺចៅតូចៗទាំងពីរ យំនឹកម្តាយរាល់ថ្ងៃ ខណៈដែលយុត្តិធម៌ហាក់គ្មានពន្លឺសោះសម្រាប់កូនស្រី នៅពេលនេះ ម្តាយរបស់ ណើ ចាន់ត្រា ដែលមានវ័យចាស់ជរាទៅហើយ បានខិតខំស្វះស្វែង និងដាច់ចិត្តដាក់ពាក្យគោរពសុំជំនួយពី សម្តេចតេជោ ហ៊ុន សែន ព្រោះថា គឺមានតែសម្តេចប៉ុណ្ណោះ ដែលអាចជួយរកយុត្តិធម៌ជូនរាស្ត្រស្លូតត្រង់ ដែលត្រូវអ្នកមានអំណាចរំលោភបំពាន។
នេះបើតាម លោក ដួង ដារា ដែលជាជំនួយការផ្ទាល់ សម្តេចតេជោ បានបញ្ជាក់ប្រាប់ជុំវិញរឿងក្តីនេះ តាមរយៈបណ្តាញសង្គមថា អរគុណសន្តិភាព កាលពីពេលថ្មីៗនេះ លោកយាយ រីម វណ្ណារី អាយុ ៦៧ឆ្នាំ បានដាក់ពាក្យគោរពសុំជំនួយអន្តរាគមន៍មកកាន់សម្តេចតេជោនាយករដ្ឋមន្ត្រី ដើម្បីផ្តល់យុត្តិធម៌ដល់កូនស្រីគាត់ ឈ្មោះ ណើ ចាន់ត្រា ដែលកំពុងជាប់ឃុំនៅក្នុងពន្ធធនាគារព្រៃ.សអស់រយៈពេលជាង៤ខែកន្លងមកហើយ។
លោក ដួង ដារា ថ្ងៃនេះខ្ញុំបានជួបប្អូនស្រី ទ្រី ដាណា និងស្វាមី ហើយស្តាប់រឿងរ៉ាវទាំងសងខាងបានយល់មួយចំនួនធំដែលពាក់ព័ន្ធនឹងករណីខាងលើ។ ខ្ញុំនឹងបន្តជួបពិភាក្សាជាមួយប្អូនស្រីថែមទៀត ដើម្បីស្វែង រកដំណោះស្រាយល្អសមរម្យជូនភាគីពាក់ព័ន្ធទាំងអស់ ជាពិសេសរវាងប្អូនស្រី ទ្រី ដាណា និង ប្អូនស្រី ណើ ចាន់ត្រា។
អរគុណបងប្អូនដែលឈឺឆ្អាលបានស្នើសុំខ្ញុំឱ្យជួយពិនិត្យដោះស្រាយរឿងវិវាទនេះ។ ខ្ញុំនឹងជួយពិនិត្យសំណុំរឿងមួយនេះឱ្យបានល្អិតល្អន់បំផុត, ហើយទន្ទឹមនឹងនេះដែរ សូមបងប្អូនកុំចាក់សាំងបន្ថែម។ ពិតណាស់ ខ្ញុំស្វែងរកតែការពិត ត្រឹមត្រូវ ដោយមិនលំអៀង ឬកាន់ជើងទៅលើភាគីណាមួយឡើយ។ ដំណោះស្រាយដែលល្អបំផុតពេលនេះ គឺឈរលើគោលការណ៍ឈ្នះ-ឈ្នះ ដែលជាយុទ្ធសាស្ត្រដ៏ល្អរបស់ សម្តេចតេជោហ៊ុន សែន នាយករដ្ឋមន្ត្រីកម្ពុជា។
យើងចូលរួមកសាងអំពើល្អ ចែករំលែកក្តីស្រឡាញ់ និងស្នាមញញឹម និងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែង ដោយគ្មានការរើសអើង។
ក្រោយពីបានឃើញបែបនេះ មហាជនយ៉ាងច្រើន បានសម្តែងការពេញចិត្តយ៉ាងខ្លាំង ចំពោះ លោក ដួង ដារា ដែលបានជួយអន្តរាគមន៍ចំពោះក្តីនេះ។ ក្នុងនោះ អ្នកប្រើប្រាស់ហ្វេសប៊ុកម្នាក់ ក្នុងចំណោមអ្នកដទៃយ៉ាងច្រើនទៀតដែលបានគាំទ្រ បានមានមតិលើកឡើងថា «ក្នុងនាមជាមនុស្សស្គាល់គ្នា អ្នកខេត្តរួមគ្នាសូមបងប្រុសជួយអន្តរាគមន៍ចំពោះរឿងនេះផង ព្រោះបងស្រី ណេី ចាន់ត្រា ជាកូនអ្នកកសិករ មិនស្គាល់អ្នកមានអំណាចណាដែលអោយគាត់ពឹងពាក់បានទេ , បេីនិយាយតាមការពិតទៅមានអ្នកខ្លះមានទោសរហូតដល់សម្លាប់មនុស្សដោយអចេតនាផង ក៏គេអាចនៅក្រៅឃុំបានដែរ តេីទោសទាន់របស់គាត់កម្រិតណាទៅ ទេីបដាក់គុកបែបនេះ ប្តីគាត់តែងតែបង្ហាញភសុ្តតាងរហូត តែមិនដែលឃេីញព័ត៌មានណាផ្សាយសោះ សង្ឃឹមថា អ្នកមាន និងអ្នកក្រ មានយុត្តិធម៌ដូចគ្នា និងអាណិតដល់ក្មេងៗដែលកំពុងទទ្ទឹងរង់ចាំមេីលផ្លូវម្តាយ ដែលទទួលរងនូវសភាពបែបនេះ៕ រក្សាសិទ្ធិដោយ៖ លឹមហុង
