កំពង់ចាម ៖ ជាការពិតណាស់ ក្មេងៗប្រុសស្រីសម័យឥឡូវ ឬ ហៅថាសម័យជឿនលឿនមួយចំនួន ជាពិសេសកំពុងស្ថិតក្នុងវ័យជំទង់ៗ មិនថានៅទីណានោះទេ គឺឃើញថា បានភ្លេចអស់ហើយការសិក្សារៀនសូត្រ ក្រេបយកចំណេះវិជ្ជា ដោយនាំគ្នាបង្កើតជាក្រុមបងតូចបងធំ មានបក្ខមានពួក បង្កភាពអសន្តិសុខផ្សេងៗនៅក្នុងសង្គម ដោយពុំបានគិតថា ទង្វើទាំងនោះនាំឲ្យបាត់បង់ភាពថ្លៃថ្នូរ កិត្តិយសគ្រួសារ និងក៏ដូចមុខមាត់ប្រទេសនោះឡើយ។
ជាក់ស្តែង ដូចក្រុមក្មេងស្រីនៅតាមស្រុកស្រែទាំងនេះជាគំរូដ៏អក្រក់ ត្រូវបាននគរបាលស្រុកកំពុងសៀម ធ្វើការឃាត់ខ្លួន បន្ទាប់ពីពួកគេបានលើកក្រុមបក្ខពួកទៅវាយលើដៃគូជម្លោះតាមការណាត់ និងបោកផ្តួលក្មេងស្រីម្នាក់ជាគូជម្លោះ បណ្តាលឲ្យដួលបោកក្បាលទៅនឹងថ្នល់សន្លប់ស្តូកស្តឹងភ្លាមៗដ៏គួរឲ្យរន្ធត់ ស្ថិតក្នុងភូមិកំពង់ចារ ស្រុកកំពង់សៀម ខេត្តកំពង់ចាម កាលពីថ្ងៃទី២ ខែមិថុនា ឆ្នាំ២០២១។
យ៉ាងណាមិញ អ្វីដែលគួរឲ្យភ្ញាក់ផ្អើលនោះ ក្រោយពេលចាប់ខ្លួន សមត្ថកិច្ចពុំត្រឹមបង្ហាញមុខទេ គឺថែមទាំងបង្ហាញសាក់ឲ្យមហាជនបានឃើញទៀតផង ដែលក្រុមនារីជឿនលឿនទាំងនោះ ពិតជាក្រុមមិនធម្មតានោះទេ ដោយពួកគេភាគច្រើនសុទ្ធតែចាក់សាក់ពិសេសៗក្នុងនោះដូចជា រូបកាំភ្លើង រូបខ្លា និងរូបយ័ន្តផ្សេងៗចារពេញដៃ ពេញខ្នងតែម្តង។
ក្រោយពីបានឃើញបែបនេះ មហាជនពិតជាមានការហួសចិត្តជាខ្លាំង ដោយបានដាក់បែបៗនេះថា៖ «អាសូរទឹកដោះម្តាយថ្លៃ មិនគួរណាបង្កើតកូនស្រីមក មានចរិកពាលបែបនេះសោះ, មនុស្សស្រីចរិកអ៊ីចឹងៗ ទោះពិភពលោកនេះគ្មានស្រី ក៏ខ្ញុំសុខចិត្តនៅឯកោដែរ ប្រភេទៗនេះលើកឲ្យទទេៗក៏មិនយកដែរ ខ្ពើមណាស់»៕ រក្សាសិទ្ធិដោយ៖ លឹម ហុង
