ភ្នំពេញ÷រថយន្ត ២គ្រឿង បើកបញ្ច្រាសគ្នា ក្នុងល្បឿនលឿនមិនប្រយ័ត្នបានរេចង្កូតទៅបុកចំពីចំហៀងខាងមុខពេញទំហឹង ស្របពេលម៉ូតូជិះមកដល់ជាន់ហ្វ្រាំងមិនជាប់ជ្រុលទៅបុករថយន្តកូរ៉ូឡាចំពាក់កណ្តាលទ្វារពេញទំហឹងនិងរងរបួសម្ចាស់ម៉ូតូធ្ងន់បញ្ជូនទៅមន្ទីរពេទ្យ ចំណែកតៃកុងរថយន្តទាំងសងខាង ត្រូវប្រជាពលរដ្ឋដេញឃាត់ឲ្យនៅកន្លែងកើតហេតុរង់ចាំដោះស្រាយជាមួយជនរងគ្រោះ។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង ៨និង១៥នាទី យប់ថ្ងៃទី ៦ ខែមិថុនាឆ្នាំ ២០២១ ស្ថិតនៅតាមបណ្ដោយផ្លូវជាតិលេខ១ ក្នុងសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។
បើយោងតាមប្រភពព័ត៌មានពីប្រជាពលរដ្ឋនៅកន្លែងកើតហេតុបានប្រាប់ឲ្យដឹងថា នៅមុនពេលកើតហេតុ គេបានឃើញរថយន្តម៉ាកព្រូសមួយគ្រឿង ពណ៌ផ្ទៃមេឃ ពាក់ផ្លាកលេខភ្នំពេញ 2-BK 0849 បើកបរដោយបុរសម្នាក់ធ្វើដំណើរតាមបណ្តោយផ្លូវជាតិលេខ១ រួមនិងម៉ូតូមួយគ្រឿងទៀត ម៉ាកហុងដាទ្រីមសង់សេ១២៥ ស៊េរីឆ្នាំ ២០០៦ ពណ៌ខ្មៅ ពាក់ផ្លាកលេខភ្នំពេញ 1-Q 2270 ជិះដោយបុរសម្នាក់ធ្វើដំណើរស្របគ្នាជាមួយរថយន្តម៉ាកព្រូសទិសដៅពីកើតទៅលិចក្នុងល្បឿនមធ្យម ខណៈមកដល់ចំណុចកើតហេតុខាងលើស្រាប់តែគេឃើញរថយន្តម៉ាកកូរ៉ូឡាមួយគ្រឿងទៀត ពណ៌ស្ករដែលពាក់ផ្លាកលេខ ភ្នំពេញ 2-P 8294 បើកបរដោយបុរសម្នាក់ធ្វើដំណើរបញ្ច្រាសគ្នាក្នុងល្បឿនលឿន ពីលិចទៅកើតបានរេចង្កូតទៅបុកនិងរថយន្តម៉ាកព្រូសពេញទំហឹង បណ្តាលឲ្យម៉ូតូចាប់ហ្វ្រាំងមិនទាន់ជ្រុលទៅបុករថយន្តកូរ៉ូឡាចំពាក់កណ្តាលពេញទំហឹងនិងរបួសម្ចាស់ម៉ូតូធ្ងន់ ចំណែករថយន្តរងការខូចខាតទាំងសងខាង។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ពិនិត្យជុំវិញកន្លែងកើតហេតុ រួចក៏បានទំនាក់ទំនងទៅខាងជំនាញចរាចរណ៍ក្រុងឲ្យចូលមកវាស់វែងយករថយន្តបង្កទាំង ២ គ្រឿង និងម៉ូតូទៅរក្សាទុកនៅខាងការិយាល័យចរាចរណ៍ផ្លូវគោកស្នងការដ្ឋាននគរបាលរាជធានីភ្នំពេញ រង់ចាំដោះស្រាយនៅពេលក្រោយ៕ រក្សាសិទ្ធិដោយ៖ សាមេត
