ភ្នំពេញៈ សម្តេចពិជ័យសេនា ទៀ បាញ់ ឧបនាយរដ្ឋមន្ត្រី រដ្ឋមន្ត្រីក្រសួងការពារជាតិ អនុញ្ញាតឱ្យអនុព័ន្ធយោធាអាមេរិកចប់អាណត្តិ លោកវរសេនីយ៍ឯក ម៉ាកូស ហ្វេរ៉ារ៉ា (Marcus Ferrara) និងលោកវរសេនីយ៍ត្រី អារីស រីប៊ូជីអូ (Aries Rebugio) អនុព័ន្ធយោធាអាមេរិកស្តីទីថ្មី ប្រចាំកម្ពុជា ចូលជួបសម្តែងការគួរសម និងពិភាក្សាការងារមួយចំនួនដើម្បីពង្រឹងកិច្ចសហប្រតិបត្តិការរវាងកងទ័ពនឌប្រទេសទាំងពីរ។
ជំនូបពិភាក្សានេះ បានធ្វើឡើងនៅអគារមិត្តភាពទីស្តីការគណរដ្ឋមន្ត្រី កាលពីរសៀលថ្ងៃទី០៧ ខែមិថុនា ឆ្នាំ២០២១។
នៅក្នុងជំនួបពិភាក្សាប្រមុខការពារជាតិកម្ពុជា និងអនុព័ន្ធយោធាអាមេរិកប្រចាំកម្ពុជា បានរិះរកវិធីធ្វើយ៉ាងណាឲ្យទំនាក់ទំនងកងទ័ពរវាងប្រទេសទាំងពីរដែលមានភាពរកាំរកូសកន្លងមកឲ្យមានភាពល្អប្រសើរឡើងវិញ។
សម្តេចពិជ័យសេនា ទៀ បាញ់ បានមានប្រសាសន៍ប្រាប់ CEN នៅល្ងាចថ្ងៃទី៧ ខែមិថុនា នេះថា នៅក្នុងជំនួបនេះ លោកវរសេនីយ៍ឯក ម៉ាកូស ហ្វេរ៉ារ៉ា អនុព័ន្ធយោធាអាមេរិកចប់អាណត្តិមកជម្រាបលា និងឧទ្ទេសនាមលោកវរសេនីយ៍ត្រី អារីស រីប៊ូជីអូ អនុព័ន្ធយោធាអាមេរិកស្តីទីថ្មី ដែលនឹងជំនួសលោកវរសេនីយ៍ឯក ម៉ាកូស ហ្វេរ៉ារ៉ា។
សម្តេចពិជ័យសេនាបានមានប្រសាសន៍បន្តថា នៅក្នុងជំនួបពិភាក្សាក៏បានរម្លឹកអំពីកិច្ចសហប្រតិបត្តិការកន្លងមករវាងកម្ពុជា និងសហរដ្ឋអាមេរិក ដែលមានភាពលេចអណ្តែតៗ ហើយរួមគ្នារករូបមន្តធ្វើយ៉ាងម៉េចឲ្យបានរុងរឿងឡើងវិញ។
ចំណែកលោកវរសេនីយ៍ឯក ម៉ាកូស ហ្វេរ៉ារ៉ា អនុព័ន្ធយោធាអាមេរិកចប់អាណត្តិសង្ឃឹមថា ទៅថ្ងៃខាងមុខទំនាក់ទំនងរវាកងទ័ពប្រទេសទាំងពីរនឹងអាចត្រឡប់ មកល្អដូចពីពេលមុនវិញ តាមរយៈការបន្តគោរពគ្នាទៅវិញទៅមក ។ ការបន្តអនុវត្តអនុសាសន៍សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជានៅក្នុងការកសាងទំនុកចិត្តគ្នា។៕ រក្សាសិទ្ធិដោយៈ ចេស្តារ
