គួររម្លឹកបន្តិចថា កាលពីព្រឹកថ្ងៃទី៤ ខែមិថុនា ឆ្នាំ២០២១ សមត្ថកិច្ចបានបញ្ជូនស្ត្រីអ្នកអនឡាញម្នាក់ ដែលប្រើប្រាស់ទំព័រហ្វេសប៊ុកឈ្មោះ Madam Chords ទៅតុលាការរាជធានីភ្នំពេញ ដើម្បីសាកសួរពាក់ព័ន្ធនិងករណីឡាយវីដេអូលក់ផលិតផល ដោយមានប្រពាក្យពេចន៍ដ៏អាសអាភាស ហាក់គ្មានតម្លៃសេចក្តីថ្លៃថ្នូរជានារីភេទសោះឡើយ ។
នៅចំពោះមុខតុលាការ ស្រី្តរូបនេះដែលមានឈ្មោះថា សៀន សូលក្ខិណា ហៅ ប៉ុប ភេទស្រីអាយុ ២៣ ឆ្នាំ មានស្រុកកំណើតនៅឃុំបវេល ស្រុកបវេល ខេត្តបាត់ដំបង ស្នាក់នៅផ្ទះជួលលេខ ៧៥សេ ផ្លូវលេខ២ ក្នុងបុរីហុងឡាយ ភូមិត្រពាំងថ្លឹង៣ សង្កាត់ចោមចៅទី៣ ខណ្ឌពោធិ៍សែនជ័យ បានរៀបរាប់ឲ្យដឹងថា ខ្លួនជាម្ចាស់គណនីផេកហ្វេសប៊ុក មាដាមឆដា (Madam Chords) បានឡាយលក់ផលិតផល ថែរក្សាសម្រស់របស់ក្រុមហ៊ុន ម៉ដាមដា តាំងពីអំឡុងឆ្នាំ២០១៨ ជាកម្មសិទ្ធិ របស់បងស្រីខ្លួន ដោយមានប្តីជាជនជាតិថៃ។ អ្នកលក់ឡេអនឡាញដែលតែងតែចូលចិត្តប្រើសម្តីបែបក្តៅសាច់រូបនេះ ក៏បានសារភាពថា ខ្លួនពិតជាបានឡាយ (Live) វីដេអូលក់ផលិតផល និងបាននិយាយលេងសើចជាមួយភ្ញៀវ ដោយប្រើពាក្យអាសអាភាសដ៏មិនសមរម្យទាំងនោះ ពិតប្រាកដមែន។
ដោយឡែក ក្រោយពេលដឹងថា ប្អូនស្រីរបស់ខ្លួនត្រូវបានចាប់ខ្លួន និងឃុំខ្លួននៅពន្ធនាគាររួចហើយ ស្រាប់តែអ្នកនាង ម៉ាដាម ដា អ្នកលក់អនឡាញដ៏ល្បីម្នាក់ និងជាត្រូវជាបងស្រី បានចេញមុខមកទម្លាយអារម្មណ៍មួយនេះយ៉ាងដូច្នេះថា៖ «ប្អូនស្រីសំលាញ់ចិត្ត អូនជាក្មេងល្អ អូនដូចបងចឹងយើងជាមនុស្សតែមួយ អូនសុខបងក៏សុខ អូនទុក្ខបងក៏ទុក្ខ អូនជាអ្វីៗរបស់បង ជាប្អូនជាមិត្ត ជាកូនស្រី ជាដៃគូរកស៊ី ជាដៃគូឈ្លោះ យើងដើរជាមួយគ្នាគ្រប់កាលៈទេសេៈ ចាំថាបើពេលនេះអូនមានអារម្មណ៏បែបណាបងក៏បែបហ្នឹង បើអូននៅកន្លែងនោះឯកោ បាក់ទឹកចិត្ត សុំមើលដៃជើងអូន អូននឹងដឹងថាបងនៅជាមួយអូនគ្រប់ពេល មិនបោះបង់អូនឡើយ ដឹងទេមានអ្នកស្រលាញ់អូនច្រើនណាស់រងចាំអូន អត់ធ្មត់ណាអូន បងជឿថាលោកពូអ្នកមីង នឹងមានចិត្តមេត្តាអោយអូនបានចេញមកឆាប់ៗណាឆ្កែតូច»។
ទាក់ទងនឹងប្អូនស្រីខ្លួនឈានដល់ត្រូវបានចោទប្រកាន់ អ្នកនាង ម៉ាដាម ដា ក៏បានលើកហេតុផលមួយនេះមកបញ្ជាក់ និងសម្តែងការសោកស្តាយតាមរយៈ comment ថា៖ «គាត់គ្មានមានចេតនាទេបង ពេលហ្នឹងគាត់ឡាយយប់ជ្រៅ មនុស្សមើលសល់ប្រហែល 200 នាក់ ហើយពួកម៉ាកគាត់មកសួរគាត់លេងលក្ខណះសួរបញ្ចួសពួកម៉ាក ហើយគាត់ក៏ឆ្លើយលេងបញ្ចួសពួកម៉ាកវិញ មានគេលួចកាត់ឃ្លីបខ្លីបុ៉ន្នឹងទៅផុស អោយខ្ញុំសុំទោសជំនួសគាត់ផង»។ រីឯអ្នកខ្លះទៀតថា បើ Ah Gi វិញនិយាយអាសអាភាសលើសហ្នឹង១០០ ដង និងសូម្បីធ្វើរឿងដែលមហាជនថ្កោលទោសពេញមួយនគរទៀត តែបានត្រឹមហៅមកធ្វើការអប់រំប៉ុណ្ណោះ ហើយស្ងាត់ឈឹង ព្រោះតែ Ah Gi មានខ្សែមានខ្នងធំ។
តែទោះយ៉ាងណា នេះចាត់ទុកជាមេរៀន និងគំរូដ៏អាក្រក់មួយ ដើម្បីព្រមានទៅដល់មនុស្សដទៃទៀត កុំឲ្យចេះតែហ៊ាន កុំឲ្យចេះផ្គើន ធ្វើអ្វីប្រាសចាកតម្លៃសេចក្តីថ្លៃថ្នូរក្នុងសង្គម ដោយគិតថាគេមិនអាចធ្វើអ្វីខ្លួនបានឲ្យសោះនោះ៕ រក្សាសិទ្ធិដោយ៖ លឹម ហុង
