ភ្នំពេញ ៖ ជនដៃដល់ដែលអារកសម្លាប់យុវជនម្នាក់នៅជិតគល់ឈើក្នុងសង្កាត់ត្រពាំងក្រសាំងខណ្ឌពោធិសែនជ័យកាលពីកន្លងមកមនេះត្រូវកម្លាំងនគរបាលអន្តរាគមន៍ខណ្ឌពោធិសែនជ័យតាមចាប់ខ្លួនបានហើយកាលពីថ្ងៃត្រង់ថ្ងៃទី១៦ ខែមីនា ឆ្នាំ២០១៨នៅក្នុងភូមិជម្ពូវ័ន សង្កាត់ចោមចៅ៣ ខណ្ឌពោធិសែនជ័យ ។ ជនដៃដល់ឈ្មោះ អាន សុភាព ភេទប្រុស អាយុ២៥ឆ្នាំ មុខរបរកាប់ជ្រូក មានទីលំនៅភូមិជម្ពូវ័ន សង្កាត់ចោមចៅ៣ ខណ្ឌពោធិសែនជ័យ ។
ចំណែកជនរងគ្រោះដែលគេអារកសម្លាប់នោះ ឈ្មោះ ឯម សុជាតិ ហៅវិត អាយុ២៣ឆ្នាំ មុខរបរ មិនពិតប្រាកដ ស្នាក់នៅភូមិអូដឹម សង្កាត់ចោមចៅ៣ មានស្រុកកំណើត ភូមិព្រៃរំដួល ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ។ សាកសពត្រូវបានប្រជាពលរដ្ឋប្រទះ ឃើញកាលម៉ោង៦ព្រឹក ថ្ងៃទី១៥ ខែមីនា ឆ្នាំ២០១៨ នៅលើដីវាល ខាងក្រោយរោងចក្របឺរី ភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ សមត្ថកិច្ចធ្វើការស្រាវជ្រាវជាបន្ទាន់ ។ សមត្ថកិច្ចខណ្ឌពោធិ៍សែនជ័យបានឱ្យដឹងថា៖ក្រោយឃាត់ខ្លួនជនសង្ស័យទៅយកកាំបិតដែលអារ កជនរងគ្រោះនៅក្នុងប្រឡាយទឹកមួយតាមបណ្ដោយផ្លូវជាតិលេខ៤ក្នុងខណ្ឌពោធិ៍សែនជ័យ។
ក្រោយសមត្ថកិច្ចចាប់ខ្លួនបានជនសង្ស័យក៏បានសារភាពថា៖គេពិតជាអ្នកអារកសម្លាប់យុវជនខាងលើពិតប្រាកដមែនដោយសារតែយុវជននោះយកអតីតប្រពន្ធរបស់ខ្លួនដែលបានលែងលះគ្នាហើយ ។ ពេលបានដេកនៅជាមួយគ្នាម្ដងៗតែងតែទូស័ព្ទមកឌឺដងឱ្យរូបគេធ្វើឱ្យគេខឹងទ្រាំមិនបាន។ ជនដៃដល់បានប្រាប់ទៀតថា៖នារីជាអតីតប្រពន្ធចាស់នោះ ឈ្មោះ ធៀម ធារី អាយុ២៣ឆ្នាំ មុខរបរគ្មាន ស្នាក់នៅផ្ទះជួលភូមិជន្ពូវ័ន សង្កាត់ចោមចៅ៣ មានស្រុកកំណើតនៅខេត្តតាកែវ ។
ជនដៃដល់បានរៀបរាប់ទៀតថា៖មុនពេលកើតហេតុ រូបគេបានបែកបាក់ ជាមួយនារីម្នាក់ជាអតីតប្រពន្ធជាង១ឆ្នាំហើយ ។ ក្រោយមកនារីជាអតីតប្រពន្ធក៏មានទំនាក់ទំនងជាមួយយុវជនរងគ្រោះឯម សុជាតិ ហៅវិត វិញម្តងដោយបានរស់នៅជាមួយគ្នា ច្រើនខែមកហើយដូចប្តីប្រពន្ធ ហើយនារីរូបនោះទៀតសោតក៏បានឈប់ទំនាក់ទំនងជាមួយគ្នាយូរហើយ ។
ជនដៃដល់បានសារភាពទៀតថា៖ប៉ុន្តែនៅម៉ោង១៖៤៥រំលងអធ្រាត្រចូលថ្ងៃទី១៥ ខែមីនា ឆ្នាំ២០១៨ ជនរងគ្រោះបានណាត់ខ្លួនឲ្យមកជួបគ្នានៅដីវាលខាងក្រោយរោងចក្របឺរី ជាកន្លែងកើតហេតុដែលគេចាក់នោះលុះទៅជួបតាមការណាត់ហើយ ជនរងគ្រោះមានទាំងកាន់កូនកាំបិតចុងស្រួចមួយផង ហើយបានជជែកគ្នារឿងអតីតប្រពន្ធ។ ភ្លាមនោះក៏ឆក់ដកយកកូនសោម៉ូតូរបស់ខ្លួនទៀត ហើយបានទូរស័ព្ទទៅជេរស្តីឲ្យនាងជាអតីតប្រពន្ធ រឿងប្រុសស្នេហ៍បាននៅដេកឱបជាមួយរហូត ចំណែកខ្លួនអត់លិឍ។ ជនដៃដល់បានបន្តថា៖ដោយឃើញជនរងគ្រោះឈរនិយាយទូរស័ព្ទភ្លេចខ្លួនរូបគេក៏ដើរទៅពីក្រោយ ឆក់យកបានកូនកាំបិត ចាក់លើជនរងគ្រោះត្រូវចំស្មាដួលហើយចាប់អាករបន្ថែមរហូតស្លាប់ភ្លាមៗ រួចហើយខ្លួនគេបានជិះម៉ូតូយកកូនកាំបិតទៅបោះបោលក្នុងលូទឹកស្អុយមុខវិទ្យាល័យជម្ពូវ័ន ហើយបានទៅសម្ងំដេកនៅផ្ទះវិញ បន្ទាប់មកសមត្ថកិច្ចធ្វើការស្រាវជ្រាវជាបន្ទាន់ក៏បានមកចាប់ខ្លួនរូបគេបានតែម្ដងទៅ ។នៅថ្ងៃទី១៧មីនានេះសមត្ថកិច្ចបានបញ្ជូនខ្លួនជនដៃដល់ទៅតុលាករដើម្បីចាត់ការតាមផ្លូវច្បាប់៕ ដោយ៖បញ្ញាស័ក្តិ
