Google នឹងធ្វើការកែទម្រង់របៀបគ្រប់គ្រង ផ្សព្វផ្សាយពាណិជ្ជកម្ម បន្ទាប់ពីរងការផាកពិន័យ ចំនួនប្រមាណ ២៦៨លាន

ភ្នំពេញ ៖ ក្រុមហ៊ុន Google បានព្រមព្រៀងជាមួយរដ្ឋាភិបាលបារាំង បន្ទាប់ពីត្រូវបានរងការចោទប្រកាន់ថា បានប្រើសក្ដានុពលរបស់ខ្លួនដើម្បីគាបសង្កត់ក្រុមហ៊ុនតូចៗទាក់ទងទៅនឹងការផ្សព្វផ្សាយពាណិជ្ជកម្ម។ នេះបើតាមការផ្សាយ របស់នាយកដ្ឋានប្រឆាំងបទល្មើសបច្ចេកវិទ្យា នៅថ្ងៃទី៨ ខែមិថុនា ឆ្នាំ២០២១។

ការឯកភាពនេះគឺដើម្បីបញ្ចប់នូវការស៊ើបអង្កេត ហើយក្រុមហ៊ុន Google បានយល់ព្រមបង់ប្រាក់ពិន័យចំនួន ២៦៨លាន ដុល្លារសហរដ្ឋអាមេរិក និងបានសន្យាថានឹងធ្វើកំណែទម្រង់របៀបគ្រប់គ្រងផ្សព្វផ្សាយពាណិជ្ជកម្ម ចាប់ផ្ដើមពីត្រីមាសទីមួយឆ្នាំ២០២២ ដោយមានការឃ្លាំមើលពីក្រុមអ្នកគ្រប់គ្រងដាច់ដោយឡែកមួយផ្សេងទៀត។ នេះគឺជាលើកទីមួយហើយដែលក្រុមហ៊ុនបច្ចេកវិទ្យា ដ៏ធំមួយនេះបានទទួលស្គាល់ទាក់ទងទៅនឹងភាពលំអៀង នៅក្នុងរូបមន្តបច្ចេកវិទ្យាក្នុងការផ្សព្វផ្សាយពាណិជ្ជកម្ម។

ទោះបីជាកិច្ចព្រមព្រៀងនេះគឺសម្រាប់តែប្រទេសបារាំងតែមួយ ហើយការផាកពិន័យ គឺវាមានចំនួនទឹកលុយតិចតួចសម្រាប់ក្រុមហ៊ុន Google នោះក្ដី ក៏ប៉ុន្តែអ្នកវិភាគគិតថានេះគឺគ្រាន់តែជាជំហានដំបូង ហើយពួកគេសង្ឃឹមថាប្រទេសជាច្រើនទៀតនៅអឺរ៉ុប និងសហរដ្ឋអាមេរិក នឹងបើកការស៊ើបអង្កេតទាក់ទងទៅនឹងករណីនេះផងដែរ៕រក្សាសិទ្ធិដោយ៖បញ្ញាស័ក្តិ