កំពត ៖ នគរបាលស្រុកទឹកឈូ បានចាប់ខ្លួនបុរសម្នាក់ ដែលលួងលោមធ្វើសកម្មភាពចាប់រំលោភលើនារីម្នាក់ បានសម្រេចពីរដង ហើយធ្វើឲ្យនារីនោះសន្លប់នៅលើអង្រឹង កាលពីយប់ថ្ងៃទី១៦ ខែមីនា ឆ្នាំ២០១៨ នៅចំណុចបរិវេណវត្តព្រៃទប់ ភូមិមាត់ពាម ឃុំម៉ាក់ប្រាង្គ ស្រុកទឹកឈូ ខេត្តកំពត។ ការចាប់ខ្លួនបុរសសង្ស័យរូបយោងតាមពាក្យប្តឹងរបស់ឪពុកម្តាយក្មេងស្រីរងគ្រោះ។
នគរបាលមូលដ្ឋាន បានបញ្ជាក់ថា ជនសង្ស័យឈ្មោះ ឌឿង ឡា អាយុ១៧ឆ្នាំ ជាកម្មករដាក់កន្ត្រកវិល មានទីលំនៅនៅភូមិបាក់ត្រាង ស្រុកព្រៃនប់ ខេត្តព្រះសីហនុ ចំណែកក្មេងស្រីរងគ្រោះឈ្មោះ អ.ស.អ អាយុ១៥ឆ្នាំ រស់នៅភូមិកើតហេតុ។
នគរបាលបានបញ្ជាក់អំពីរឿងហេតុនេះថា ពួកគេទាំងពីរនាក់ បានស្គាល់គ្នាតាមរយៈការលេងហ្វេសប៊ុក និងឈានដល់មានទំនាក់ទំនងកាន់តែស៊ីជម្រៅ ហើយដល់ថ្ងៃទី១៤ ខែមីនា នៅវត្តព្រៃទប់ មានរៀបចំកម្មវិធីបុណ្យបញ្ចុះសីមា រយៈពេលបីថ្ងៃ ហើយនៅយប់ថ្ងៃទី១៤ ខែមីនានោះ ជនសង្ស័យបានយកកន្ត្រកវិលមកដាក់នៅវត្តនៅដើម្បីឲ្យបងប្អូនប្រជាពលរដ្ឋជួលជិះលេងកម្សាន្ត គាប់ជួនផ្ទះក្មេងស្រីរងគ្រោះក៏នៅក្បែរវត្តនោះដែរ ហើយពួកគេទាំងពីរនាក់ក៏បានណាត់មកជួបគ្នាដោយផ្ទាល់ដើម្បីបានសារសងស្នេហ៍ក្មេងខ្ចីនេះ។
រហូតដល់ថ្ងៃទី១៥ ខែមីនា ពួកគេទាំងពីរបានលង់ស្នេហ៍ទៅវិញទៅមក រហូតដល់ទប់ចិត្តមិនបាន ភាគីខាងប្រុសក៏ចាប់ក្មេងស្រីរងគ្រោះរំលោភរហូតបានសម្រេចពីរដងក្នុងមួយរាត្រី ធ្វើឲ្យក្មេងស្រីរូបនេះសន្លប់បាត់មាត់ឈឹងដេកក្នុងអង្រឹងកន្លែងកន្ត្រកវិល។ ប៉ុន្តែដោយសារយប់កាន់តែជ្រៅ និងកម្មវិធីបុណ្យបានបញ្ចប់ ជាពិសេស ធុងបាស់ក៏បានបិទ ឧបករណ៍ល្បែងកម្សាន្តជាច្រើន ក៏បានសារោងផងដែរ ឪពុកម្តាយ បានបាត់កូនស្រី មិនឃើញវិលត្រឡប់មកផ្ទះវិញ ក៏នាំគ្នាដើររក ក៏បានប្រទះឃើញកូនស្រី ដេកសន្លប់នៅក្នុងអង្រឹងកន្លែងកន្ត្រកវិល ហើយយកកូនស្រីទៅព្យាបាលនៅមន្ទីរពេទ្យខេត្ត។
ឪពុកម្តាយក្មេងស្រីរងគ្រោះ បានដាក់ពាក្យប្តឹងនៅប៉ុស្តិ៍នគរបាលមូលដ្ឋាន ទើបឈានដល់ការចាប់ខ្លួនជនសង្ស័យមកសាកសួរ។ ក្នុងដំណាក់កាលសមត្ថកិច្ចនគរបាលមូលដ្ឋាន ជនសង្ស័យបានសារភាពថា ពិតជាចាប់រំលោភក្មេងស្រីរងគ្រោះពិតមែន ប៉ុន្តែគឺជាការព្រមព្រៀងគ្នាទេ ព្រោះពួកយើងបានស្រឡាញ់គ្នានិងបានសារសងស្នេហាតាមបណ្តាញសង្គមហ្វេសប៊ុក ហើយក៏ណាត់មកជួបគ្នា ទើបឈានដល់ការរួមរ័ករហូតបានសម្រេចចំនួនពីរដង៕ ដោយ ៖ បញ្ញាស័ក្តិ
