បន្ទាយមានជ័យ ៖ ករណីម៉ូតូកង់២បុកម៉ូតូកង់៣ របួសធ្ងន់២នាក់ មកទល់ថ្ងៃទី១៨ ខែមីនានេះ សមត្ថកិច្ចថា រកអ្នកណាសងអ្នកណាមិនទាន់បានទេ ព្រោះខាងម៉ូតូកង់៣បន្ទោសថា ម៉ូតូកង់២បើកលឿនមិនប្រយ័ត្ន។ ឯខាងម៉ូតូកង់២ ថា ម៉ូតូកង់បីបត់មិនមើលឆ្វេងស្តាំ មិនមើលឧបសគ្គ ។
សូមរំលឹកថា ហេតុការណ៍នោះបានកើតឡើងកាលពីម៉ោង៧និង៣៥នាទីព្រឹក ថ្ងៃទី១៧ ខែមីនា ឆ្នាំ២០១៨ នៅលើកំណាត់ផ្លូវជាតិលេខ៥ ជិតខ្លោងទ្វារចូលវត្តភ្នំជញ្ជាំងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
លោកវរសេនីយ៍ សន គឹមសួគ៌ នាយការិយាល័យនគរបាលចរាចរណ៍ផ្លូវគោកនៃស្នងការដ្ឋានខេត្តបន្ទាយមានជ័យបានឲ្យដឹងថា៖ ជនរងគ្រោះឈ្មោះគីន សុនេត ភេទប្រុសអាយុ១៧ឆ្នាំ ជាអ្នកបើកបរម៉ូតូកង២ និងអ្នករួមដំណើរម្នាក់ទៀតឈ្មោះសេង លីហាក់ ភេទប្រុសអាយុ១៧ឆ្នាំ ។ ទាំង២នាក់ នៅភូមិសែសិន សង្កាត់អូរអំបិល ក្រុងសិរីសោភ័ណ ។ ចំណែកអ្នកបើកបរម៉ូតូកង់បី មានឈ្មោះប្រាក់ ប៊ុនអឿន ភេទប្រុសអាយុ២៨ឆ្នាំ នៅភូមិតាទុង សង្កាត់ព្រះពន្លា ក្រុងសិរីសោភ័ណ ។
មុនពេលកើតហេតុម៉ូតូកង់បីបានធ្វើដំណើរក្នុងទិសដៅពីលិច ។ មកកើតពេលមកដល់ចំណុចកើតហេតុម៉ូតូមានឌុបគ្នា២នាក់ បានបើកពីក្រោយក្នុងល្បឿនលឿន ក៏បុកពេញទំហឹងលើម៉ូតូកង់បីដែលបានបត់ឆ្វេងដៃ បណ្តាលអោយអ្នកបើកម៉ូតូឌុបគ្នា២នាក់ រងរបួសធ្ងន់គឺបាក់ដៃនិងជើងទាំង២នាក់ ។ អ្នកបើកម៉ូតូកង់បីរងរបួសស្រាលដែរ។
សមត្ថកិច្ចនិយាយថា ឈ្មោះគីន សុនេត ភេទប្រុសអាយុ១៧ឆ្នាំ និង សេង លីហាក់ ភេទប្រុសអាយុ ១៧ ឆ្នាំ រងការចោទរិះគន់ថា បានបង្ហោះម៉ូតូ ដេញកាប់គ្នាហើយ សមត្ថកិច្ចតាមដេញចាប់ពីមុនមកដែរ ។
ករណីនេះ ភាគីខាងម៉ូតូកង់២ដែលចង់ទារសំណងពីអ្នកខាងម៉ូតូកង់៣នោះ ត្រូវអ្នកខាងម៉ូតូកង់៣ ទារសំណងវិញ។ ពោលគឺពេលណាជាស្បើយពីរបួសនឹងទារលុយហើយ ៕ ដោយ ៖ បន្ទាយ