នាយឧត្តមសេនីយ៍ សៅ សុខា អំពាវនាវឲ្យអ្នកពាក់ព័ន្ធផ្សំគំនិត លួចកាប់ឈើនៅតំបន់អូរហ៊ុច ចេញមកសារភាពប្រគល់ខ្លួនឲ្យសមត្ថកិច្ច

ភ្នំពេញ ៖ នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានអំពាវនាវដល់អ្នកដែលពាក់ព័ន្ធផ្សំគំនិតកាប់ឈើនៅក្នុងតំបន់អូរហ៊ុច ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ចេញមកសារភាពប្រគល់ខ្លួនឲ្យអាជ្ញាធរមានសមត្ថកិច្ច។

ជាមួយនឹងការអំពាវនាវ នាយឧត្តមសេនីយ៍ សៅ សុខា ក៏បានបញ្ជាឲ្យសមត្ថកិច្ចពាក់ព័ន្ធ ធ្វើការស្រាវជ្រាវរកអ្នកដែលនៅពីក្រោយខ្នង នៃការប្រព្រឹត្តបទល្មើស និងស្រាវជ្រាវជនជាតិវៀតណាម ដែលជាមេក្លោងផ្តល់ថវិកា និងបានឃុបឃិតជាមួយមន្ត្រីការពារព្រំដែនខ្មែរ ចូលមកកាប់ឈើនៅក្នុងតំបន់អូរហ៊ុច ដឹកជញ្ជូនយកទៅប្រទេសវៀតណាម។

នាយឧត្តមសេនីយ៍ សៅ សុខា បានមានប្រសាសន៍ប្រាប់ CEN ថា “អ្នកណាដែលមានខ្លួនហើយ គឺចេញមកសារភាពប្រគល់ខ្លួនឲ្យអាជ្ញាធរមានសមត្ថកិច្ច ហើយកុំចចេសរឹងរូស រួមទាំងអ្នកដែលផ្សំគំនិត អ្នកប្រព្រឹត្តផ្ទាល់ គឺត្រូវតែគោរពច្បាប់ គោរពបទបញ្ជា ការពារធនធានធម្មជាតិ ព្រោះធនធានរបស់យើងសំបូរ ប៉ុន្តែមកដល់ពេលនេះ នៅតែមានអ្នកបំផ្លិចបំផ្លាញធនធានរបស់យើងមិនអាចគង់វង្សបានយូរអង្វែងទេ។ ខ្ញុំសូមអំពាវនាវទី១. គឺអ្នកណាដែលដឹងថាខ្លួនឯងខុសហើយប្រញាប់ចេញមកសារភាព។ ទី២. វិធានការរបស់សមត្ថកិច្ចរបស់គណៈកម្មការជាតិ ឲ្យស្វែងយល់អំពីតួនាទីភារកិច្ចរបស់កងកម្លាំងទាំងអស់ ព្រោះអ្នកដែលប្រព្រឹត្តបទល្មើស មិនមែនកងកម្លាំងប្រដាប់អាវុធទាំងអស់ធ្វើចឹងទេ គឺមានមនុស្សជាបុគ្គល សូមឲ្យបណ្តាអង្គភាពបង្កើនការយកចិត្តទុកដាក់ អប់រំបុគ្គលិកនៅក្រោមឱវាទរបស់ខ្លួនឲ្យក្តាប់ជាប់តួនាទី ភារកិច្ចរបស់ខ្លួន ហើយគោរពឲ្យបានត្រឹមត្រូវក្នុងការការពារផលប្រយោជន៍ជាតិជាធំ កុំឲ្យនាំគ្នាទៅការពារផលប្រយោជន៍ជាតិហើយ បែរជាគិតផលប្រយោជន៍បុគ្គល ហើយទៅប្រព្រឹត្តបទល្មើស…”។

ប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានបន្តថា ចំពោះរាជរដ្ឋាភិបាល កំពុងតែយកចិត្តទុកដាក់ ក្នុងការការពារបូរភាពភាព អធិបតេយ្យ ការពារផលប្រយោជន៍ជាតិ ហើយមានមន្ត្រីរបស់យើងទៅប្រព្រឹត្តបទល្មើសខុសច្បាប់បែបនេះ នោះគឺជាការហុចដងទៅឲ្យពួកប្រឆាំង មានឱកាសដើម្បីវាយប្រហាររាជរដ្ឋាភិបាល ហើយអាចចាត់ទុកថា ជាខ្មាំងបង្កប់ក៏ថាបានបង្កើតទង្វើបំផ្លាញជាតិ ដើម្បីទុកឲ្យអ្នកដែលកំពុងតែរកលេស បំផ្លិចបំផ្លាញសន្តិភាពគេមានលេសដើម្បីនឹងគេនិយាយ។

ក្រុមការងារគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ រួមមានថ្នាក់ជាតិ និងថ្នាក់ក្រោមជាតិ បានចាប់ខ្លួនមេបញ្ជាការ មេបញ្ជាការរងកងអនុសេនាធំការពារព្រំដែនលេខ២ មេបញ្ជាការកងអនុសេនាតូចការពារព្រំដែនលេខ២ មេបញ្ជាការរង កងអនុសេនាធំទី២ យោធាការពារព្រំដែន រួមទាំងមេប៉ុស្តិ៍នគរបាលការពារព្រំដែន អូរហ៊ុច និងមន្ត្រីមួយចំនួន ពាក់ព័ន្ធករណីសមគំនិត ឃុបឃិតគ្នាជាមួយជនជាតិវៀតណាមបើកផ្លូវឲ្យចូលមកកាប់ឈើក្នុងតំបន់អូរហ៊ុចដើម្បីដឹកជញ្ជូនយកទៅប្រទេសវៀតណាម និងបទល្មើសព្រៃឈើនៅតាមបន្ទាត់ព្រំដែន(អូរហ៊ុច)ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី។

នាយឧត្តមសេនីយ៍ សៅ សុខា បានមានប្រសាសន៍បញ្ជាក់ថា ខាងជំនាញកំពុងតែធ្វើការស្រាវជ្រាវជាបន្តទៀត រកអ្នកដែលនៅពីក្រោយខ្នង នៃការប្រព្រឹត្តបទល្មើស និងស្រាវជ្រាវជនបរទេសដែលជាមេក្លោង ផ្តល់ថវិកាឲ្យ និងជនបរទេសដែលបានឃុបឃិតជាមួយឃនជាតិខ្មែរ ហ៊ានយកគ្រឿងចក្រ ហ៊ានមកកាប់ឈើនៅក្នុងស្រុកខ្មែរ ហើយលោកនឹងធ្វើកិច្ចការងារនេះ ជាមួយភាគីប្រទេសជិតខាងអំពីបញ្ហាការការពារព្រំដែន ការទប់ស្កាត់ជាមួយបទល្មើស។

បើយោងតាមរបាយការណ៍របស់គណៈកម្មការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិ បានឲ្យដឹងថា ជនសង្ស័យដែលចាប់ខ្លួនមានដូចជាៈ
១.ឈ្មោះ អ៊ុក ណាខៃ មេបញ្ជាការកងអនុសេនាធំការពារព្រំដែនលេខ២,
២.ឈ្មោះ ឡឹក ញែក មេបញ្ជាការរង កងអនុសេនាធំការពារព្រំដែនលេខ២ ទទួលទិសអូរហ៊ុច,
៣.ឈ្មោះ វ៉ាន់ ចន្ធារី មេបញ្ជាការកងអនុសេនាតូចការពារព្រំដែនលេខ២ ឈរជើងនៅអូហ៊ុច
៤. ឈ្មោះ លាង ភារ័ត្ន មេប៉ុស្តិ៍នគរបាលការពារព្រំដែន អូរហ៊ុច
៥.ឈ្មោះ ព្រំ វណ្ណៈ នាយរងប៉ុស្តិ៍អូរហ៊ុច នគរបាលការពារព្រំដែន
៦.ឈ្មោះ ផាត សុខឡេង នាយរងប៉ុស្តិ៍អូរហ៊ុច នគរបាលការពារព្រំដែន
៧.ឈ្មោះ អ៊ាង ចាន់ឌី មេបញ្ជាការរង កងអនុសេនាធំទី២ យោធាការពារព្រំដែន។
៨.ឈ្មោះ ផន សុផល
៩.ឈ្មោះ ដួង ចាន់វីរៈ

ទាក់ទងករណីនេះ នៅថ្ងៃទី២៦ ខែមិថុនា ឆ្នាំ២០២១ នេះ តំណាងអយ្យការអមសាលាដំបូងខេត្តមណ្ឌលគិរី បានសម្រេចចោទប្រកាន់ជនសង្ស័យដែលឃុបឃិតគ្នាបង្កើតបទល្មើសព្រៃឈើនៅតំបន់អូរហ៊ុចស្ថិ តក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគីរី ដូចតទៅៈ ជនជាតិវៀតណាមចំនួន ២នាក់ គឺទី១. ឈ្មោះ ប៉ិក (គេចខ្លួន) និងទី២. ឈ្មោះ ជី (គេចខ្លួន) និងបក្ខពួកចោទពីបទកាប់ប្រមូលដឹកជញ្ជូនធនធានម្មជាតិ នាំចេញផល អនុផលព្រៃឈើដែលគ្មានអាជ្ញាប័ណ្ណ ចូលមកក្នុងព្រះរាជាណាចក្រកម្ពុជាដោយលបលាក់ ។

ចំណែកក្នុងនោះអយ្យការបន្តសម្រេចចោទប្រកាន់ឈ្មោះ ១ . ឈ្មោះ អ៊ុក ណាខៃ ២. ឈ្មោះឡឹក ញែក ៣. ឈ្មោះ វ៉ាន់ ចន្ធារី ៤. ឈ្មោះ លាង ភារ័ត្ន ៥. ឈ្មោះ ព្រំ វណ្ណះ ៦. ឈ្មោះ ផាត់ សុខឡេង ៧. ឈ្មោះ អ៊ាង ចាន់ឌី ៨. ឈ្មោះ ផន សុផល ៩. ឈ្មោះ ដួង ចាន់វីរ: ពីបទរួមគំនិតក្នុងអំពើនាំចេញផលអនុផលព្រៃឈើដែលគ្មានអាជ្ញាប័ណ្ណ ធ្វើសកម្មភាពទាំងឡាយណាដើម្បីធ្វើអន្តរាគមន៍ផ្តល់ការអនុញ្ញាតដោយផ្ទាល់ និងដោយប្រយោល ជួយដល់អាជីវកម្មព្រៃឈើ ជួយសម្រួលក្នុងការចូលមក ក្នុងព្រះរាជាណាចក្រកម្ពុជា ដោយលបលាក់។ ជនសង្ស័យទាំង៩នាក់ ត្រូវបានតំណាងអយ្យការស្នើសុំឃុំខ្លួន។ ១០. ឈ្មោះ ម៉ែន ធឹម អ្នកបើកបររថយន្ត របស់បញ្ជាការវិស្វកម្ម មិនចូលខ្លួនមកបំភ្លឺ ហើយក៏ត្រូវចោទប្រកាន់ពីបទ៖ ចាត់វិធានការសំដៅ រារាំងការអនុវត្តច្បាប់៕ រក្សាសិទ្ធិដោយៈ ចេស្តារ