ភ្នំពេញ៖ អ្នកធុរកិច្ចជឿជាក់ថា ច្បាប់វិនិយោគថ្មីនេះ និងទាក់ទាញវិនិយោគបន្ថែមទៀតឱ្យចូលមកបណ្តាក់ទុនកាន់តែច្រើននៅកម្ពុជា។ អ្នកវិនិយោគ ចាត់ទុកសេចក្តីព្រាងច្បាប់វិនិយោគថ្មី ដែលរាជរដ្ឋាភិបាលទើបតែបាន អនុម័តនៅក្នុងកិច្ចប្រជុំពេញអង្គគណៈរដ្ឋមន្ត្រីនាថ្ងៃទី៩ ខែកក្កដា ឆ្នាំ២០២១ថ្មីៗនេះ ជាដែកឆក់ស្រូបទាញវិនិយោគបន្ថែមទៀត។
សេចក្តីព្រាងច្បាប់ស្តីពីវិនិយោគថ្មីនេះ មាន១២ពូក និង៤២មាត្រា ត្រូវបានសម័យប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា បានអនុម័តរួចរាល់ហើយ ដែលនឹងត្រូវបញ្ជូនទៅរដ្ឋភាស ដើម្បីពិនិត្យ និងអនុម័តបន្ត។
រាជរដ្ឋាភិបាល អះអាងថា សេចក្តីព្រាងច្បាប់ស្ដីពីវិនិយោគថ្មីនេះ គឺដើម្បីជំនួសច្បាប់ ស្ដីពីវិនិយោគចាស់ ដែលបានចូលជាធរមានតាំងពីឆ្នាំ១៩៩៤ និងឆ្នាំ២០០៣។ ការបង្កើតច្បាប់ថ្មីនេះ ក្នុងគោលបំណងធ្វើឱ្យមានភាពទាក់ទាញ និងប្រសើរជាងមុននៃការវិនិយោគនៅកម្ពុជា ដូចជាពង្រឹងភាពទាក់ទាញ និងសមត្ថភាពបំពេញបន្ថែម ជាពិសេសគិតគូរអំពីការផ្តល់ការលើកទឹកចិត្ត ដល់វិស័យអាទិភាព កម្រិតបច្ចេកវិទ្យា និងបច្ចេកទេស ការបង្កើតការងារ ការបណ្តុះបណ្តាលជំនាញ ការសិក្សាស្រាវជ្រាវ ការអភិវឌ្ឍនិងនវានុវត្តន៍ និងសហគ្រាសធុនតូច និងមធ្យម។
អ្នកធុរកិច្ច និងជាអនុប្រធានសភាពាណិជ្ជកម្មកម្ពុជា ឧកញ៉ា លឹម ហេង បានបង្ហាញពីការគាំទ្រ និងអបអរសារទរចំពោះច្បាប់វិនិយោគថ្មី ព្រោះកន្លងមក សភាពាណិជ្ជកម្មកម្ពុជា និងដៃគូពាក់ព័ន្ធ បានចូលរួមផ្ដល់ធាតុចូលជាច្រើនដល់ច្បាប់ថ្មីនេះ ជាមួយក្រសួងសេដ្ឋកិច្ច និងហិរញ្ញវត្ថុ និងក្រុមប្រឹក្សាអភិវឌ្ឍន៍កម្ពុជា។
ឧកញ៉ាបានមានប្រសាសន៍ថា «កន្លងមកយើងមានបញ្ហាប្រឈមរឿងការផ្គត់ផ្គង់ក្នុងស្រុក ដើម្បីកែច្នៃមាន ជាប់ VAT ប៉ុន្ដែនៅពេលដែលមានច្បាប់ថ្មីនេះ ខ្ញុំគិតថាអាចនឹងរួច VAT ហើយក៏ជាការលើកទឹកចិត្តឲ្យសហគ្រាសធុនតូច និងមធ្យម មានលទ្ធភាពផ្គត់ផ្គង់ ដល់រោងចក្រសហគ្រាស ដែលវិនិយោគនាំចេញ»។ អ្វីដែលពិសេសជាងនេះទៀតនោះ ច្បាប់ថ្មីនេះ នឹងអនុញ្ញាតឲ្យអនុគណៈកម្មការវិនិយោគខេត្ត អាចអនុម័តគម្រោងដែលមានទឹកប្រាក់ធំជាងមុន ដែលច្បាប់ចាស់មានត្រឹម២លានដុល្លារប៉ុណ្ណោះ។
គួរបញ្ជាក់ថា ដើម្បីបង្កើនភាពប្រកួតប្រជែង និងភាពទាក់ទាញរបស់កម្ពុជា ពីសំណាក់វិនិយោគិន សេចក្តីព្រាងច្បាប់នេះ បានបំព្រួញពេលវេលាក្នុងការចេញវិញ្ញាបនបត្រចុះបញ្ជីពី ៣១ថ្ងៃ ទៅ២០ថ្ងៃ ហើយការបំពេញពាក្យសុំចុះបញ្ជីអាចធ្វើទៅ បានតាមរយៈការដាក់ឱ្យប្រើប្រាស់ថ្នាលបច្ចេកវិទ្យាព័ត៌មាន (Online)។ សេចក្តីព្រាងច្បាប់នេះក៏បានដាក់ចេញនូវការពង្រឹងយន្តការតាមដាន និងត្រួតពិនិត្យរបស់ក្រសួង-ស្ថាប័នជំនាញពាក់ព័ន្ធ តាមរយៈការចុះត្រួតពិនិត្យក្នុងពេលតែមួយនិងរួមគ្នា ព្រមទាំងកំណត់នូវរបបលើកទឹកចិត្ត ទាំងផ្នែកពន្ធ និងមិនមែនពន្ធ ដើម្បីទាក់ទាញលំហូរវិនិយោគ មកកាន់វិស័យដែលកម្ពុជាត្រូវការជាចាំបាច់ ក្នុងបរិបទនៃការធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែង៕ រក្សាសិទ្ធិដោយ ៖ CEN
