បុរសវ័យចំណាស់អាយុ ៧៥ឆ្នាំម្នាក់រស់នៅក្នុងរដ្ឋកាលីហ្វញ៉ា សហរដ្ឋអាមេរិច ត្រូវបានតុលាការកាត់ទោសឲ្យជាប់គុករយៈពេល ៣៣០ឆ្នាំពីបទរំលោភបំពានផ្លូវភេទលើកុមារជាច្រើននាក់។ នេះបើតាមការចេញផ្សាយរបស់សារព៌តមានចិន Xinhua នៅថ្ងៃព្រហស្បតិ៍ ទី២៦នេះ។
បើតាមការិយាល័យមេធាវីប្រចាំតំបន់ បាននិយាយនៅក្នុងសេចក្តីប្រកាសថា ជនជាប់ចោទឈ្មោះ Alex Lopez ដែលរស់នៅក្នុងតំបន់ Visalia ត្រូវបានតុលាការរកឃើញថាបានប្រព្រឹត្តអំពើអាសចំនួន ២២ករណីលើកុមារជាច្រើននាក់មានអាយុក្រោយ ១៤ឆ្នាំ។
ជនជាប់ចោទបានប្រព្រឹត្តអំពើអាសលើកុមារីចំនួន ៤នាក់ និងកុមារាម្នាក់ ក្នុងរយៈពេល ១៦ឆ្នាំ ចាប់តាំងពីខែកក្កដា ឆ្នាំ ១៩៩៣ ដល់ខែឧសភា ឆ្នាំ ២០០៩ ដោយរំលោភបំពានលើកុមារជាច្រើននាក់អាយុ ១០ឆ្នាំ ឬក្រោមនេះ។
លោក Tim Ward មេធាវីប្រចាំតំបន់ Tulare County បានសម្តែងសេចក្តីត្រេកអរដែលមានការកាត់ទោសចំពោះជនប្រព្រឹត្តអំពើរំលោភបំពានលើកុមារដើម្បីរកយុត្តិធ៌មជូនក្រុមគ្រួសារកុមាររងគ្រោះ ហើយលោកបាននិយាយទៀតថា គ្មានអ្វីធ្វើឲ្យសហគមន៍ឈឺចាប់ជាងអំពើរំលោភបំពានលើកុមារទេ៕ សុភ័ក្ត្រ
