ភ្នំពេញ ៖ ពាក់ព័ន្ធនឹងការហោះហើរត្រង់ ពីឥណ្ឌូនេស៊ី មកកម្ពុជា និងពីកម្ពុជាទៅឥណ្ឌូនេស៊ី នោះសម្តេចតេជោ ហ៊ុន សែន គាំទ្រយ៉ាងខ្លាំង ហើយបើអាចធ្វើបានកាន់តែលឿន គឺកាន់តែល្អ ព្រោះវាអាចលើកស្ទួយកិច្ចសហប្រតិបត្តិការរវាងប្រទេសទាំងពីរផង និងដើម្បីផ្សារភ្ជាប់រវាងប្រជាជន និងប្រជាជនផង។
នៅព្រឹកថ្ងៃអង្គារ ទី២៧ ខែមីនា ឆ្នាំ ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជួបពិភាក្សាការងារជាមួយ លោក Luhut Binsar Pandjaitan រដ្ឋមន្ត្រីសម្របសម្រួលកិច្ចការសមុទ្រ នៃប្រទេសឥណ្ឌូនេស៊ី ។
លោក Luhut Binsar Pandjaitan បានពាំនាំនូវកាផ្តាំផ្ញើសួរសុខទុក្ខពីលោកប្រធានាធិបតីឥណ្ឌូនេស៊ី ជូនចំពោះ សម្តេចតេជោ ហ៊ុន សែន ផងដែរ ហើយលោកក៏បាននាំកនូវលិខិតគោរពអញ្ជើញ សម្តេចតេជោ ហ៊ុន សែន ចូលរួមក្នុងកិច្ចប្រជុំប្រចាំឆ្នាំនៅប្រទេសឥណ្ឌូនេស៊ី ដែលមានវត្តមានមេដឹកអាស៊ាន និងធនាគារ IMF ,World Bank ផងដែរ។
ជាមួយគ្នានោះ លោក Luhut Binsar Pandjaitan ក៏បានគោរពជម្រាបជូនសម្តេចតេជោ ហ៊ុន សែន ថា ការចូលរួមរបស់កម្ពុជាក្នុងកិច្ចប្រជុំនោះគឺសំខាន់ណាស់ ដែលឆ្លុះបញ្ចាំងពីស្ថានភាពរីកចម្រើននៃសេដ្ឋកិច្ចកម្ពុជាដែលកន្លងមកគឺបានចាប់ផ្តើមពីចំណុចទាបបំផុត រហូតមកដល់ពេលនេះក្លាយទៅជាប្រទេសមួយដែលជាប់ចំណាត់ថ្នាក់លេខ៦នៅពិភពលោក ហើយការរីកចម្រើននេះ គឺជាមោទភាពមួយប្រទេសក្នុងតំបន់ និងអន្តរជាតិទាំងមូលបានដឹងពីការរីកចម្រើននេះ ។ កម្ពុជាកាលពី៣០ឆ្នាំមុននោះ គឺជាប្រទេសពុំមានសេដ្ឋកិច្ចលូតលាស់ទេ ក៏ប៉ុន្តែពេលនេះ សេដ្ឋកិច្ចកម្ពុជាបានកើនឡើងជាង ៧% ដែលចំពោះរូបលោកផ្ទាល់ គឺបានកោតសរសើរដល់ការដឹកនាំដ៏ឈ្លាសវៃរបស់សម្តេចតេជោ ហ៊ុន សែន។
ទន្ទឹមនឹងនោះ លោកក៏បានជម្រាបពីបំណងចង់ពង្រឹងបន្ថែមអំពីកិច្ចសហប្រតិបត្តិការលើវិស័យយោធា វិស័យសេដ្ឋកិច្ច កសិកម្ម និងទេសចរណ៍។ លោកនឹងពិភាក្សាជាមួយក្រុមហ៊ុនអាកាសចរណ៍ ឡៃអិន របស់ឥណ្ឌូនេស៊ីដើម្បីជំរុញអោយមានការហោះហើរត្រង់ពីឥណ្ឌូនេស៊ីមកកាន់កម្ពុជានៅពេលខាងមុខ។
ជាការឆ្លើយតប សម្តេចតេជោ ហ៊ុន សែន បានថ្លែអំណរគុណដល់ លោក Luhut Binsar Pandjaitan ដែលបានពាំនាំនូវការផ្តាំផ្ញើសួរសុខទុក្ខពីលោកប្រធានាធិបតីឥណ្ឌូនេស៊ី ហើយសម្តេចក៏ទទួល និងបានឆ្លើយតបជាផ្លូវការនៃការអញ្ជើញទៅចូលរួលកិច្ចប្រជុំនៅខែតុលានៅកោះបាលីប្រទេសឥណ្ឌូនេស៊ី។ សម្តេចតេជោ បានថ្ងែងអំណរគុណដល់លោករដ្ឋមន្ត្រី នូវកិចខ្ចសហប្រតបតិ្តការជាមួយគ្នាកន្លងមកជាពិសេស លើការងារសន្តិភាព និងការហ្វឹកហ្វឺនបង្កើនសមត្ថភាពកងទាហានកម្ពុជា។ បច្ចុប្បន្ននេះ កិច្ចសហប្រតិបត្តិការរវាងកម្ពុជា និងឥណ្ឌូនេស៊ី គឺមានការរីកចម្រើនខ្លាំងគឺរួមទាំងវិស័យយោធា និងវិស័យផ្សេងៗទៀត ក៏ប៉ុន្តែប្រទេសទាំងពីរត្រូវខិតខំពង្រឹងនិងពង្រីកបន្ថែមទៀត។
សម្តេចតេជោ ហ៊ុន សែន បានផ្តល់នូវអនុសាសន៍អោយពិនិត្យមើលបន្ថែមទៀតនូវសក្តានុពលដទៃទៀតដែលយើងមាន ជាពិសេសលើវិស័យសេដ្ឋកិច្ច ពាណិជ្ជកម្ម ការវិនិយោគទេសចរណ៍ និងកសិកម្មជាដើម។ ហើយទាក់ទងនឹងកសិកម្មនេះ សម្តេចតេជោ ក៏បានស្នើសុំអោយភាគីខាងឥណ្ឌូនេស៊ីមកពិនិត្យមើលពីឱកាសវិនិយោគក្នុងប្រទេសកម្ពុជា។ ព្រោះថា បើឥណ្ឌូនេស៊ីមកដាក់ទុននៅប្រទេសកម្ពុជា គឺអាចនឹងធ្វើអោយតម្លៃអង្ករដែលនាំចេញទៅប្រទេសឥណ្ឌូនេស៊ីនឹងអាចចុះថោក ។
សម្តេចតេជោ ហ៊ុន សែន បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលឥណ្ឌូនេស៊ី ដែលបានផ្តល់នូវជំនួយដល់កម្ពុជាកន្លងមក រួមទាំងការបណ្តុះបណ្តាលដល់ធនធានមនុស្សរបស់ប្រទេសកម្ពុជាផងដែរ៕ ដោយ ៖ បញ្ញាស័ក្តិ
