ប្រិយមិត្តនៅក្នុងបណ្តាញសង្គមជាច្រើន ប្រហែលជាបានឃើញរួចហើយ ដែលកាលពីល្ងាចម្សិលមិញនេះ (ថ្ងៃទី២៩ ខែកក្កដា ឆ្នាំ២០២១) អ្នកឧកញ៉ា គិត ម៉េង បានតុងតែងខ្លួនធ្វើជាអ្នកដឹកជញ្ជូនអុីវ៉ាន់អនឡាញជិះម៉ូតូទៅយកទំនិញកន្លែងចែកចាយ ដើម្បីយកទៅពញ្ញាក់អារម្មណ៍ដល់មិត្តចាស់របស់ខ្លួន គឺអ្នកឧកញ៉ា ហុង ពីវ ផ្អើលពេញបណ្តាញសង្គមហ៊្វេសបុកតែម្តង។
ពិតណាស់ អ្នកឧកញ៉ា គិត ម៉េង បានធ្វើឲ្យអ្នកលក់ និងអ្នកចូលទៅញ៉ាំអាហារនៅក្នុងហាង ពិតមានការចាប់អារម្មណ៍ខ្លាំង និងនាំគ្នាភ្ញាក់ផ្អើល សុំថតរូបជាមួយលោក ទាំងក្តីរំភើបចិត្តជាខ្លាំង។
ក្នុងនោះផងដែរ អ្នកឧកញ៉ា ដែលជាប្រធាន និងជានាយកក្រុមហ៊ុន Roraly Group និងព្រមទាំងជាប្រធានក្រុមប្រឹក្សាភិបាលធានាគារវីងខេមបូឌា បានបង្ហោះរូប២សន្លឹកអមនិងសាររៀបរាប់យ៉ាងដូច្នេះថា៖ «ថ្ងៃនេះ ខ្ញុំមានមោទនភាពណាស់ដែលក្រុមហ៊ុនវីងបានបើកដំណើរការវីងម៉លនៅខេត្តសៀមរាប។ ក្នុងអំទ្បុងពេលជំងឺកូវីដ-១៩នេះ យើងបានឃើញអាជីវកម្មជាច្រើនត្រូវបានប៉ះពាល់ ដែលបង្កបញ្ហាដល់ជីវភាពរស់នៅប្រចាំថ្ងៃរបស់បងប្អូនយើងជាច្រើន។ ខណៈពេលដែលយើងអនុវត្តវិធានការណែនាំតាមរបស់រាជរដ្ឋាភិបាល គឺ ៣កុំ ៣ការពារ អាជីវកម្មនៅតែអាចបន្តជាមួយនឹងបច្ចេកវិទ្យានេះ ដែលវីងម៉លបានមកដល់ទីនេះ ដើម្បីផ្តល់ជូននូវបទពិសោធន៍នៃការទិញអីវ៉ាន់ប្រកបដោយសុវត្ថិភាព តម្លៃទាប សម្រាប់ពាណិជ្ជករ អ្នកលក់ជាមួយនឹងការដឹកជូនដោយឥតគិតថ្លៃដល់អតិថិជន។
ខ្ញុំជឿជាក់យ៉ាងមុតមាំថាធនាគារវីង និងវីងម៉លកំពុងកសាងសេដ្ឋកិច្ចបើកចំហនៅកម្ពុជា តាមរយៈការបង្កើតអត្ថប្រយោជន៍កាន់តែច្រើនសម្រាប់ពាណិជ្ជករ អតិថិជន និងសហគមន៍ទាំងមូលរបស់យើង។ ជាមួយនឹងសេវាកម្មបន្ថែម អ្នកលក់របស់យើងនឹងអាចបង្កើនបរិមាណលក់របស់ពួកគគាត់ តាមរយៈការដឹកជញ្ជូនពីផ្ទះ ខណៈពេលដែលអតិថិជនរបស់យើងក៏អាចមានអារម្មណ៍សុវត្ថិភាពក្នុងការទិញទំនិញដែលពួកគាត់ចូលចិត្តពីផ្ទះរបស់ពួកគាត់ ជាពិសេសរួមទាំងមានការដឹកជញ្ជូនដោយឥតគិតថ្លៃផងដែរ។
ខ្ញុំក៏ឆ្លៀតឱកាសនេះទៅសួរសុខទុក្ខមិត្តចាស់របស់ខ្ញុំគឺ អ្នកឧកញ៉ា ហុង ពីវ ដើម្បីប្រគល់អំណោយដែលខ្ញុំស្រទ្បាញ់ជូនគាត់ផ្ទាល់។ ជាមួយវីងម៉ល អ្វីៗគ្រប់យ៉ាងកាន់តែងាយស្រួល!»៕ រក្សាសិទ្ធិដោយ៖ លឹមហុង
