ខេត្តព្រះសីហនុ ៖ រដ្ឋបាលខេត្តព្រះសីហនុ និងរដ្ឋបាលខេត្តគូយចូវ នៃប្រទេសចិន បានធ្វើពិធីចុះហត្ថលេខាជាមួយគ្នា ស្តីពីកិច្ចសហប្រតិបត្តិការ និងការផ្លាស់ប្តូរលើវិស័យកីឡា រវាងរដ្ឋបាលខេត្តគូយចូវ នៃសាធារណរដ្ឋប្រជាមានិតចិន និងមន្ទីរអប់រំ យុវជន និងកីឡា ខេត្តព្រះសីហនុ។ ពិធីនេះរៀបចំឡើង នៅសាលប្រជុំសាលាខេត្តព្រះសីហនុ កាលពីព្រឹកថ្ងៃទី ២៨ ខែមីនា ឆ្នាំ២០១៨ ក្រោមអធិបតីភាព លោក គង់ វីតាណៈ អភិបាលរងខេត្តព្រះសីហនុ។
ខ្លឹមសារលទ្ធផល នៃកំណត់ហេតុ កិច្ចប្រជុំ របស់រដ្ឋបាលខេត្តព្រះសីហនុ បង្ហាញថា ភាគីទាំងពីរ កម្ពុជា និងចិន បានពិភាក្សាគ្នាអំពីពេលវេលា និងដំណើរបំពេញទស្សនកិច្ច និងការរៀបចំការផ្លាស់ប្តូរដំណើរទស្សនកិច្ចជាមួយគ្នាទៅវិញទៅមក និងការផ្លាស់ប្តូរសកម្មភាពកីឡាទៅតាមពេលវេលាសមស្រប ដោយឈរលើគោលការណ៍ស្មើភាពគ្នា និងផ្តល់អត្ថប្រយោជន៍ឲ្យទៅវិញទៅមក។
ការផ្លាស់ប្តូរវិស័យកីឡាទាំងនោះរួមមាន៖ ការពិនិត្យទីតាំងកីឡា ការផ្លាស់ប្តូរទស្សនកិច្ច ការហ្វឹកហ្វឺន ដល់កីឡាករ និងផ្លាស់ប្តូរគ្រូបង្វឹក ព្រមទាំងកីឡាផ្សេងៗទៀតដែលទាក់ទង៕ ដែន សីមា