ខេត្តមណ្ឌលគិរី៖ នគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ បានដេញចាប់រថយន្តខ្នាតយក្ស ផ្អើលប្រជាពលរដ្ខខេត្តមណ្ឌលគិរី រហូតដល់ថ្នាក់សមត្ថកិច្ច បានចាប់វាយខ្នោះមនុស្ស ២នាក់ ដោយបាននាំយកទាំងមនុស្សទាំងរថយន្តទៅកាន់ស្នងការដ្ឋាននគបាលខេត្តមណ្ឌលគិរី បានមួយចម្អិនកំពឹស រួចក៏ដោះលែងស្ងាត់ៗទៅវិញ។ នគរបាលឲ្យដឹងថា ការចាប់ឃាត់ខ្លួនអ្នកបើកបរ និងរថយន្តខាងលើនេះ សមត្ថកិច្ចលើកហេតុផលថា អ្នកបើកបរមិនសហការណ៍ជាមួយសមត្ថកិច្ចពេលចុះត្រួតពិនិត្យនៅតាមដងផ្លូវ។ ហេតុការណ៍ខាងលើ បានកើតនៅម៉ោង ៤ល្ងាចថ្ងៃទី២៧ ខែមីនា ឆ្នាំ២០១៧ ដោយសមត្ថកិច្ចឃាត់ បានរថយន្តនិងមនុស្សនៅ អូររាំង និងដោះលែងវិញ នៅម៉ោង ៨យប់ថ្ងៃដដែល។
ប្រភពព័ត៌មានបានឲ្យដឹងថា មុនពេលកើតហេតុនគរបាលសេដ្ឋកិច្ចក្រសួងមហាផ្ទៃ បានដាក់ប៉ុស្តិ៍ និងឃាត់រថយន្តខាងលើ ដើម្បីត្រួតពិនិត្យ ព្រោះសង្ស័យដឹកឈើខុសច្បាប់ ប៉ុន្តែអ្នកបើកបររថយន្តខ្នាតយក្សនោះ មិនព្រមឈប់ឲ្យសមត្ថកិច្ចត្រួតពិនិត្យទេ ហើយអ្នកបើកបររថយន្តធុនធំនោះ បានបន្តបើករត់រេពេញដងផ្លូវ ទើបសមត្ថកិច្ចបើកការប្រដេញប្រផិតប្រភីង ធ្វើឲ្យភ្ញាក់ផ្អើលប្រជាពលរដ្ឋ និងអ្នកធ្វើដំណើរតាមផ្លូវជាតិលេខ៧៦ ចាប់ចំណុច ជិតផ្លូវបំបែកចូលភូមិពូតាំង រហូតដល់ ទីរួមស្រុកអូររាំង ទើបនគរបាលសេដ្ឋកិច្ចក្រសួងមហាផ្ទៃ អាចឃាត់រថយន្តធុនធំនោះបាន ដោយសហការណ៍ជាមួយកម្លាំងនគរបាលខេត្តមណ្ឌលគិរី។ សកម្មភាពដេញចាប់រថយន្តខ្នាតធំខាងលើនេះ សមត្ថកិច្ចឈានដល់ចាប់វាយខ្នោះមនុស្សប្រុសជិះក្នងរថយន្ត ២នាក់នាំយកទាំងរថយន្ត និងអ្មកបើកបរយកទៅកាន់ស្នងការដ្ឋាននគរបាលខេត្តមណ្ឌលគិរី ដើម្បីសួរនាំ និងត្រួតពិនិត្យរថយន្តសង្ស័យមានដឹកឈើខុសច្បាប់។ បន្ទាប់ពីមានហេតុការដេញចាប់រថយន្តកក្រើក ខេត្តមណ្ឌលគិរី អ្នកធ្វើដំណើរតាមដងផ្លូវខាងលើមួយចំនួនធំ បានរិះគន់យ៉ាងខ្លាំងចំពោះសមត្ថកិច្ច ដែលបើកការប្រដេញយ៉ាងសាហាវបែបនេះ ដោយពួកគាត់មានការបារម្ភយ៉ាងខ្លាំង ចំពោះសុវត្ថិភាពពួកគាត់ដែលកំពុងប្រើប្រាស់ផ្លូវផងដែរ។ ប្រជាពលរដ្ឋឲ្យដឹងបន្ថែមថា ជារឿយៗពួកគាត់តែងតែឃើញសកម្មភាព របស់សមត្ថកិច្ចដេញកាក់រថយន្តគ្រប់ប្រភេទ ដែលសង្ស័យដឹកឈើ រត់កាត់ស្នាក់ការរបស់នគរបាលសេដ្ឋកិច្ចខាងលើ តែមិនដែលឃើញចាប់បង្ក្រាប់ទេ គឺកាក់ជាប់ឲ្យតែបង់លុយ រួចក៏ដោះលែងទៅវិញបាត់។
ជុំវិញព័ត៌មានខាងលើនេះ លោក ឡោ សុខា ស្នងការខេត្តមណ្ឌលគិរីឲ្យដឹងថា ខាងជំនាញ គេមិនមែនឃាត់មនុស្សទេ គឺគេឃាត់តែរថយន្ត ដោយសារគាត់បើកបរលឿនហួសកំរឹត ទើបសមត្ថកិច្ចឃាត់ពួកគាត់យកមកសួរនាំ ប៉ុន្តែលោកបានបញ្ជាក់ថា មិនមែនជាកម្លាំងរបស់ស្នងការដ្ឋានខេត្តមណ្ឌលគិរីពេលនេះអ្នកឃាត់ទេ ជាកម្លាំងថ្នាក់ជាតិជាអ្នកឃាត់រថយន្តខាងលើ គឺកម្លាំងសេដ្ឋកិច្ច របស់ក្រសួងមហាផ្ទៃ ហើយខាងកម្លាំងរបស់ក្រសួង បានកស្នើឲ្យកម្លាំងរបស់ស្នងការខេត្តមណ្ឌលគិរី ជួយសហការណ៍ ក្រោយពេលឃាត់បាន រថយន្តខាងលើបានបញ្ជូនទៅត្រួតពិនិត្យនៅស្នងការដ្ឋាននគរបាលខេត្តមណ្ឌលគិរី។ លោកបន្ថែមទៀតថា ក្រោយពេលធ្វើការត្រួតពិនិត្យសមត្ថកិច្ចរកឃើញឈើប្រភេទក្ដាកុងផ្លាកេ ដឹកចេញពីក្រុមហ៊ុន ដែលមានច្បាប់ត្រឹមត្រូវ ហើយសមត្ថកិច្ចក៏បានដោះលែងវិញ ដោយមានកំណត់ហេតុត្រឹមត្រូវ ថែមទាំងមានការឯកភាពពី លោកព្រះរាជអាជ្ញា និងមន្ត្រីជំនាញរដ្ឋបាលព្រៃឈើ ខេត្តមណ្ឌលគីរីផងដែរ៕ ដោយ៖ សមុទ្រឈើ
