ភ្នំពេញ ៖ រដ្ឋមន្ត្រីក្រសួងទេសចរណ៍ បានលើកឡើងនូវអនុសាសន៍មួយចំនួន ក្នុងគោលបំណងរៀបចំព្រឹត្តិការណ៍អង្គរសង្ក្រាន្តធ្វើឲ្យក្រុងសៀមរាប-អង្គរការ គឺការរៀបចំសណ្ដាប់ធ្នាប់ និងចរាចរណ៍ធ្វើដំណើររបស់ភ្ញៀវដែលទៅទស្សនា សំដៅរួមចំណែកទាក់ទាញភ្ញៀវទេសចរ។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោក ថោង ខុន រដ្ឋមន្ត្រីក្រសួងទេសចរណ៍ បានជួបកិច្ចពិភាក្សាព្រឹត្តិការណ៍អង្គរសង្ក្រាន្តនាថ្ងៃទី២៨ ខែមីនា ឆ្នាំ២០១៨ នៅទីស្ដីការក្រសួងទេសចរណ៍។ ព្រឹត្តិការណ៍អង្គរសង្ក្រាន្តឆ្នាំ២០១៨នេះ ធ្វើឡើងរយៈពេល៤ថ្ងៃ ចាប់ពីថ្ងៃទី១៣-១៦ ខែមេសា។
ជាមួយគ្នានោះ លោករដ្ឋមន្ត្រីបានលើកឡើងថា រាល់ព្រឹត្តិការណ៍អង្គរសង្ក្រាន្តម្ដងៗតែងតែជួបនឹងបញ្ហាកកស្ទះចរាចរណ៍ ដែលប៉ះពាល់ដល់ការធ្វើដំណើររបស់ភ្ញៀវទេសចរ ដូច្នេះ សំណូមពរសូមឲ្យមានការរៀបចំសណ្ដាប់ធ្នាប់ និងចរាចរណ៍ធ្វើដំណើររបស់ភ្ញៀវដែលទៅទស្សនាកម្មវិធីអង្គរសង្ក្រាន្តនេះ។
លោករដ្ឋមន្ត្រីបន្តថា ត្រូវធានាការពង្រឹងសេវា និងគុណភាពផលិតផល ម្ហូបអាហារឲ្យបានគ្រប់គ្រាន់ ព្រោះភ្ញៀវដែលទៅទស្សនាកម្មវិធីអង្គរសង្ក្រាន្តនោះ មួយថ្ងៃយ៉ាងហោចណាស់ក៏មាន ៥ម៉ឺននាក់ដែរ ពោលច្រើនជាងឆ្នាំមុន ២៥%។ ត្រូវរៀបចំកន្លែងស្នាក់នៅជូនភ្ញៀវឲ្យបានច្រើនតាមដែលអាចធ្វើទៅបាន ខណៈសណ្ឋាគារនៅក្នុងខេត្តសៀមរាបមានជាង ១៥.០០០បន្ទប់ ផ្ទះសំណាក់មានជាង ៥ពាន់បន្ទប់ ដូច្នេះមិនអាចបំពេញតម្រូវការជូនភ្ញៀវទេសចរបានគ្រប់គ្រាន់ទេ ចាំបាច់ត្រូវរៀបចំកន្លែងស្នាក់នៅដទៃទៀត ដូចជាផ្ទះប្រជាពលរដ្ឋ វត្តអារាមជាដើម។
លោករដ្ឋមន្ត្រីបានផ្តល់អនុសាសន៍មួយចំនួនទៀតដូចជា ត្រូវធ្វើការផ្សព្វផ្សាយអំពីព្រឹត្តិការណ៍អង្គរសង្ក្រាន្តនេះឲ្យបានទូលំទូលាយ តាមរយៈការចាក់ផ្សាយលើទូរទស្សន៍អន្តរជាតិ CNN នៅតាមផ្ទះសំណាក់ សណ្ឋាគារ ឬទីតាំងដែលមានភ្ញៀវទេសចរទៅទស្សនាជាដើម ពិសេសត្រូវពន្យល់ប្រាប់ភ្ញៀវទេសចរបរទេសថា ការចូលទស្សនាព្រឹត្តិការណ៍អង្គរសង្ក្រាន្ត គ្មានការបង់ថ្លៃដូចការចូលទស្សនាប្រាសាទអង្គរវត្តនោះឡើយ។
លោកហ៊ុន ម៉ានី បានថ្លែងថា អ្វីដែលមិនមានភាពទាក់ទាញខ្ពស់នៅឆ្នាំមុន ក្រុមយុវជន ស.ស.យ.ក បាន និងកំពុងខិតខំធ្វើឲ្យមានការទាក់ទាញកាន់តែខ្លាំងនៅឆ្នាំនេះ។ ក្រៅពីយុទ្ធនាការបំបែកឯកទគ្គកម្មក្រមាវែងជាងគេនៅលើពិភពលោក កម្មវិធីអង្គរសង្ក្រាន្តក៏មានរៀបចំកន្លែងងូតទឹកត្រជាក់ៗ ដែលមានឈ្មោះថា តោះៗលេងទឹក វ៉ៃបុកធ្លាក់ទឹក បវរកញ្ញាធ្លាក់ទឹក មុខហនុមានដ៏ធំជាងគេ ក្នុងគោលបំណងចូលរួមជាមួយរាជរដ្ឋាភិបាល ក្នុងការលើកកម្ពស់សិល្បៈល្ខោនខោល។
លោកបានបន្តថា សហភាពសហព័ន្ធយុវជនកម្ពុជាបានចាត់តាំង និងពង្រាយយុវជន-យុវនារីកម្ពុជាជាង៤ពាន់នាក់ ដែលចំនួននេះមានការកើនឡើងច្រើនជាងឆ្នាំមុន ហើយនេះក៏ជាឱកាសដែលយុវជនកម្ពុជាអាចបង្ហាញស្នាដៃ ការលះបង់ រួបរួមសាមគ្គី និងសហការគ្នា ដើម្បីសម្រេចកិច្ចការ និងដោះស្រាយបញ្ហាប្រឈមរួមគ្នាផងដែរ។
