ជឿជាក់ថា ប្រិយមិត្តជាច្រើនបានស្គាល់ហើយ ចំពោះឈ្មោះកញ្ញា អាម៉ី ដែលជាប្អូនស្រីបង្កើតរបស់ អាជី ដែលជាអ្នកលក់ឡេតាមអនឡាញដ៏មានប្រជាប្រិយភាព ធ្លាប់រងភាពអាម៉ាសស្ទើរងើបមុខមិនរួច ដោយសារផលិតវីដេអូសម្តែងរឿង «ទុំទាវ ២០២១» បែបកំប្លែង យកសាសនាមកលេងសើច និងប្រើប្រាស់នូវពាក្យសំដីដ៏មិនសមរម្យ ធ្វើឲ្យមហាជននាំគ្នារិះគន់យ៉ាងចាស់ៗដៃ រហូតក្រសួងហៅមកដុសក្អែល។
តែទោះជាយ៉ាងណា បងប្អូនស្រីទាំងពីរនាក់នេះ បានរួចផុតពីសំណាញ់ច្បាប់ បើទោះជាមហាជនជម្រុញឲ្យច្បាប់ចាត់វិធានការកុំលើកលែងទោសឲ្យ ដូចទៅនិងករណី ចំប៉ីខ្មៅ អុីចឹងដែរក៏ដោយ។ ហើយកាលពីពេលកន្លងទៅ ថ្ងៃទី២៥ ខែមិថុនា ឆ្នាំ២០២១ កញ្ញា អាម៉ី ក៏បានធ្វើឲ្យមហាជនផ្ទុះការភ្ញាក់ផ្អើលជាខ្លាំងតែម្តង ខណៈស្ងាត់ៗបានលេចមុខភ្ជាប់ពាក្យជាមួយគូស្នេហ៍របស់ខ្លួន និងអ្វីដែលពិសេសនោះ គឺទទួលបានថ្លៃទឹកដោះដ៏មិនធម្មតារហូតដល់ទៅ 99999$ ស្មើ និង 400 000 000រៀល។
តែដោយឡែកថ្មីៗនេះ កញ្ញា អាម៉ី ដែលមានម្ចាស់គណនីហ្វេសប៊ុកឈ្មោះ Teng Dana បានធ្វើការបង្ហោះវីដេអូមួយបកស្រាយបទចម្រៀងជាភាសាបរទេសរួមជាមួយគូដណ្តឹង ធ្វើឲ្យមហាជននាំគ្នាសរសើរព្រោងព្រាតតែម្តង ព្រោះមិននឹកស្មានថាទឹកដមសំឡេងរបស់ អាមុី សែនពិរោះខ្លាំងបែបនេះ ដែលតារាចម្រៀងអាជីពខ្លះស្តាប់ហើយសុំខ្មាស។
នៅក្នុងនោះផងដែរ កញ្ញា អាម៉ី ក៏បានភ្ជាប់ Caption វីដេអូបទចម្រៀងរបស់ខ្លួនយ៉ាងដូច្នេះថា៖ «តាមសូមណូមពរ Leave the door open មិនសូវចេះច្រៀងទេបងប្អូនកុំប្រកាន់ បើសំឡេងវិញឡាយលក់ឡេពេកស្អកក អស់ហើយ»៕ រក្សាសិទ្ធិដោយ៖ លឹម ហុង
