ទីក្រុងប៉េកាំងបានរិះគន់សម្ព័ន្ធភាពថ្មីរវាងសហរដ្ឋអាមេរិកជាមួយអូស្ត្រាលី និងអង់គ្លេសដែលទីក្រុងកង់បេរ៉ានឹងទទួលបានបច្ចេកវិទ្យានាវាមុជទឹកនុយក្លេអ៊ែរ ខណៈមានការគំរាមកំហែងមិនទទួលខុសត្រូវខ្លាំងចំពោះស្ថិរភាពក្នុងតំបន់។ អ្នកនាំពាក្យក្រសួងការបរទេសចិនលោក Zhao Lijian បានប្រាប់សន្និសីទសារព័ត៌មានជាប្រចាំមួយថា កិច្ចព្រមព្រៀងនេះធ្វើឱ្យប៉ះពាល់យ៉ាងធ្ងន់ធ្ងរដល់សន្តិភាព និងស្ថិរភាពក្នុងតំបន់និងបង្កើនការប្រណាំងប្រជែងសព្វាវុធ។
សម្ព័ន្ធមិត្តលោកខាងលិចមិនបាននិយាយអំពីប្រទេសចិន នៅពេលដែលបង្ហាញពីកិច្ចព្រមព្រៀងនាវាមុជទឹកកាលពីថ្ងៃពុធនោះទេ ប៉ុន្តែចេតនារបស់ពួកគេ ច្បាស់ណាស់គឺចង់សំដៅទៅលើកង្វល់សន្តិសុខតំបន់។សេចក្តីប្រកាសនេះបានធ្វើឡើង ខណៈអូស្ត្រាលីបានបង្កើនការចំណាយលើវិស័យការពារជាតិដោយប្រយ័ត្នប្រយែងចំពោះការកើនឡើងយ៉ាងឆាប់រហ័ស និងការទាមទារដែនទឹករបស់ចិន។
សម្ព័ន្ធភាពនេះត្រូវបានគេមើលឃើញថា ជាការដេញថ្លៃមួយដើម្បីទូទាត់ការរីកចម្រើនផ្នែកសេដ្ឋកិច្ចនិងយោធារបស់ចិននៅក្នុងតំបន់អាស៊ីប៉ាស៊ីហ្វិក។
លោក Zhao បាននិយាយថា៖« ការនាំចេញនូវនាវាមុជទឹកនុយក្លេអ៊ែរ ដែលមានភាពរសើបខ្លាំងនៅពេលសហរដ្ឋអាមេរិកនិងចក្រភពអង់គ្លេសបានទៅកាន់ប្រទេសអូស្ត្រាលីជាថ្មីម្តងទៀត ដោយបានបង្ហាញថា ពួកគេនឹងប្រើការនាំចេញនុយក្លេអ៊ែរជាឧបករណ៍នៃល្បែងភូមិសាស្ត្រនយោបាយនិងប្រកាន់យកស្តង់ដារពីរដែលគ្មានការទទួលខុសត្រូវ» ។
លោកបានបន្ថែមថា កិច្ចព្រមព្រៀងនេះបានផ្តល់ហេតុផលដល់បណ្តាប្រទេសក្នុងតំបន់ ដើម្បីចោទសួរពីភាពស្មោះត្រង់របស់អូស្ត្រាលី ក្នុងការគោរពតាមការប្តេជ្ញាមិនរីកសាយអាវុធនុយក្លេអ៊ែររបស់ខ្លួន។ លោកបានជំរុញឱ្យសម្ព័ន្ធមិត្តលោកខាងលិច« បោះបង់ចោលការគិតពីសង្រ្គាមត្រជាក់ដែលហួសសម័យទៅហើយរបស់ពួកគេ ឬហានិភ័យពីការបាញ់សម្លាប់ខ្លួនឯង»៕ ប្រភព៖ AFP