ភ្នំពេញ៖ ផលិតផលកសិកម្មរបស់ប្រទេសកម្ពុជា បានរួមចំណែកភាគច្រើន ក្នុងការនាំចេញទៅកាន់ទីផ្សារប្រទេសថៃ ខណៈដែលការនាំចេញពីថៃមកកាន់កម្ពុជា មានដូចជា៖ ធនធានថាមពល ជីកសិកម្ម ការផ្គត់ផ្គង់ចំណីអាហារ និងគ្រឿងសំអាងជាដើម។
តួលេខក្រសួងពាណិជ្ជកម្មថៃ បានបង្ហាញថា ៨ខែឆ្នាំ២០២១នេះ ពោលគឺចាប់ពីខែមករា ដល់ខែសីហា កម្ពុជាបាននាំចេញផលិតផលមានតម្លៃ ៦២៣ លានដុល្លារទៅទីផ្សារប្រទេសថៃ មានការថយចុះ ៣១.៧០ ភាគរយពីមួយឆ្នាំទៅមួយឆ្នាំ។ ដោយឡែក ការនាំចូល ពីប្រទេសថៃ ក្នុងរយៈពេលដូចគ្នានេះ បានកើនឡើង ១០.៧៦ ភាគរយស្មើនឹង ៤.៦១៤ លានដុល្លារ។
តួលេខបង្ហាញថា ពាណិជ្ជកម្មទ្វេភាគីរវាងកម្ពុជា-ថៃ មានតម្លៃ ៥.២៣៨ លានដុល្លារក្នុងរយៈពេល ៨ ខែដំបូងនៃឆ្នាំ២០២១នេះ ដែលជាការកើនឡើង ៣.១៤ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។
ផលិតផលរបស់កម្ពុជា ភាគច្រើនជាផលិតផលកសិកម្ម ដែលត្រូវបាននាំចេញទៅប្រទេសថៃ តែងតែត្រូវបានរំខានដោយរបាំងនៃវិញ្ញាបនបត្រអនាម័យ និងភូតគាមអនាម័យ។ ការធ្វើឲ្យប្រសើរឡើងនូវលក្ខខណ្ឌអនាម័យ និងភូតគាមអនាម័យគួរតែត្រូវបានដោះស្រាយ។ ព្រោះកន្លងមកមានការហាមឃាត់យើងមិនឲ្យនាំចេញផលិតផលកសិកម្មទៅក្រៅប្រទេស ទាក់ទងនឹងលក្ខខណ្ឌអនាម័យ និងភូតគាមអនាម័យ ដើម្បីឆ្លើយតបនិងតម្រូវការទីផ្សារ យើងត្រូវពិភាក្សាអំពីលក្ខខណ្ឌ អនាម័យ និងភូតគាមអនាម័យ ហើយសង្ឃឹមថា ផលិតផលកសិកម្មរបស់កម្ពុជា កាន់តែច្រើននឹងមានសិទ្ធិនាំចេញទៅកាន់ប្រទេសចិន និងទិសដៅផ្សេងៗទៀត៕
