ដូចដែលប្រិយមិត្តជាច្រើន បានជ្រាបហើយថា នៅពីព្រឹកថ្ងៃទី២០ ខែតុលា ឆ្នាំ២០២១ នេះ តារាកំប្លែង ខ្ញុង បានធ្វើ Live នៅមុខផ្ទះរបស់ខ្លួន ដើម្បីបកស្រាយជុំវិញរឿងជំពាក់បំណុលគេរហូតទៅដល់ចំនួនជាង ៥៧ មុឺនដុល្លារ នៅចំពោះមុខអ្នកកាសែតមកពីច្រើនស្ថាប័ន ដើម្បីធ្វើជាសាក្សី។
ក្នុងការ Live នេះផងដែរ ក្រៅពីបកអាក្រាតការពិតខ្ទេចគ្មានសល់ ទៅលើគ្រូ សៀវ សុផល និងកូនសិស្សម្នាក់ឈ្មោះ ហេង អ្នកនាង ខ្ញុង ក៏បានបង្ហាញចំនួនទឹកប្រាក់ពិតប្រាកដឲ្យអស់សង្ស័យ នៅក្នុងកុង ABA របស់ខ្លួន ដែលជាជំនួយឧបត្ថម្ភពីសំណាក់មហាជន សរុបរយៈពេល ៣ ថ្ងៃ (ចាប់តាំងពីថ្ងៃសុំជំនួយមក) គឺមានចំនួន ៥ម៉ឺន ៦ពាន់ ៥រយ ៤២ដុល្លារ (៥,៦៥៣៣.៣៧ ដុល្លារ)។
ជាមួយគ្នានេះផងដែរ អ្នកនាង ខ្ញុង ក៏បានបញ្ជាក់ច្បាស់ៗថា សម្រាប់លុយជំនួយទាំងនេះ ខ្លួនមិនទាន់យកចាត់ចែងធ្វើអ្វីនោះទេ ដោយស្នើសុំអ្នកជំនាញជួយប្រឹក្សាបន្ថែមផង ថាតើរូបនាងនឹងគួរយកទៅសងបំណុលគេ ឬធ្វើយ៉ាងណា ដើម្បីកុំឲ្យមហាជនគិតថា រូបនាងសម្តែងតទៅទៀត ខណៈមានម្ចាស់បំណុលរបស់នាងជាច្រើន ក៏មានក្តីអាណិត មិនបានយកការប្រាក់ទៀតទេ ដោយសូមឲ្យ ខ្ញុង សងតែប្រាក់ដើមជាការស្រេច។
តែទោះយ៉ាងណា ខ្ញុង ក៏បានផ្តាំផ្ញើទៅអ្នកដទៃ សូមកុំយកគំរូដូចខ្លួន និងសន្យាថា ក្រោយដោះបំណុលរួច ខ្លួននឹងឈប់ខ្ចីលុយគេ ជាពិសេសយកមកទិញសម្ភារៈនិយមប្រើប្រាស់ ឡូយឆាយ ក្រឡៃការពិត ដើម្បីឲ្យគេមើលឃើញថាខ្លួនអស្ចារ្យទៀតឡើយ៕ រក្សាសិទ្ធិដោយ៖ លឹម ហុង