ប្រិយមិត្តជាច្រើន ប្រាកដបានដឹង និងក៏ដូចក្តុកក្តួលរំជួលចិត្តរួចហើយ ចំពោះការបាត់បង់ជី.វិតនារីម្នាក់ទាំងនៅវ័យក្មេងដ៏គួរឲ្យសោកស្តាយ ស្ថិតនៅក្នុងទឹកដីតំបន់ចម្ការកៅស៊ូខេត្តកំពង់ចាម។ ការបាត់បង់ជី.វិតរបស់នាង ក៏ត្រូវបានដឹងថា ដោយសារជំងឺប្រចាំកាយ (ជំងឺទឹកនោមប្រៃ) អស់រយៈពេលជិត ៣ ឆ្នាំ ប៉ុន្តែ ដោយសារជំងឺនេះមិនអាចធូរស្បើយ និងផ្ទុយទៅវិញ គឺមានតែរឹតរួមធ្វើឲ្យរូបកាយរបស់នាងកាន់តែចុះដុនដាបពីមួយថ្ងៃទៅមួយ ហើយមិនអាចតស៊ូទៅមុខទៀតបាន នាងក៏បានលាចាកលោកកាលពីពេលថ្មីៗនេះ។
ជាមួយគ្នានោះផងដែរ មិត្តភក្តិរបស់នាងដែលមានគណនីហ្វេសប៊ុកឈ្មោះ សឿន ស្រីតូច ក្រោយទទួលដំណឹងដ៏អកុសលនេះ បានសម្តែងនូវក្តីរន្ធត់ចិត្តជាខ្លាំង និងសរសេររៀបរាប់បែបនេះថា៖ «ឯងប្រាប់គ្នាថាឯងពិបាកណាស់ ឈឺចុកចាប់ណាស់ ហត់ណាស់ តែឯងចង់ជាណាស់ចង់មានជីវិតធម្មតាដូចគេ ឯងតស៊ូណាស់ តែពេលនេះឯងប្រហែលជាហត់ហើយមិត្តសម្លាញ់ វាលឿនពេកហើយមិត្តសម្លាញ់ សម្រាកចុះណាសម្លាញ់ សូមអោយឯងកេីតជាតិជាថ្មីកុំឲ្យពិបាកដូចជាតិនេះអី លារហូតហើយមិត្តសម្លាញ់»។
លើសពីនេះ អ្វីដែលគួរឲ្យសែនស្រណោះ និងស្ទើរតែទប់ទឹកភ្នែកមិនបាននោះ គឺនៅពេលបានស្តាប់សំលេងសារចុងក្រោយរបស់នាង ដែលបានឆាតទៅកាន់មិត្តភក្តិ ខណៈបានដឹងច្បាស់ថាខ្លួនមិនអាចបន្តរស់ទៀតបាន។ ក្នុងនោះ នាងបាននិយាយទៅកាន់មិត្តៗសំលាញ់ឲ្យលេងថា៖ «…ចង់និយាយថា ឥឡូវ ឯងឆាតលាមិត្តភក្តិបណ្តើរៗហើយ ព្រោះអីខ្លាចអត់បានលា… មិត្តភក្តិណាអត់ដែលបានជួប មកជួបមុខគ្នាឲ្យហើយទៅណា៎ ឯងអស់វិធីមើលហើយណាស់ មើលឡើងរីងខ្លួន វាមិនជាស្អីទេ វាគ្រាន់តែហើមដៃជើង ហើមខ្លួន ហើមអស់រលីងហើយ មុខអីហ្នឹង យើងកើតយូរហើយជិត ៣ ឆ្នាំ ដូចគេធ្វើអត់ឲ្យយើងជាអុីចឹង មិនថាគ្រូពេទ្យ គ្រូខ្មែរ យើងមើលអស់ហើយ តែអត់ជាទេ…!»។
ទន្ទឹមនឹងដំណឹងដ៏សោកសៅបំផុតនេះ ឃើញថាមានប្រិយមិត្ត ក៏ដូចជាមជ្ឈដ្ឋានមហាជនជាច្រេីន បានសម្តែងនូវអារម្មណ៍រំជួលចិត្ត អាណិតដល់រូបនាងជាខ្លាំង និងព្រមទាំងបានផ្ញើសារចូលរួមរំលែកទុក្ខដ៏ក្រៀមក្រំទៅដល់គ្រួសារនៃសពផងដែរ៕ រក្សាសិទ្ធិដោយ៖ លឹម ហុង