ប្រិយមិត្តអ្នកតាមដានរឿងរ៉ាវគ្រួសារលោក ឌួង ឆាយ និងអតីតភរិយារបស់លោកអ្នកនាង ដេត ម៉ាលីណា ប្រាកដជាបានដឹងហើយ ដែលកាលពីពេលថ្មីៗនេះ នៅក្នុងការ Live វីដេអូបកស្រាយករណីបើករថយន្ត Rolls Royce បុកទ្រូងផ្លូវ បណ្តាលឲ្យខ្ទេចផ្នែកខាងមុខយ៉ាងដំណំ ក្នុងនោះ អ្នកនាង ដេត ម៉ាលីណា បាននិយាយយ៉ាងឡូយ ទៅកាន់អ្នករិះគន់ទៅលើមនុស្សស្រីដើរផឹកដាច់យប់ថា បើមិនឲ្យផឹក តើផលិតស្រាមកធ្វើអ្វី និងបើមិនឲ្យចូលក្លឹប សួរថាតើបង្កើតមកធ្វើអ្វីដែរ!!។
ពិតណាស់ រឿងអាស្រូវអ្នកនាង ដេត ម៉ាលីណា ដើរផឹកដាច់យប់ ពុំត្រឹមតែលោក ឌួង ឆាយ ជាអតីតស្វាមី បានដឹងសឹងគ្រប់ពេលវេលាការចេញចូលប៉ុណ្ណោះទេ គឺសូម្បីតែ ដេត ម៉ាលីណា ខ្លួននាងផ្ទាល់ ក៏បានទម្លាយលួចចេញទៅផឹកទាំងបំពានបំរាមគោចរ ទប់ស្កាត់ការរីករាលដាលនៃការឆ្លងជំងឺកូវីដ-១៩ នៅក្នុងសារសំលេងវីដេអូបែកធ្លាយមួយ កាលពីកន្លងទៅផងដែរ។
ជាក់ស្តែង ក្រោយពីបានឃើញរូបភាព និងវីដេអូចាប់បាន ដេត ម៉ាលីណា ចូលក្លឹបជាមួយមិត្តភក្តិ ដែលត្រូវបានទម្លាយចេញដោយលោក ឌួង ឆាយ ធ្វើឲ្យមហាជនពិតជាស្រឡាំងកាំងតែម្តង។ ហើយតាមរយៈរូបភាព និងវីដេអូស្តែងៗនេះផងដែរ លោក ឌួង ឆាយ ក៏បានភ្ជាប់សាររៀបរាប់ទាំងហួសចិត្តថា៖ «ចេះខ្មាស់គេដែរបានខំដើរឱនមុខ។ សុខចិត្តអោយអ្នកបើកឡានជូនកូនស្រីពៅមកផ្ទះដើម្បីខ្លួនឯងប្រញាប់ទៅក្លឹបផឹកស្រវឹងជោគជាំដល់ម៉ោង 3 ភ្លឺ 2 ថ្ងៃជាប់គ្នា។ គ្រាន់ជូនកូនស្រីមកផ្ទះសិនក៏មិនបាន នេះហើយអ្នកម្តាយដូចឡាំយ៉ងមិនខុសសូម្បីបន្តិច។ ដើរផឹកសុីកន្លែងមនុស្សច្រើនមិនខ្លាចឆ្លងកូវិតរួចចម្លងមកកូនៗ។ សូមអរគុណពូមីងបងប្អូនជាច្រើនដែលបានផ្ញើមកខ្ញុំ និងលើកទឹកចិត្តខ្ញុំអោយប្តឹងទាមទារសិទ្ធិចិញ្ចឹមកូនៗមកវិញ។ ខ្ញុំសង្ឃឹមជឿជាក់តុលាការនឹងផ្តល់អទិភាពសំរាប់ខ្ញុំដើម្បីទទួលបានសិទ្ធិចិញ្ចឹមកូនៗត្រលប់មកវិញ។ អានិតតែកូនៗខ្ញុំទេ ឌួង ឆាយ»។
ជាមួយទង្វើអតីតភរិយា ដើរផឹកចូលក្លឹបសប្បាយ ហាក់មិនសូវខ្វល់ពីកូនៗបែបនេះ លោក ឌួង ឆាយ ក៏បានបញ្ជាក់តាមរយៈខមិនយ៉ាងខ្លីថា៖ «អោយតែកូនៗមកខ្ញុំមកចប់បញ្ហាហើយ ចង់នាងទៅជាស្អីក៏ខ្ញុំមិនខ្វល់ដែរ»៕ រក្សាសិទ្ធិដោយ៖ លឹម ហុង
