សួនកម្សាន្ត សៀងហៃ ឌីស្នីលែន (Disneyland) បានចាក់សោទ្វាររបស់ខ្លួន ទៅលើភ្ញៀវទេសចរប្រហែល ៣៤,០០០ នាក់ និងបុគ្គលិក ដើម្បីធ្វើតេស្តពួកគេរកមេរោគ បន្ទាប់ពីស្រ្តីម្នាក់ត្រូវបានរកឃើញវិជ្ជមានកូវិដ-១៩។
ជាក់ស្តែង ស្ត្រីម្នាក់មកពីទីក្រុង Hangzhou ក្បែរនោះ បានធ្វើដំណើរទៅកាន់ទីក្រុងសៀងហៃ កាលពីចុងសប្តាហ៍មុន ហើយបានធ្វើតេស្តវិជ្ជមានសម្រាប់ COVID-19 ដែលជំរុញឱ្យមានការឆ្លើយតបយ៉ាងម៉ត់ចត់បំផុត ពីសួនកម្សាន្ត។
កាលពីថ្ងៃអាទិត្យ ក្រុមគ្រួពេទ្យជួរមុខក្នុងស្លៀកពាក់ឈុត Hazmat បានចូលសួនកម្សាន្ត ហើយបានធ្វើតេស្តមនុស្សគ្រប់គ្នា មុនពេលអនុញ្ញាតឲ្យពួកគេអាចចាកចេញ ដែលក្នុងនោះរួមទាំងភ្ញៀវ និងបុគ្គលិកផងដែរ។
ការធ្វើតេស្តនេះមានរយៈពេលជាច្រើនម៉ោង បន្ទាប់ពីសួនកម្សាន្តត្រូវបានបិទ ហើយទីបំផុតមនុស្សអាចចាកចេញពីឧទ្យាន នៅពាក់កណ្តាលអធ្រាត្រ។
អ្នកទស្សនាសួនកម្សាន្ត ត្រូវបានអមដំណើរត្រឡប់ទៅផ្ទះវិញ តាមរយៈឡានក្រុងពិសេសចំនួន ២២០ គ្រឿង។ គេក៏មិនបានដឹងថា តើស្ត្រីដែលបានធ្វើតេស្តវិជ្ជមាន បានទៅលេងសួនកម្សាន្ត ឬអត់នោះទេ នេះបើយោងតាម Bloomberg។
កាលពីថ្ងៃចន្ទ អ្នកទស្សនាសួនកម្សាន្ត និងបុគ្គលិកចំនួន ៣៤,០០០ នាក់ បានធ្វើតេស្តអវិជ្ជមានសម្រាប់ COVID-19។ ទោះបីជាយ៉ាងណាក៏ដោយ ពួកគេនៅតែត្រូវបានតម្រូវឱ្យនៅដាច់ដោយឡែកពីគេ រយៈពេល២ថ្ងៃ មុនពេលធ្វើតេស្តឡើងវិញ។ ឧទ្យាននេះនឹងត្រូវបានបិទចាប់ពីថ្ងៃទី១ ដល់ថ្ងៃទី២ ខែវិច្ឆិកា ស្របតាមតម្រូវការរកជំងឺរាតត្បាតរបស់ឧទ្យាន។
យោងតាមគេហទំព័រ Shanghai Disneyland ឧទ្យានរក្សាសិទ្ធិក្នុងការបដិសេធមិនទទួលយកភ្ញៀវ ដែលមានប័ណ្ណចូលទស្សនា នៅថ្ងៃដែលត្រូវបានព្យាករណ៍ថានឹងមានអ្នកចូលទស្សនាដ៏ច្រើន។ នេះគឺអនុលោមតាមគោលការណ៍ណែនាំរបស់រដ្ឋាភិបាលស្តីពីសមត្ថភាពអតិបរមារបស់មេរោគកូវីដ-១៩។
សួនកម្សាន្តបានសរសេរនៅក្នុងសេចក្តីប្រកាសនៅលើគេហទំព័ររបស់ខ្លួនថា “យើងនឹងជូនដំណឹងដល់ភ្ញៀវភ្លាមៗ នៅពេលដែលយើងមានកាលបរិច្ឆេទបញ្ជាក់ដើម្បីបន្តប្រតិបត្តិការ” ។ “យើងសូមអភ័យទោសចំពោះភាពរអាក់រអួល ហើយនឹងផ្តល់ការបង្វិលសង ឬការផ្លាស់ប្តូរសម្រាប់ភ្ញៀវទាំងអស់ ដែលរងផលប៉ះពាល់ក្នុងអំឡុងពេលនេះ”៕ រក្សាសិទ្ធិដោយ៖ លឹម ហុង