តាមអ្នកសង្កេតការណ៍មួយចំនួនលើកឡើងថា ម៉ុងហ្គោលី អាចជាកន្លែងប្រព្រឹត្តទៅជំនួបកំពូលរវាងប្រធានាធិបតីអាមេរិកដូណាល់ ត្រាំ និងមេដឹកនាំកូរ៉េខាងជើងគីម ជុងអ៊ុន។
តាម Daily Mail ម៉ុងហ្គោលីបច្ចុប្បន្ន គឺជាប្រទេសដែលមានចម្ងាយផ្លូវងាយស្រួលសម្រាប់លោកគីម ហើយវាជាតំបន់ដែនដីអព្យាក្រឹតចំពោះមេដឹកនាំប្រទេសទាំងពីរអាមេរិក និងកូរ៉េខាងជើង ។ តាមកាសែត New York Times វាយតម្លៃនោះ មេដឹកនាំកូរ៉េខាងជើងអាចធ្វើដំណើរក្នុងរង្វង់វិជ្ជមាត្រជិត ៣.២២០គីឡូម៉ែត្រប៉ុណ្ណោះ ព្រោះថាយន្តហោះពិសេសរបស់លោកផលិតតាំងពីជំនាន់អតីតសហភាពសូវៀត ហើយពុំអាចហោះបានឆ្ងាយជាងនេះ ព្រោះត្រូវឈប់ដើម្បីបន្ថែមប្រេង ។
យន្តហោះពិសេសរបស់លោក គីម ជុងអ៊ុន ត្រូវបានផលិតតាំងពីសម័យអតីតសហភាពសូវៀត។
យន្តហោះពិសេសនោះគឺជាប្រភេទ IL-62 ដែលគេផលិតហោះហើរបានចម្ងាយត្រឹមតែ ១០.០០០គីឡូម៉ែត្រប៉ុណ្ណោះ ។ យ៉ាងនេះក្តីអ្នកជំនាញការយល់ថា ព្រោះតែផលិតយូរមកហើយ ហេតុនេះតើការហោះហើរចម្ងាយឆ្ងាយវាសុវត្ថិភាពដែរឬទេ?
រូបភាពមួយបានថតលោកគីម នៅក្នុងយន្តហោះពិសេសរបស់ខ្លួន ។
តាមអ្នកស្រាវជ្រាវ Dean Cheng ធ្វើការនៅមជ្ឈមណ្ឌលស្រាវជ្រាវទ្វីបអាស៊ីរបស់អង្គការ Heritage Foundation នោះការរៀបចំជំនួបកំពូលអាមេរិក-កូរ៉េខាងជើង ចុងក្រោយចំណុះទៅលើកង្វល់នៃការធ្វើដំណើររបស់លោកគីម ។ លោកប្រាកដថា កន្លែងនោះពុំមែនជាព្យុងយ៉ាងឬប៉េកាំងទេ ។
ដំណើរទស្សនកិច្ចទៅកាន់ប្រទេសក្រៅដំបូងរបស់លោកគីម គឺតាមរថភ្លើងទៅកាន់ក្រុងប៉េកាំងកាលពីខែមីនាកន្លងមក ។ នៅក្នុងសារមួយលើ Twitter កាលពីខែមីនា អតីតប្រធានាធិបតីម៉ុងហ្គោលី Tsakhiagiin Elbegdorj បានអញ្ជើញលោកត្រាំ និងលោកគីម ទៅកាន់រដ្ឋធានី Ulaanbaatar ។
អ្នកជំនាញការភាគច្រើនជឿថា Ulaanbaatar ដែលជារដ្ឋធានីរបស់ម៉ុងហ្គោលី គឺជាទីតាំងសមស្របបំផុតសម្រាប់ជំនួបកំពូលអាមេរិក-កូរ៉េខាងជើង ៕ សូយន
