កំពង់ស្ពឺ៖ កងកម្លាំងនគរបាលជំនាញខេត្តកំពង់ស្ពឺ បានឃាត់ខ្លួនបុរសម្នាក់ជាម្ចាស់ផ្ទះដែលដុ.តដោយខ្លួនឯង បណ្តាលឲ្យឆាប់ឆេះ ដល់ផ្ទះអ្នកជិតខាង។ ហេតុការណ៍នេះកើតឡើងនៅថ្ងៃទី១០ ខែធ្នូ ឆ្នាំ២០២១ វេលាម៉ោង១១និង០៥នាទី មានអគ្គិភ័យ ឆេះផ្ទះប្រជាពលរដ្ឋចំនួន ២ខ្នង ស្ថិតនៅចំណុចភូមិចំការបុស្ស ឃុំវល្លិសរ ស្រុកសំរោងទង ខេត្តកំពង់ស្ពឺ។
សមត្ថកិច្ច បានឲ្យដឹងថា ផ្ទះដែលត្រូវភ្លើងឆេះនោះទី១ ម្ចាស់ឈ្មោះ ស សុវណ្ណ ភេទប្រុស អាយុ៣៣ឆ្នាំ រស់នៅភូមិឃុំកើតហេតុខាងលើ បណ្តោឲ្យរងការខូចខាត និងឆេះផ្ទះអស់ចំនួន ០១ខ្នងផ្ទះខ្ពស់ធ្វើពីឈើ ដំបូលប្រក់ក្បឿង ទំហំ៦គុណ៨ ជញ្ជាំងក្ដារ ផ្ទះបាយសង្ក័សី ទំហំ ៦គុណ៦ ឆេះអស់ទាំងស្រុង ឆេះ ពូក១ គ្រែ ១ និងសម្ភារមួយចំនួន ។
បន្ទាប់មកបានរៀលឆាបទៅឆេះផ្ទះទី២ ម្ចាស់ឈ្មោះ ស ពៅ ភេទប្រុស អាយុ២៧ឆ្នាំ ប្រពន្ធឈ្មោះ សុខ ស្រីមុំ អាយុ២៧ឆ្នាំ រស់នៅភូមិឃុំកើតខាងលើ បណ្តាលឲ្យការខូចខាត និងឆេះអស់ផ្ទះចំនួន ០១ខ្នង ផ្ទះខ្ពស់ធ្វើពីឈើ ដំបូលប្រក់ក្បឿង ទំហំ ៦គុណ៨ ឆេះអស់ទាំងស្រុង ឆេះ ទូរឈើ១ គ្រែ២ ទូរទឹកកក២ និងសម្ភារមួយចំនួន។ ករណីខាងលើនេះ មិនបណ្ដាលឲ្យគ្រោះថ្នាក់ដល់មនុស្សនិងសត្វឡើយ។ មូលហេតុបណ្ដាលមកពីឈ្មោះ ស សុវណ្ណ ជាម្ចាស់ផ្ទះដុតដោយខ្លួនឯង។
កិច្ចប្រតិបត្តិការ របស់កងកម្លាំងជំនាញខេត្ត និងស្រុកជួយអន្តរាគមន៍ ករណីលើនេះ ដោយប្រើប្រាស់រថយន្ដពន្លត់អគ្គីភ័យចំនួន ០៣គ្រឿង រថយន្ដស្រុកសំរោងទង ០១គ្រឿង និងរថយន្ដខេត្ត ០២គ្រឿង ប្រើប្រាស់ទឹកអស់រថយន្ត ០៤ រថយន្ត ។ ចំពោះជនបង្ករឈ្មោះ ស សុវណ្ណ ត្រូវបានសមត្ថកិច្ចឃាត់ខ្លួនមកសាកសួរកសាងសំណុំរឿងចាត់ការតាមនីតិវិធី ៕ រក្សាសិទ្ធិដោយ ៖ សុទ្ធ លី
