ភ្នំពេញ ៖ ក្រសួងទេសចរណ៍ បានរៀបចំសិក្ខាសាលាជំរុញវិស័យទេសចរណ៍ រយៈពេល៣ថ្ងៃ ក្រោមពាក្យស្លោក «សប្បាយរីករាយគ្មានដែនកំណត់ Endless Joy» ដើម្បីផ្លាស់ប្តូរ ចែករំលែកបទពិសោធន៍ក្នុងការកសាង និងការពង្រឹងសមត្ថភាពសមាជិកក្នុងគណៈកម្មាធិការអភិវឌ្ឍន៍ទេសចរណ៍ខេត្ត និងក្រុមការងារទេសចរណ៍ ដែលមានសមាសភាពមកពីផ្នែកសាធារណៈ ផ្នែកឯកជន និងសហគមន៍ប្រជាពលរដ្ឋ។
សិក្ខាសាលានេះបានធ្វើឡើង នាថ្ងៃទី១៣ ខែធ្នូ ឆ្នាំ២០២១ បានផ្ដោតលើការរៀបចំផែនការទេសចរណ៍ ការការការពារ និងអភិរក្សធនធាន ការថែរក្សាបរិស្ថាន ការផ្សព្វផ្សាយទេសចរណ៍ ហើយគោលដៅចុងក្រោយ គឺការគ្រប់គ្រងគោលដៅទេសចរណ៍ប្រកបដោយចីរភាព ប្រសិទ្ធភាព បរិយាបន្ន និងមានទំនួលខុសត្រូវខ្ពស់។
រយៈពេល៣ថ្ងៃនៃសិក្ខាសាលានេះ នឹងប្រព្រឹត្តទៅជា ៣វគ្គ បន្តបន្ទាប់គ្នា ទៅតាមពេលវេលាកម្មវិធី និងទីតាំងដែលបានគ្រោងទុក ÷
- វគ្គទី១ ធ្វើឡើងនាថ្ងៃទី១៣ ខែធ្នូ ឆ្នាំ២០២១ នៅខេត្តកែបដែលជាគោលដៅទេសចរណ៍សម្រាកលម្ហែប្រណីតកម្រិតខ្ពស់ ក្រោមពាក្យស្លោក «កែបឋានសួគ៌លម្ហែ Kep: Paradise»។
- វគ្គទី២ នឹងរៀបចំនៅសៀមរាប-អង្គរ , និង
- វគ្គទី៣ នៅខេត្តព្រះសីហនុ ជាគោលដៅទីផ្សារទេសចរណ៍គុណភាព ក្រោមពាក្យស្លោក «សប្បាយរីករាយគ្មានដែនកំណត់ Endless Joy»។
សិក្ខាសាលាខាងលើនេះ អញ្ជើញចូលរួមដោយ លោក ទិត ចន្ថា រដ្ឋលេខាធិការប្រចាំការក្រសួងទេសចរណ៍ និងជានាយកគម្រោងទេសចរណ៍ GMS TIIG , ប្រព្រឹត្តទៅក្រោមកិច្ចសហការរបស់ក្រសួងទេសចរណ៍ និងនាយកដ្ឋានទេសចរណ៍នៃសាកលវិទ្យាល័យភូមិន្ទភ្នំពេញ ដោយមានការគាំទ្រពីគម្រោងទេសចរណ៍ គឺគម្រោងអភិវឌ្ឍន៍ទេសចរណ៍សម្រាប់កំណើនប្រកបដោយបរិយាប័ន្នក្នុងមហាអនុតំបន់មេគង្គ ដែលជាគម្រោងហិរញ្ញប្បទាន សម្បទានរបស់ធនាគារអភិវឌ្ឍន៍អាស៊ី (ADB)៕ រក្សាសិទ្ធិដោយ ៖ ពិសិដ្ឋ CEN
