ជឿថា ប្រិយមិត្ត ទស្សនិកជនជាច្រើន បានស្គាល់រួចហើយ ពិធីតារាសម្តែង តារាងបង្ហាញម៉ូដ និងជាពិធីការិនីល្បីឈ្មោះមួួយរូបប្រចាំប៉ុស្ដិ៍បាយ័ន គឺកញ្ញា ហ៊ិន ច័ន្ទនីរ័ត្ន។ តែយ៉ាងណាមិញ បើទោះជាបានចូលប្រឡូកក្នុងវិស័យសិល្បៈអស់រយៈពេលជាច្រើនឆ្នាំ មានកេរ្តិ៍ឈ្មោះបោះសំឡេងខ្លាំង និងនៅតែអាចឈរជើងនៅលើវិថីមួួយនេះបានយូរអង្វែង និងក៏ដូចជាអ្នកជំនួញគ្រឿងសម្អាងជោគជ័យយ៉ាងណា តែតារាស្រីសំឡេងផ្អែមពីរោះសាច់សខ្ចីម៉ដ្ឋរលោង ស្រស់ស្អាតបែបធម្មជាតិរូបនេះ ហាក់មិនបង្ហាញពីជីវិតសប្បាយអ៊ូអរ និងជាពិសេសនោះគឺកម្រឃើញនាងសប្បាយជួបជុំគ្រួសារឲ្យមហាជនបានឃើញដូចតារាដទៃនោះទេ ពោលគឺនាងហាក់ប្រើជីវិតឯករាជ្យតែម្នាក់ឯង។
តែដោយឡែក ថ្មីៗនេះ មហាជនពិតជាមានការភ្ញាក់ផ្អើលយ៉ាងខ្លាំង បន្ទាប់ពីបានឃើញនារីដ៏ស្រស់ស្អាតម្នាក់ បានចេញមកអះអាងថាជាប្អូនស្រីបង្កើតពិធីការិនីរូបនេះ ដោយបានបង្ហោះសារផ្តាំទៅដាក់ឲ្យរាងធ្ងន់ៗ ដោយសារតែនាងមិនព្រមទទួលស្គាល់ម្តាយបង្កើត មកសំងំរស់នៅសោយសុខម្នាក់ឯង ខណៈម្ដាយកាន់តែចាស់ទៅហើយ។
នេះបើតាមគណនីហ្វេសប៊ុកឈ្មោះ Zeii Pov បានបង្ហោះសារទម្លាយចេញរឿងដ៏មិននឹកស្មាននេះឲ្យដឹងថា៖ «ខ្ញុំមិនជឿរថារយះពេលច្រេីនឆ្នាំមកនេះ បងធ្វេីដូចមិនដឹងរឿងអីនោះទេ បងអាចលាក់បាំងភ្នែកមហាជនបានអាចកុហក់អ្នកគាំទ្របងបាន តែបងមិនអាចលាក់បាំងការពិតនឹងប្រវត្តិរបស់ខ្លួនឯងបានមួយជីវិតនោះទេ រឹតតែមិនអាចកុហក់ខ្លួនឯងទៀត. មិនមែនបំពុលចង់ល្បីទេ តែសូមបងបេីកនេត្រាមេីលម្តាយយេីងផង ហេីយគិតមេីលម្តងទៀតថា ម្តាយរបស់យេីងគាត់ចំណាស់ប៉ុន្មានហេីយ… តេីគាត់អាចនៅជាមួយយេីងបានប៉ុន្មានឆ្នាំទៀត?»។
បើតាមប្រភពព័ត៌មានបានឲ្យដឹងថា ពិធីការិនី ហ៊ិន ច័ន្ទនីរ័ត្ន បានឃ្លាតឆ្ងាយពីគ្រួសារទៅរស់នៅជាមួយម្ដាយចិញ្ចឹម តាំងពីនាងនៅវ័យកុមារភាពអាយុ ៣ ឆ្នាំ មកម្ល៉េះ ហើយនាងក៏មិនដែលមានទំនាក់ទំនងជាមួយគ្រួសារទេ។
តែទោះយ៉ាងណា នេះគ្រាន់តែជាចេញមកអះអាងរបស់គណនីខាងលើប៉ុណ្ណោះ ហើយការពិត ឬមិយ៉ាងណា គឺយើងមានតែរង់ចាំមើលពីប្រតិកម្មរបស់កញ្ញា ហ៊ិន ច័ន្ទនីរ័ត្ន ថាតើនាងនឹងធ្វើការបកស្រាយឆ្លើយតបយ៉ាងណា ចំពោះរឿងនេះ៕ រក្សាសិទ្ធិដោយ៖ លឹម ហុង
