ប្រិយមិត្តបានស្គាល់ច្បាស់ហើយ ពីតារាហ្វេសប៊ុកប្រូ សូនី ជាអតីតគូស្នេហ៍អ្នកលក់ឡេដ៏ល្បីឈ្មោះ Love Riya ដែលមហាជនបានគិតថា អ្នកទាំងពីរនឹងក្លាយជាប្តីប្រពន្ធដឹកដៃគ្នាចូលរោងការតាមប្រពៃណីនៅថ្ងៃណាមួយមិនខាន តែទីបំផុត លោក សូនី ត្រូវខ្ទាតចេញពីជីវិតអ្នកមេម៉ាយរូបស្រស់កូន១រូបនេះទាល់តែបាន ព្រោះតែអ្នកទាំងពីររស់នៅមិនចុះសម្រុងគ្នា ពោលគឺឈ្លោះគ្នារាប់ភ្លេច និងចុងក្រោយ ចេញវីដេអូហែកហួរគ្នាឡើងខ្ទេចតែម្តង។
ពិតណាស់ ក្រោយចែកផ្លូវគ្នាពីលោក សូនី មិនបានប៉ុន្មានផង អ្នកលក់ឡេសម្បូរស្នេហ៍រូបនេះ ក៏បានបង្ហាញមុខគូស្នេហ៍ថ្មីជាប៉ូលីសម្នាក់ឈ្មោះ ហេង គីមហៀង ហើយបន្ទាប់ពីមានទំនាក់ទំនងស្គាល់ចិត្តថ្លើមគ្នាបានរយៈពេលប្រមាណជាង១ខែ អ្នកទាំងពីរក៏បានសម្រេចដឹកដៃគ្នាចូលរោងជ័យ កាលពីថ្ងៃទី១៥ ខែធ្នូ ឆ្នាំ២០២១ ថ្មីៗនេះ។
ដោយឡែក អ្វីគួរឲ្យភ្ញាក់ផ្អើលជាខ្លាំងនោះ ស្រាប់តែកាលពីថ្ងៃទី១៦ ខែធ្នូ ឆ្នាំ២០២១ គ្រក៏បានប្រទះឃើញលោក សូនី បានធ្លាក់ខ្លួនមកលក់ស្បែកជើងតាមចិញ្ចឹមផ្លូវ យ៉ាងកំសត់ ខណៈអតីតគូស្នេហ៍អ្នកនាង ឆេង ស្រីរ័ត្ន (Love Riya) នៅពេលនេះប្រៀបដូចព្រះនាង ក្រោយស្គាល់អ្នកថ្មីត្រឹមជាង១ខែប៉ុណ្ណោះ។
ក្រោយពីបានឃើញបែបនេះ អ្នកលេងបណ្តាញសង្គម បានលាន់មាត់អស់សំណើចបែបៗនេះថា៖ បែកពីអូនបងចេះប្រឹងប្រែងជាងមុនឆ្ងាយ, ការងារត្រឹមត្រូវមានអីល្អតើ, បែកពីអូន បងចេះតស៊ូ ពូខេមប្រាប់ចឹង, មានអីខុសគាត់លក់ដូរល្អតើ, មានមនុស្សល្អមិនចេះថែ, ចប់ហើយអាយដលធ្លាក់ខ្លួនលក់ស្បែកជើង, បែកពីអូនបងធ្លាក់ខ្លួនលក់ស្បែកជើង….។
តែទោះយ៉ាងណា បើតាមប្រភពអ្នកដែលស្គាល់បានបញ្ជាក់ឲ្យដឹងថា តាមពិតទៅ គាត់ជិះឡានទំនើបមកឈប់ត្រង់ហ្នឹង ហើយគាត់ក៏ចូលលេងអ្នកលក់ស្បែកជើងតាមផ្លូវ, កុំច្រឡំគាត់មិនមែនអ្នកលក់ទេ, គាត់គ្រាន់តែអង្គុយលេងទេបងប្អូន»៕ រក្សាសិទ្ធិដោយ៖ លឹម ហុង
