មនុស្សម្នាក់បានស្លាប់ និងយ៉ាងហោចណាស់មនុស្សចំនួន៧០នាក់ផ្សេងទៀត កំពុងបាត់ខ្លួននៅឡើយ បន្ទាប់ពីការបាក់ដីនៅអណ្តូងរ៉ែត្បូងដាច់ស្រយាលមួយក្នុងរដ្ឋ Kachin ភាគខាងជើងប្រទេសមីយ៉ាន់ម៉ា។
នេះបើតាមរបាយការណ៍ដែលចេញផ្សាយតិចតួចក្នុងខេត្ត Hpakant ដែលជាមជ្ឈមណ្ឌលឧស្សាហកម្មរុករករ៉ែត្បូងដែលរកចំណូលបានច្រើនបំផុតរបស់ពិភពលោក។ តំបន់រុករករ៉ែនេះ គឺជាតំបន់ដែលមានការប្រយុទ្ធគ្នាជាបន្តបន្ទាប់រវាងកងទ័ពមីយ៉ាន់ម៉ា និងកងកម្លាំងទ័ពព្រៃជនជាតិភាគតិច។
ដោយឡែក មន្ត្រីក្រុមជួយសង្គ្រោះ Gayunar លោក Nyo Chaw ដែលកំពុងសម្របសម្រួលកិច្ចខិតខំប្រឹងប្រែងស្វែងរកជនកំពុងបាត់ខ្លួនបាននិយាយថា អ្នករុករករ៉ែជាង៧០នាក់ដែលកំពុងជីកយកត្បូង ត្រូវបានទឹកហូរចូលទៅក្នុងបឹងមួយមានរយៈពេលជាងពីរទៅបីម៉ោងមុនថ្ងៃរះនៅពេលដែលមានការរអិលបាក់ដី។
លោកបានបន្តថា ដីនិងកាកសំណល់ពីអណ្តូងរ៉ែជាច្រើននៅជុំវិញភូមិ Lonekhin បានរអិលចុះពីច្រាំងថ្មប្រហែល 200ft ហើយបានវាយប្រហារអ្នករុករករ៉ែតែម្តង។ យ៉ាងហោចណាស់ស្ត្រីវ័យក្មេង៥នាក់ និងហាងតូចៗចំនួនបី ក៏ត្រូវបានកប់ក្នុងដីកាលពីថ្ងៃពុធផងដែរ ហើយលោក Nyo Chaw បាននិយាយថា សាកសពកម្មករត្បូងម្នាក់ ត្រូវបានគេជីករកឃើញពីភក់ជ្រៅមួយទាំង
កណ្តាលថ្ងៃ។
អ្នកនាំពាក្យមួយរូបបានបញ្ជាក់ប្រាប់សារព័ត៌មាន Associated Press ថា៖«បុគ្គលិកសង្គ្រោះ និងអ្នកពន្លត់អគ្គីភ័យប្រហែល ១៥០នាក់កំពុងស្វែងរកអ្នកបាត់ខ្លួនក្នុងតំបន់នេះ ហើយយើងបានរកឃើញសាកសពរបស់អ្នកជីករ៉ែត្បូងម្នាក់រហូតមកដល់ពេលនេះ ហើយយើងនៅតែបន្តស្វែងរកអ្នកផ្សេងទៀត»។ Hpakant គឺជាតំបន់ភ្នំ និងដាច់ស្រយាលក្នុងរដ្ឋ Kachin ចម្ងាយ ៦០០ម៉ាយភាគខាងជើងនៃទីក្រុងធំរបស់ប្រទេសមីយ៉ាន់ម៉ា គឺទីក្រុង Yangon ។
ជាក់ស្តែង បទឈប់បាញ់គ្នាក្នុងតំបន់នេះក៏ត្រូវបានរំខានចាប់តាំងពីរដ្ឋប្រហារថ្ងៃទី០១ខែកុម្ភៈ ដែលជាព្រឹត្តិការណ៍ទម្លាក់លោកស្រី Aung San Suu Kyi និងរដ្ឋាភិបាលជាប់ឆ្នោតរបស់លោកស្រី។ មែនទែនទៅ តំបន់រ៉ែនេះ គឺជាជម្រុកត្បូងថ្មដ៏ធំបំផុតក្នុងពិភពលោក ដែលធ្វើឱ្យឧស្សាហកម្មនេះក្លាយជាកន្លែងក្តៅគគុកនៃអំពើពុករលួយ។
ប្រភព៖ The Irish Examiner