អ្នកប្រើប្រាស់បណ្តាញសង្គមជាពិសេសយុវវ័យៗពិតជាមានការភ្ញាក់ផ្អើលជាខ្លាំង ខណៈស្ងាត់ៗ ស្រាប់តែលោកមហាទើស ម៉ៃ សុគន្ធ បានទៅកាន់សាលាដំបូងរាជធានីភ្នំពេញ កាលពីវេលាម៉ោង ១០ ព្រឹកថ្ងៃទី២៤ ខែធ្នូ ឆ្នាំ២០២១ ដើម្បីចូលបំភ្លឺករណីបណ្តឹងរបស់ខ្លួន ទៅលើតារាហ្វេសប៊ុកល្បីឈ្មោះ ចែតា ឬ Alex Conan ដែលត្រូវបានគេដឹងថា កំពុងរស់នៅឯប្រទេសបារាំង បន្ទាប់ពីបុគ្គលរូបនេះ Live វីដេអូ ជេរប្រមាថមើលងាយមើលថោកមកលើខ្លួនហួសកំរិត ទទួលយកបាន។
ទន្ទឹមនោះផងដែរ មហាទេព្វ ឬមហាទើស ម៉ៃ សុគន្ធ ក៏បានបង្ហោះសារប្រាប់ពីករណីប្តឹងបុគ្គលខាងលើ ដោយបញ្ជាក់សង្កត់ធ្ងន់បែបនេះថា៖ «ប្តឹងគឺប្តឹង ខ្ញុំជឿជាក់លើច្បាប់ កុំស្មានថានៅបារាំង ខ្ញុំប្តឹងមិនបាន អាស័យដ្ឋានទំនាក់ទំនងនៅខ្មែរមានតាស គេគ្រប់គ្នាមិនប្តឹង មកពីគេខ្ជិល តែខ្ញុំមិនខ្ជិលទេ ព្រោះវាហួសហេតុ ញុះញង់ បរិហាកេរ្តិ៍ ប្រមាថមើលងាយមើលថោកលើសកំរិត 24/12/2021 មកបំភ្លឺក្នុងនាមដើមបណ្តឹង»។
គួរបញ្ជាក់ថា លោក ម៉ៃ សុគន្ធបានដាក់ពាក្យបណ្តឹងទៅកាន់សាលាដំបូងរាជធានីភ្នំពេញដោយប្តឹងទៅលើបុគ្គលខាងលើដែលគេស្គាល់ច្បាស់ថាជាភេទទី៣ ពីបទជេរប្រមាថជាសាធារណៈ បរិហារកេរ្តិ៍ជាសាធារណៈ និងញុះញង់ឲ្យមានការរើសអើងប្រព្រឹត្តលើបណ្តាញសង្គមហ្វេសប៊ុក និងថែមទាំងទាមទារនូវសំណងជំងឺចិត្តចំនួន២០០លានរៀល ផងដែរ។ នេះបើយោងតាមក្នុងពាក្យបណ្តឹងរបស់លោកដែលត្រូវបានធ្វើឡើងកាលពីថ្ងៃទី៦ ខែធ្នូឆ្នាំ២០២១ កន្លងទៅនេះ។
តែទោះជាយ៉ាងណា មហាជនជាហ្វេនៗ បានស្នើដល់លោកមហាទើសគួរឲ្យអស់សំណើចថា សម្រួលគ្នាទៅ សុទ្ធតែមនុស្សស្រីដូចគ្នាទេ ។ ព្រះពុទ្ធទ្រង់មានពុទ្ធដីការថា ពៀររំងាប់ដោយការមិនចង់ពៀរ មានតែក្តីស្រលាញ់ប៉ុណ្ណោះ ទើបរំសាយគុំនុំបាន៕ រក្សាសិទ្ធិដោយ៖ លឹម ហុង
