ទីផ្សារអាម៉េរិកបន្តឈរលើកំពូលតារាងនៃទិសដៅនាំចេញរបស់កម្ពុជា បើធៀបនឹងទីផ្សារផ្សេងៗទៀតនៅលើពិភពលោកនៅក្នុងរយៈពេល១០ខែឆ្នាំ២០២១នេះ។ នេះបើយោងតាមរបាយការណ៍ប្រចាំឆ្នាំរបស់ក្រសួងពាណិជ្ជកម្មកម្ពុជា ដែលបានចេញផ្សាយកាលពីពេលថ្មីៗនេះ។
![](https://cen.com.kh/wp-content/uploads/2021/12/photo_2021-12-20_08-05-04.jpg)
![](https://cen.com.kh/wp-content/uploads/2021/12/DJI_0137.MP4_20211220_085624.521-1-1024x576.jpg)
ការនាំចេញរបស់កម្ពុជាទៅកាន់ទីផ្សារអាម៉េរិកកាំងនៅក្នុងរយៈពេល១០ខែឆ្នាំ២០២១មានចំនួន ៦ប៊ីលានដុល្លារអាម៉េរិក កើនឡើង ៤០ភាគរយ បើធៀបនឹងរយៈពេលដូចគ្នាកាលពីឆ្នាំ២០២០។ ក្នុងនោះ តាមពីក្រោយដោយទីផ្សារអឺរ៉ុប ដែលមានចំនួន ២,៦១ប៊ីលានដុល្លារអាម៉េរិក, ទីផ្សារចិនមានចំនួន ១,២២ប៊ីលានដុល្លារអាម៉េរិក កើនឡើង៤៩ភាគរយ, ទីផ្សារអាស៊ាន ៩៦០លានដុល្លារអាម៉េរិក ធ្លាក់ចុះ ៧៣ភាគរយ ទីផ្សារជប៉ុនមានចំនួន ៩២០លានដុល្លារអាម៉េរិក កើនឡើង ៥ភាគរយ កាណដា ៧៩០លានដុល្លារអាមេរិក និងចក្រភពអង់គ្លេសមានចំនួន ៦០០លានដុល្លារអាម៉េរិក ធ្លាក់ចុះ ១៥ភាគរយ រួមនឹងទីផ្សារសក្កានុពលផ្សេងៗទៀតនៅលើសកលលោក។
![](https://cen.com.kh/wp-content/uploads/2021/12/photo_2021-12-23_15-08-32-1024x575.jpg)
និយាយជារួម ទំហំពាណិជ្ជកម្ម (ការនាំចេញ និងការនាំចូល) របស់កម្ពុជា ជាមួយបណ្តាប្រទេសនៅលើពិភពលោក មានកំណើន២៨ភាគរយនៅក្នុងរយៈពេល១០ខែឆ្នាំ២០២១នេះ បើធៀបនឹងរយៈពេលដូចគ្នាកាលពីឆ្នាំមុន។ ប៉ុន្តែជញ្ជីងពាណិជ្ជកម្មកម្ពុជានៅតែបង្ហាញពីឱនភាពខ្ពស់ ដោយការនាំចូលខ្ពស់ជាងការនាំចេញ។ ការនាំចេញជារួមរបស់កម្ពុជាមានចំនួន ១៤,២៨ប៊ីលានដុល្លារអាម៉េរិក ធ្លាក់ចុះ ២ភាគរយ និងការនាំចូលមានចំនួនសរុប ២៣ប៊ីលានដុល្លារអាម៉េរិក កើនឡើង៥៨ភាគរយ។
![](https://cen.com.kh/wp-content/uploads/2021/12/vlcsnap-2019-07-24-16h56m25s600-1-1024x576.jpg)
ការនាំចេញផលិតផលពីកម្ពុជារួមមាន៖ សម្លៀកបំពាក់ ៦,៥៣ប៊ីលានដុល្លារអាម៉េរិក, ស្បែកជើង ១,១១ប៊ីលានដុល្លារអាម៉េរិក, សម្ភារៈធ្វើដំណើរ ១,១៧ប៊ីលានដុល្លារអាម៉េរិក, ម៉ាស៊ីនបរិធាន និងសម្ភារៈអគ្គិសនី ៨៥០លានដុល្លារ, កង់ ៥១៤លានដុល្លារ, អង្ករ ៣២៦លានដុល្លារ, គ្រឿងសង្ហារឹមនិងបរិធានបំភ្លឺ ៧៧៦លានដុល្លារ, កៅស៊ូក្រែប ៣២៩លានដុល្លារ, ស្ករអំពៅ ៤២លានដុល្លារ, បន្លែផ្លែឈើ ១៦៧លានដុល្លារ និង មុខទំនិញផ្សេងទៀត មានចំនួន ២,៤៥ប៊ីលានដុល្លារអាម៉េរិក។ នេះបើយោងតាមតួលេខពីក្រសួងពាណិជ្ជកម្មក្នុងរយៈពេល ១០ខែឆ្នាំ២០២១៕