Lucille Watson (អាមេរិក) បង្ហើបប្រាប់ថា មានអាយុរយឆ្នាំ តែសុខភាពនៅមាំមួន គឺដោយសារការរាំរែក បរិភោគបង្អែម ហើយពិសេសគឺពុំមានចំណង “ប្រាំប្រការ” ។
រាប់ពីឆ្វេង Lucille Watson, Carolyn Burton និង Caroline Binns ។
ឆ្លើយតបជាមួយ The Post, Lucille Watson ដែលមានវ័យគម្រប់ ១០០ឆ្នាំ កាលពីថ្ងៃ ២២ ខែមេសា កន្លងមក បានប្រាប់ថា គាត់កើតនៅឆ្នាំ ១៩១៨ ហើយកត្តាសំខាន់បំផុតដែលធ្វើឲ្យគាត់មានអាយុវែង គឺការមិនយកប្តី ។ គាត់ពោលបន្តថា ៖ ខ្ញុំដើរទេសចរ ហើយមានមិត្តប្រុសយ៉ាងច្រើន ។ បែបនេះ ប្រសើរជាងយកប្តី។
នៅមជ្ឈមណ្ឌលថែទាំមនុស្សចាស់ Susan Smith McKinney ជាកន្លែងដែល Lucille កំពុងរស់នៅ មានស្ត្រី ៥នាក់ទៀតដែលមានអាយុលើសពី១សតវត្សរ៍ ។ ក្នុងចំណោមនោះមាន៣នាក់ ពុំដែលរៀបការសោះឡើយ ។
Carolyn Burton អាយុ ១០១ឆ្នាំ រំលឹកប្រាប់ថា គាត់បានបដិសេធការសុំរៀបការ ៥លើក ហើយមូលហេតុគឺ ៖ “ថ្វីត្បិតពួកគេសុទ្ធសឹងជាមនុស្សល្អ ប៉ុន្តែខ្ញុំពុំចូលចិត្តស្ត្រេស” ។ ចំណែក Caroline Binns អាយុ ១០០ឆ្នាំ ដែលអង្គុយក្បែរនោះ ថ្លែងប្រាប់ថា ៖ “ខ្ញុំចង់រស់នៅក្នុងភាពសុខសាន្ត” ។
ក្រៅពីការនៅលីវ Lucille Watson ប្រាប់បន្ថែមថា ៖ គាត់មានអាយុវែងបែបនេះ ដោយសារទម្លាប់និយមរាំរែក ។ គាត់រលាក់ស្មាបណ្តើរពោលបណ្តើរថា មិនសំខាន់ថាប្រភេទតន្ត្រីណាទេ ខ្ញុំតែងតែលោតរាំ រំលាយអារម្មណ៍ចូលទៅក្នុងស្នូរតន្ត្រី ។
បច្ចុប្បន្ននេះ Watson មានសុខភាពមាំមួន ស្មារតីភ្លឺស្វាង ។ អ្នកស្រីក៏មិនតមអាហារអ្វីឡើយ ហើយនិយាយថា នៅរស់គឺត្រូវចេះក្រេបជញ្ជក់រសជាតិជីវិត ! ខ្ញុំតែងបរិភោគនូវអ្វីដែលខ្ញុំចូលចិត្ត !! ៕ ចន្ទ្រា