មេដឹកនាំសាសនាហិណ្ឌូ ដែលមានអ្នកប្រតិបត្តិតាមរាប់លាននាក់ជុំវិញពិភពលោក ត្រូវបានតុលាការក្នុងប្រទេសឥណ្ឌាកាត់ឲ្យជាប់ពន្ធធនាគារអស់មួយជីវិត ពីបទរំលោភក្មេងស្រីអាយុ ១៦ឆ្នាំ។ នេះបើតាមការចេញផ្សាយរបស់ BBC។
មេដឹកនាំសាសនានោះឈ្មោះ Asaram Bapu។ គាត់ត្រូវបានចាប់ខ្លួនកាលពីឆ្នាំ ២០១៣ ពីបទរំលោភក្មេងស្រីម្នាក់ដែលជាអ្នកប្រតិបត្តិតាម នៅអាស្រមរបស់លោក ស្ថិតក្នុងទីក្រុង Jodhpur នៃរដ្ឋ Rajasthan ប្រទេសឥណ្ឌា។
មេដឹកនាំសាសនានេះ ដែលមានវ័យ ៧៧ឆ្នាំ មានអាស្រមចំនួន ៤០០ ជុំវិញពិភពលោក ដែលប្រើសំរាប់បង្រៀនពីការតាំងសមាធិ និងយូហ្គា។
នៅក្នុងទីក្រុង Jodhpur មានការរឹតបន្តឹងសន្តិសុខយ៉ាងខ្លាំង ពីព្រោះមានការព្រួយបារម្ភថា អាចនឹងមានបាតុកម្មហឹង្សាកើតឡើងដែលធ្វើឡើងដោយអ្នកគាំទ្រ មេដឹកនាំសាសនារូបនោះ។
ចំនែកជំនួយការ ២នាក់របស់លោក ក៏ត្រូវតុលាការកាត់ទោសឲ្យជាប់គុកក្នុងម្នាក់ៗ ២០ឆ្នាំផងដែរ ចំនែកជំនួយការ ២នាក់ទៀត ត្រូវតុលាការដោះលែងវិញ។
ការចាប់ខ្លួនមេដឹកនាំសាសនារូបនោះបានកើតឡើង បន្ទាប់ពីមានបណ្តឹងប្រឆាំងរូបលោក ដែលបន្តឹងដោយអ្នកប្រតិបត្តិតាមរូបលោក ចំនួន ២នាក់ ដែលពួកគេចោទថា លោកបានរំលោភបំពានកូនស្រីរបស់ពួកគេ។
ប៉ូលិសបញ្ជាក់ថា មុនពេលកើតហេតុ ប្តីប្រពន្ធទាំងពីរនាក់នោះ បានបញ្ជូនកូនស្រីរបស់ខ្លួនទៅកាន់អាស្រមរបស់លោក Asaram Bapu ដើម្បីរៀនមេរៀនអប់រំផ្លូវចិត្ត ដោយសារតែនាងត្រូវព្រលឹងខ្មោចចូលស្ថិតក្នុងខ្លួន។
ប្តីប្រពន្ធទាំងពីរបាននាំកូនស្រីទៅដល់អាស្រមរបស់មេដឹកនាំសាសនា Asaram Bapu នៅថ្ងៃទី ១៤ ខែសីហា ឆ្នាំ ២០១៣។ នៅយប់បន្ទាប់ មេដឹកនាំសាសនារូបនោះបានហៅក្មេងស្រីរងគ្រោះចូលក្នុង បន្ទប់របស់គាត់ ដើម្បីព្យាបាលនាង។ បន្ទាប់មក គាត់បានចាប់រំលោភក្មេងស្រីនោះ ខណៈពេលដែលឪពុកម្តាយនាងកំពុងចាំនៅខាងក្រៅ។ នេះបើតាមការបញ្ជាក់របស់ប៉ូលីស៕ សុភ័ក្ត្រ