ភ្នំពេញ ៖ រថយន្តបែនដឹកថ្ម បើកបុកម៉ូតូហើយកិនស្ត្រីម្នាក់ដាច់ខ្លួន ស្លាប់ភ្លាមៗ នៅកន្លែងកើតហេតុ នៅម៉ោង១២៖៣០នាទីថ្ងៃទី១ ខែឧសភា ឆ្នាំ២០១៨នេះ នៅចំណុចផ្លូវបែកជាបួន ស្ថិតតាមផ្លូវហាណូយ ភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ។
សមត្ថកិច្ចនគរបាលមូលដ្ឋាន បានបញ្ជាក់ថា ស្ត្រីរងគ្រោះឈ្មោះ អោក កេង អាយុ៦០ឆ្នាំ មានទីលំនៅ ផ្ទះលេខបេ១ ភូមិថ្មគោល១ សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើត ភូមិព្រែកតាទែន ឃុំព្រែកតាទែន ស្រុកពញាឮ ខេត្តកណ្តាល ស្លាប់ភ្លាមៗនៅកន្លែង។ ចំណែករថយន្តបង្កម៉ាក FUSO ពណ៌ខៀវ ពាក់ស្លាកលេខ ភ្នំពេញ3A-1315 បើកបរដោយឈ្មោះ មាឃ វិបុល ភេទប្រុស អាយុ២១ឆ្នាំ មានទីលំនៅបច្ចុប្បន្នភូមិទូករទេះ ឃុំលំហាច ស្រុកអង្គស្នួល ខេត្តកណ្តាល ត្រូវបានឃាត់ខ្លួន ហើយរថយន្តជាកម្មសិទ្ធិរបស់ក្រុមហ៊ុន លាង ម៉ៅ។
នគរបាលមូលដ្ឋាន បានបន្តថា ស្ត្រីរងគ្រោះ បានជួលម៉ូតូឌុបម៉ាកហុងដា សេ១២៥ ស៊េរី២០១៣ ពណ៌ខ្មៅ ពាក់ស្លាកលេខ ភ្នំពេញ1BX-7964 ក្នុងតម្លៃ២ម៉ឺនរៀល ជិះពីព្រែកតាទែន ឆ្ពោះទៅភូមិភូមិថ្មគោល១ សង្កាត់ចោមចៅ២ ដោយធ្វើដំណើរកាត់ តាមបណ្តោយផ្លូវហាណូយ ពីជើងទៅត្បូង។ លុះដល់ចំណុចកើតហេតុ ម៉ូតូបង្អន់ល្បឿន ដោយសារផ្លូវបំបែកជាបួន ស្រាប់តែរថយន្តបង្ក បើកពីជើងទៅត្បូង បុកពីក្រោយម៉ូតូបណ្តាលឲ្យដួលធ្លាក់ជនរងគ្រោះពីលើម៉ូតូ ហើយរថយន្តកិនពីលើជនរងគ្រោះ បណ្តាលឲ្យស្លាប់ភ្លាមៗនៅកន្លែង ចំណែកអ្នកបើកបរម៉ូតូរងរបួសស្រាល៕ ដោយ៖បញ្ញាស័ក្តិ
