ក្រុមសង្គ្រោះថៃ នៅទីបំផុត បានរកឃើញសាកសពតារាសម្តែងស្រី Tangmo Nida ហើយ នាវេលាម៉ោង ១ និង ២០ នាទី ថ្ងៃទី២៦ ខែកុម្ភៈ ឆ្នាំ២០២២ នេះ បន្ទាប់ពីនាងបានធ្លាក់ពីទូកចូលក្នុងទឹកទន្លេ Chao Phraya ក្បែរផែ Phibul Songkhram 1 ក្នុងខេត្ត Nonthaburi បាត់ខ្លួនអស់រយៈពេល២ថ្ងៃមកនេះ។
Dayos Detjob អាយុ ៤៤ ឆ្នាំ ជាបងប្រុសរបស់ Tangmo ដែលបានចូលរួមក្នុងប្រតិបត្តិការស្វែងរក បានបញ្ជាក់ថា សាកសពគឺពិតជាជាប្អូនស្រីរបស់គាត់។ ហើយលោកក៏បានថ្លែងអំណរគុណដល់អ្នកទាំងអស់គ្នា ដែលពាក់ព័ន្ធនិងការងាររបស់ពួកគេ ក្នុងអំឡុងពេលការស្វែងរករយៈពេល ៣៨ ម៉ោង មកនេះ។
ក្រុមអ្នកជួយសង្គ្រោះមកពីមូលនិធិ Ruamkanyu បានរាយការណ៍ថា សាកសពត្រូវបានគេប្រទះឃើញអណ្តែតក្នុងទន្លេ ប្រហែលម៉ោង ១ និង ១០ រសៀលថ្ងៃសៅរ៍នេះ ស្ថិតចម្ងាយប្រហែល១គីឡូម៉ែត្រ ពីកន្លែងដែលនាងបានធ្លាក់ពីទូកលឿន កាលពីយប់ថ្ងៃព្រហស្បតិ៍។ សាកសពត្រូវបានគេដឹកយកទៅកាន់ផែ ទីកន្លែងដែលម្តាយរបស់ Tangmo អ្នកស្រី Panida Sirayootyotin អាយុ ៦៧ ឆ្នាំ កំពុងរង់ចាំ រួមជាមួយមិត្តប្រុស និងមិត្តភ័ក្តិរបស់តារាស្រីរូបនេះ។
ប៉ូលិសបានបិទតំបន់ជុំវិញផែ ដើម្បីផ្តល់ភាពឯកជនដល់គ្រួសារ និងមិត្តភ័ក្តិរបស់សព និងក៏បានហាមក្រុមអ្នកសារព័ត៌មានយ៉ាងច្រើនចូល មុននឹងយកសពទៅធ្វើកោសល្យវិច័យនៅវិទ្យាស្ថាន Central Institute of Forensic Science នៃមន្ទីរពេទ្យ Thammasat University ដើម្បីរកមូលហេតុនៃការស្លាប់។
តារាសម្តែងវ័យ ៣៧ ឆ្នាំរូបនេះ ស្ថិតក្នុងចំណោមមនុស្ស ៦ នាក់ នៅលើទូកល្បឿនលឿន ដែលកំពុងធ្វើដំណើរពីស្ពាន Krung Thon ក្នុងទីក្រុងបាងកក ទៅកាន់ស្ពាន Rama VII ក្នុងខេត្ត Nonthaburi ។ នាងបានធ្លាក់ពីលើទូកនៅម៉ោងប្រហែល១០យប់នៅជិតផែ Pibul Songkhram 1។
សេចក្តីរាយការណ៍ពីប្រព័ន្ធផ្សព្វផ្សាយ បាននិយាយថា Tangmo បានអង្គុយនៅលើខ្នងទូក មុនពេលនាងរអិលចូលទៅក្នុងទន្លេប្រហែលម៉ោង 10 និង40 នាទីយប់។ នាងមិនបានពាក់អាវការពារជីវិតទេ។
ប្រព័ន្ធផ្សព្វផ្សាយថៃ ក៏បានបញ្ជាក់ឲ្យដឹងទៀតថា បង្គន់នៅលើទូកដំណើរការមិនប្រក្រតី ហើយតារាស្រីរូបនេះក៏បានទៅខាងក្រោយទូក ដើម្បីបន្ធូរអារម្មណ៍។ អ្នកគ្រប់គ្រងរបស់នាងបានឃើញការដួលធ្លាក់ទឹក ហើយបានស្រែកឱ្យគេជួយ ប៉ុន្តែ មិនមានអ្នកណាម្នាក់អាចជួយនាងបាននោះទេ។
ក្រុមអ្នកជួយសង្គ្រោះ និងអ្នកមុជទឹក បានមកដល់កន្លែងកើតហេតុ ប្រហែលពាក់កណ្តាលអធ្រាត្រថ្ងៃព្រហស្បតិ៍ ដើម្បីចាប់ផ្តើមការស្វែងរក។ ពួកគេបាននិយាយថា ការស្វែងរកមានការលំបាក ដោយសារចរន្តទឹកខ្លាំង ហើយមានពន្លឺតិចណាស់នៅពេលនោះ៕ រក្សាសិទ្ធិដោយ៖ លឹម ហុង
