ជុំវិញការស្លាប់របស់តារាសម្តែងស្រីលង់ទឹក Tangmo នៅពេលនេះ មហាជនបានបង្វែរអារម្មណ៍មកខឹងសម្បារយ៉ាងខ្លាំងតែម្តង មកលើម្តាយរបស់នាង បន្ទាប់ពីអ្នកស្រី Panida Siriyudthayothin ដែលជាម្តាយបង្កើត បានប្រកាសថា គាត់បានទទួលយកសំណងពីអ្នកដែលពាក់ព័ន្ធទៅនឹងការស្លាប់របស់កូនស្រីរបស់គាត់។
រឿងរ៉ាវបានផ្ទុះកក្រើកជាថ្មី សម្រាប់ប្រជាជនថៃចំនួន ៧០ លាននាក់ បានកើតគឺបន្ទាប់អ្នកស្រី Panida បាននិយាយថា គាត់បានអត់ទោសឱ្យមនុស្ស២នាក់ ដែលរួមដំណើរជាមួយនឹងកូនស្រីរបស់គាត់ នៅពេលដែលនាងបានស្លាប់ ជាថ្នូរនឹងប្រាក់យ៉ាងហោចណាស់ ៣០ លានបាត (ស្មើនឹង ៩២០,០០០ ដុល្លារអាមេរិក)។
ក្រោយពីបានដឹងថា អ្នកស្រី Panida ទទួលសំណងពីគេជិត ១លានដុល្លារ ធ្វើឲ្យតារាចម្រៀង Jennifer Kim បានសរសេរចំៗនៅលើ Instagram ថា៖ «ខ្ញុំជឿជាក់យ៉ាងខ្លាំងថា លុយអាចទិញអ្វីៗគ្រប់យ៉ាងបាន ហើយសព្វថ្ងៃនេះ ខ្ញុំនៅតែជឿដូច្នេះដែរ ព្រោះលុយក៏អាចទិញភាពជាម្តាយរបស់អ្នកណាម្នាក់បែបនេះបាន»។
ចំណែក មេធាវី Sittra Biabungkerd ក៏បានសរសេរបង្ហាញអារម្មណ៍មួយនេះថា៖ «ខ្ញុំមានអារម្មណ៍សោកស្តាយចំពោះ Tangmo។ តើមានអ្នកណាធ្លាប់ស្រឡាញ់នាងដោយស្មោះ ដោយគ្មានប្រយោជន៍ទេ? ទោះបីនាងស្លាប់ក៏នៅមានមនុស្សចង់បានអ្វីមួយ»។
ជាក់ស្តែង សូម្បីតែបងប្រុសបង្កើតរបស់ Tangmo ក៏បានសរសេរពាក្យមួយឃ្លាយ៉ាងខ្លី ចំពោះទង្វើរបស់ម្តាយខ្លួនថា៖ «ខ្ញុំពិតជាខកចិត្តខ្លាំងណាស់»។
សូមបញ្ជាក់ថា អ្នកស្រី Panida បានបង្ហាញខ្លួននៅលើកញ្ចក់ទូរទស្សន៍ប៉ុស្តិ៍លេខ៣ កាលពីថ្ងៃទី៤ ខែមីនា ដោយបាននិយាយថា គាត់បានលើកលែងទោសមនុស្សពីរនាក់ដែលជិះទូកលឿន ហើយបានជាប់រសង្ស័យក្នុងករណីរបស់ Tangmo គឺលោក Danupat “Por” Lerttaweewit និង Paiboon “Robert” Trikanjananun ។
លោក Danupat ជាម្ចាស់ទូក ត្រូវបានចោទប្រកាន់ពីបទប្រតិបត្តិការនាវាគ្មានអាជ្ញាប័ណ្ណ។ ចំណែក Paiboon អ្នកបើកទូក ត្រូវបានចោទប្រកាន់ធ្វេសប្រហែស បណ្តាលឱ្យ Tangmo ធ្លាក់ចូលក្នុងទឹកទន្លេរហូតលង់បាត់បង់ជីវិត។
អ្នកស្រី Panida បាននិយាយថា Danupat បានទូរស័ព្ទទៅគាត់ហើយបានផ្តល់ប្រាក់ចំនួន ៣០ លានបាត។ អ្នកស្រី Pandia បន្ទាប់មក ក៏បាននិយាយថា “Por ជាបុរសគួរសមណាស់! គាត់តែងតែទូរស័ព្ទមកខ្ញុំ យំរាល់ថ្ងៃ ហើយខ្ញុំនឹងទទួលបានសំណងសម្រាប់ការស្លាប់របស់នាង។ គាត់បានប្រាប់ខ្ញុំឱ្យគណនាប្រាក់ចំណូលរបស់ Tangmo ថាប្រសិនបើនាងត្រូវសម្តែងក្នុងរឿងភាគមួយពី 800,000 ទៅ ១ លានបាត ហើយបើនាងនៅរស់បាន ៣០ ឆ្នាំទៀតនោះ នាងប្រហែលជាអាចរកចំណូលបានច្រើនជាងចំនួននេះទៅទៀត»។
តែទោះជាយ៉ាងណា មហាជនមានការមិនពេញចិត្តជាខ្លាំងចំពោះការសម្រេចចិត្តរបស់អ្នកស្រី Panida ឡើយ។ ដោយក្នុងនោះ អ្នកប្រើធ្វីតធើរម្នាក់ឈ្មោះ Pattcodax បានមានមតិលើកឡើងបែបនេះថា៖ «បើខ្ញុំវិញ គិតថាល្ងង់ តើអ្នកណាហ៊ានសង ៣០លានបាត បើគេមិនធ្វើអីខុសនោះ?»។
ចំណែក អ្នកប្រើ Twitter ឈ្មោះ Thaionlyyy បានសរសេរថា “តើអ្នករាល់គ្នាអាចក្រោកឈរនិយាយថា boooooo ទេ។ ម្តាយនាងមានបញ្ហាហិរញ្ញវត្ថុដល់ថ្នាក់ដែលគាត់ត្រូវចូលរួមជាមួយអ្នកដែលទទួលខុសត្រូវចំពោះការស្លាប់របស់កូនស្រីគាត់បែបនេះ?”។
រីឯគណនី Twitter ឈ្មោះ Whitchy7 ក៏បានសម្តែងមតិថា «កូនស្រីមីងឯងស្លាប់ច្រើនថ្ងៃហើយ អត់មានមេធាវីការពារទេ តែមានពេលគិតរឿងលុយដែលមីងឯងរកបានទៅវិញ?»។
ការខកចិត្តរបស់មហាជន បានកើនឡើងនៅក្នុងការរំពឹងទុកថា អាជ្ញាធរនឹងរកវិធីដោះសារម្តងទៀត ចំពោះទង្វើខុសឆ្គងរបស់អ្នកមាន និងអ្នកមានអំណាច ព្រោះថា ប៉ូលីសបាននិយាយពេញមួយសប្តាហ៍ថា ការធ្វើបច្ចុប្បន្នភាពជាសាធារណៈអំពីករណីនេះគឺនឹងមកដល់។ ប៉ុន្តែ រហូតមកដល់រសៀលថ្ងៃសុក្រនេះ ពុំមានការបំភ្លឺណាមួយកើតឡើងទេ ដោយបានត្រឹមពាក្យចោទប្រកាន់ពីបទអសមត្ថភាពប៉ុណ្ណោះ៕ រក្សាសិទ្ធិដោយ៖ លឹម ហុង
