អ៊ុយក្រែនអះអាងថា ឧត្តមសេនីយ៍រុស្ស៊ីពីររូប និងរួមទាំងទាហានជាង ១១.០០០ នាក់ ត្រូវបានសម្លាប់ ចាប់តាំងពីទីក្រុងមូស្គូ បានបើកប្រតិបត្តិការយោធារបស់ខ្លួនកាលពីថ្ងៃទី២៤ ខែកុម្ភៈ។
ទីភ្នាក់ងារព័ត៌មាន Reuters បានរាយការណ៍កាលពីថ្ងៃទី៨ ខែមីនា នេះ ដោយដកស្រង់សម្តីស៊ើបការណ៍យោធាអ៊ុយក្រែនថា កងកម្លាំងអ៊ុយក្រែនបានសម្លាប់ឧត្តមសេនីយ៍រុស្ស៊ីម្នាក់ នៅជិតទីក្រុង Kharkiv ដែលត្រូវបានឡោមព័ទ្ធ។ ក្រុងគៀវនិយាយថា នេះជាមេបញ្ជាការជាន់ខ្ពស់រុស្ស៊ីទីពីរដែលបានស្លាប់ក្នុងសមរភូមិចាប់តាំងពីថ្ងៃទី ២៤ ខែកុម្ភៈ។
ឧត្តមសេនីយរុស្ស៊ីដែលបានរៀបរាប់ខាងលើ ត្រូវបានកំណត់ថាជាឧត្តមសេនីយ Vitaly Gerasimov មេបញ្ជាការរងទីមួយនៃកងកម្លាំងលេខ៤១។ យោងតាមចារកម្មយោធាអ៊ុយក្រែន លោក Gerasimov ត្រូវបានសម្លាប់នៅថ្ងៃទី៧ ខែមីនា។
តែទោះជាយ៉ាងណា Reuters មិនអាចទាក់ទងក្រសួងការពារជាតិរុស្ស៊ី ដើម្បីបញ្ជាក់ព័ត៌មានខាងលើបាននេះទេ។
គួរបញ្ជាក់ថា មុននេះ នៅចុងខែកុម្ភៈ ឧត្តមសេនីយ៍រុស្ស៊ីម្នាក់ទៀត គឺ Andrei Sukhovetsky ត្រូវបានសម្លាប់នៅក្នុងការប្រយុទ្ធនៅអ៊ុយក្រែន។ លោក Sukhovetsky ត្រូវបានដឹងថា គឺជាមេទ័ពដ៏កំពូលម្នាក់របស់រុស្ស៊ី ហើយប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីសប្តាហ៍មុន ក៏បានបញ្ជាក់ពីការស្លាប់របស់លោក Sukhovetsky ផងដែរ។
អ៊ុយក្រែនបានបន្ថែមថា កងកម្លាំងរបស់ខ្លួនបាន “សម្លាប់ទាហានរុស្ស៊ីជាង ១១,០០០ នាក់” ប៉ុន្តែទីក្រុងមូស្គូបានទទួលស្គាល់ការស្លាប់ត្រឹមតែប្រហែល ៥០០ នាក់ប៉ុណ្ណោះ ចាប់តាំងពីប្រតិបត្តិការយោធាបានចាប់ផ្តើម។ ទន្ទឹមនឹងនេះ ជនរងគ្រោះនៅខាង Ukarine មិនត្រូវបានគេរាប់បញ្ចូលទេ។
នៅពេលដែលរុស្ស៊ីបង្កើនការវាយប្រហារលើទីក្រុងសំខាន់ៗជាច្រើនរបស់អ៊ុយក្រែន ទីក្រុងគៀវបានចោទប្រកាន់ទីក្រុងម៉ូស្គូថាបានរារាំងការជម្លៀសជនស៊ីវិលចេញពីតំបន់សង្រ្គាម។ ប្រធានាធិបតីអ៊ុយក្រែន លោក Volodymyr Zelensky បានប្រកាសថា រុស្ស៊ីកំពុងប្រើប្រាស់រថក្រោះ គ្រាប់រ៉ុក្កែត និងគ្រាប់មីន ដើម្បីបញ្ឈប់ប្រជាជនស្លូតត្រង់។
ទីក្រុងអ៊ុយក្រែនដែលត្រូវបានរុស្ស៊ី កំណត់គោលដៅរួមមាន៖ Kharkiv នៅភាគខាងកើត, Sumy នៅភាគឦសាន, ទីក្រុង Gostomel ក្បែររដ្ឋធានី Kiev និង Mykolayiv នៅភាគនិរតី។
នៅថ្ងៃដដែលនេះ (ទី៨ ខែមីនា) រុស្ស៊ីក៏បានប្រកាសថា ខ្លួនកំពុងព្យាយាមជម្លៀសមនុស្សជាង ១៧៣,០០០ នាក់ រួមទាំងកុមារជាង ៤៤,០០០ នាក់ ពីតំបន់សង្រ្គាមនៅ Lugansk និង Donetsk ភាគខាងកើតអ៊ុយក្រែន៕ រក្សាសិទ្ធិដោយ៖ លឹម ហុង
