កាសែត Matichon បានចុះផ្សាយឲ្យដឹងថា អ្នកគាំទ្រមួយចំនួនរបស់តារាសម្ដែង Tangmo Nida ដែលបានលង់ទឹកទន្លេចៅប្រាយ៉ា អំឡុងពេលជិះទូកកម្សាន្តជាមួយមនុស្សប្រុសស្រី៥នាក់ ក្នុងនោះមាននាង Gatik ជាមិត្តសម្លាញ់ កាលពីខែមុន នៅថ្ងៃទី១៣ មីនា ម្សិលមិញបានហែក្បួនទៅកាន់ស្នងការដ្ឋាននគរបាលខេត្ត Nonthaburi ដើម្បីដាក់លិខិតជំរុញឱ្យអ្នកស៊ើបអង្កេត ធ្វើការដោយស្មោះត្រង់ ហើយបន្តធ្វើបាតុកម្មនៅទីនោះ។
នេះជាថ្ងៃទីពីរជាប់គ្នាហើយដែលអ្នកគាំទ្ររបស់ Tangmo Nida បានប្រមូលផ្តុំគ្នា ដើម្បីរកយុត្តិធម៌ជូនតារាស្រីដ៏អភព្វរូបនេះ។
នៅម៉ោង ៩ ព្រឹក តំណាងក្រុមតវ៉ា លោកស្រី Kanyalak Pitichaimongkol បានដាក់លិខិតរបស់ពួកគេនៅប៉ុស្តិ៍នគរបាល ដើម្បីសុំឱ្យប្រព័ន្ធផ្សព្វផ្សាយ និងសាធារណជន អាចពិនិត្យមើលព័ត៌មានបន្ថែម ក្នុងករណីនេះ។
ពួកគេបានសង្កត់ធ្ងន់ថា ពួកគេនឹងមិនមានការរំខាន ឬរំខានដល់ក្រុមប៉ូលិសដែលមានតួនាទីក្នុងការស៊ើបអង្កេតករណីនេះឡើយ។
ពួកគេបានបន្ថែមថា ក្រុមអ្នកគាំទ្រសុទ្ធតែជាគ្រិស្តសាសនិក ដូចតារាស្រី Tangmo ដែលបានស្លាប់ ឬក៏ធ្លាប់ធ្វើការក្នុងវិស័យកម្សាន្តផងដែរ ប៉ុន្តែនៅពីក្រោយឆាក។
អ្នកគាំទ្របានប្រមូលផ្ដុំគ្នានៅទីលានផែ Nonthaburi ជាកន្លែងដែលពួកគេសរសេរសាររបស់ពួកគេនៅលើផ្ទាំងបដាក្រណាត់ និងក្រដាសដូចជា “Tangmo មិនត្រូវស្លាប់ដោយស្រួលៗបែបនេះទេ”, “ទាមទារយុត្តិធម៌” “ផ្ទេរសំណុំរឿងទៅ DSI” និង “ធ្វើការដោយតម្លាភាព” ជាដើម។
លើសពីនេះ ពួកគេក៏បានចងខ្សែបូពណ៌សនៅលើក.ដៃ ដើម្បីជានិមិត្តរូបនៃការទាមទារយុត្តិធម៌។
នៅម៉ោង ១ រសៀល នៅថ្ងៃទី១៣ ខែមីនា មេធាវីល្បីឈ្មោះ៣រូប គឺលោក Sittra Biabangkerd លោក Ronnarong Kaewphet និងលោក Ratchapol Sirisakorn ក៏បានបង្ហាញខ្លួនរបស់ពួកគេ ដើម្បីផ្តល់ការគាំទ្រដល់ក្រុមបាតុករទាំងនោះផងដែរ៕ រក្សាសិទ្ធិដោយ៖ លឹម ហុង
