ភ្នំពេញ ៖ ក្រុមការងារប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ នៃក្រសួងការបរទេស និង សហប្រតិបត្តិការអន្តរជាតិ (កបទ.សអ) បានរៀបចំសិក្ខាសាលាតាមប្រព័ន្ធវីដេអូ ដើម្បីផ្សព្វផ្សាយ «ច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ» ក្រោមអធិបតីភាពរបស់ ឯកឧត្តម លុយ ដាវីត រដ្ឋលេខាធិការ ក្រសួងកបទ.សអ ដោយមានការចូលរួមពីតំណាងអង្គការ មិនមែនរដ្ឋាភិបាលបរទេសនៅកម្ពុជា និងតំណាងមកពីក្រសួងមហាផ្ទៃ ព្រមទាំងអ្នកសារព័ត៌មាន សរុបចំនួន ១៧៨នាក់។
សិក្ខាសាលាតាមប្រព័ន្ធវីដេអូនេះ បានធ្វើឡើងកាលពីថ្ងៃទី១៥ ខែមីនា ឆ្នាំ២០២២ នៅទីស្តីការក្រសួងការបរទេស និងសហប្រតិបត្តិការអន្តរជាតិ។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី១៦ ខែមីនា បានឲ្យដឹងថា សិក្ខាសាលានេះ ត្រូវបានរៀបចំឡើងស្របតាមការប្តេជ្ញាចិត្ត និងការខិតខំប្រឹងប្រែងរបស់កម្ពុជាដើម្បីបំពេញ កាតព្វកិច្ចរបស់ខ្លួនក្នុងការអនុវត្តសេចក្តីសម្រេចចិត្ត របស់ក្រុមប្រឹក្សាសន្តិសុខ អ.ស.ប ពាក់ព័ន្ធនឹងការប្រឆាំងហិរញ្ញប្បទាន ដល់ការរីកសាយភាយអាវុធមហាប្រល័យ ហើយការអនុវត្តកាតព្វកិច្ចនេះ ក៏ឆ្លើយតបទៅនឹងស្តង់ដាររបស់ក្រុមការងារហិរញ្ញវត្ថុ (Financial Action Task Force – FATF) ផងដែរ។
សិក្ខាសាលាបានផ្សព្វផ្សាយច្បាប់ ស្តីពីការប្រឆាំងហិរញ្ញប្បទាន ដល់ការរីកសាយភាយអាវុធមហាប្រល័យ ដើម្បីពង្រឹងការយល់ដឹងអំពីខ្លឹមសារ និងក្របខ័ណ្ឌគតិយុត្តិ នៃច្បាប់នេះដល់បុគ្គលរាយការណ៌ ដែលជាអង្គការមិនមែនរដ្ឋាភិបាលបរទេសនៅកម្ពុជា និងជំរុញឱ្យពួកគេអនុវត្តកាតព្វកិច្ចរបស់ខ្លួនឱ្យបានខ្ជាប់ខ្ជួន ក្នុងន័យចូលរួមជាមួយរាជរដ្ឋាភិបាលកម្ពុជា និងសហគមន៍អន្តរជាតិ អនុវត្តវិធានការបង្ការ ទប់ស្កាត់ បង្រ្កាប និងលុបបំបាត់ហិរញ្ញប្បទានដល់ការរីកសាយភាយអាវុធមហាប្រល័យ។ សិក្ខាកាមបានពិភាក្សានិងផ្លាស់ប្តូរមតិ ដោយផ្តោតលើនីតិវិធីរបស់កម្ពុជា ជាពិសេសបុគ្គលរាយការណ៍ ក្នុងការអនុវត្តតាមសេចក្តីសម្រេចចិត្តរបស់ក្រុមប្រឹក្សាសន្តិសុខអ.ស.ប។
នៅចុងបញ្ចប់នៃសិក្ខាសាលា សិក្ខាកាមត្រូវបានលើកទឹកចិត្តឱ្យជួយផ្សព្វផ្សាយបន្ត ឱ្យកាន់តែទូលំទូលាយដល់សហការី និងសាធារណជន ដើម្បីធានាការអនុវត្តប្រកបដោយប្រសិទ្ធភាពនូវការងារនេះ៕ រក្សាសិទ្ធិដោយ ៖ ចេស្តារ
