ហាណូយ — វៀតណាមមានបំណងចង់ក្លាយជាមជ្ឈមណ្ឌលកែច្នៃផលិតផលកំពូលទាំង ១០ របស់ពិភពលោកនៅឆ្នាំ ២០៣០។ ទោះជាយ៉ាងណាក៏ដោយ អ្នកជំនាញនិយាយថា ប្រសិនបើដំណោះស្រាយ និងគោលនយោបាយរបស់រដ្ឋាភិបាល មិនត្រូវបានអនុវត្តស្របគ្នានោះ គោលដៅនេះនឹងមានបញ្ហាប្រឈម។
យោងតាមនាយកដ្ឋានកែច្នៃផលិតផលកសិកម្ម និងទីផ្សារនៃក្រសួងកសិកម្ម និងអភិវឌ្ឍន៍ជនបទ (MARD) បានឱ្យដឹងថា បច្ចុប្បន្នមានសហគ្រាសកែច្នៃកសិ-រុក្ខាប្រមាញ់-នេសាទតាមខ្នាតឧស្សាហកម្មចំនួន ៧.៥០០ ដែលត្រូវបានផ្សារភ្ជាប់ជាមួយនឹងការនាំចេញ និងសហគ្រាសកែច្នៃតាមផ្ទះរាប់ពាន់កន្លែងនៅទូទាំងប្រទេស។
តាមការប៉ាន់ស្មានថា ក្នុងមួយឆ្នាំវៀតណាមមានសមត្ថភាពកែច្នៃ រក្សាទុក ផលិតផលកសិកម្ម រុក្ខាប្រមាញ់ និងជលផលប្រមាណ ១២០ លានតោន។ ក្នុងនោះជាង ៩៥ ភាគរយធ្វើនៅក្នុងសហគ្រាសកែច្នៃខ្នាតតូច និងមធ្យម។
នាយកដ្ឋានបាននិយាយថា ទោះបីជាឧស្សាហកម្មកែច្នៃផលិតផលកសិកម្មរបស់វៀតណាមមានការរីកចម្រើនគួរឱ្យកត់សម្គាល់ក៏ដោយ អត្រាកំណើនតម្លៃបន្ថែមគឺប្រហែល ៥-៧ភាគរយក្នុងមួយឆ្នាំ ហើយបច្ចេកវិទ្យាកែច្នៃគឺជាតំណភ្ជាប់ខ្សោយបំផុតនៅក្នុងខ្សែសង្វាក់តម្លៃនៃផលិតផលកសិកម្ម។
តំណាងអាជីវកម្មកែច្នៃផ្លែបឺរនៅ Lâm Đồng បាននិយាយថា សហគ្រាសរបស់គាត់មិនមានបច្ចេកវិទ្យាត្រឹមត្រូវដើម្បីកែច្នៃផលិតផលគុណភាពខ្ពស់ពីផ្លែបឺរនោះទេ។ គាត់បាននិយាយថាគាត់បានវិនិយោគលើគ្រឿងម៉ាស៊ីនសម្រាប់កែច្នៃប្រេងសំខាន់ៗពីផ្លែឈើ ប៉ុន្តែគុណភាពមិនដូចការរំពឹងទុកនោះទេ។ ក្នុងមួយឆ្នាំៗ វៀតណាមអាចនាំចេញបន្លែចំនួន ១២០ លានតោន និងផ្លែឈើ ១២ លានតោន ដែលភាគច្រើនជាផលិតផលស្រស់។ ផលិតផលកែច្នៃមានត្រឹមតែ ៨-១០ ភាគរយ ឬតិចជាង ១០ លានតោនក្នុងមួយឆ្នាំ។
លោក Pham Minh Sơn នាយកក្រុមហ៊ុន New Greenway នៅខេត្ត Hải Dương បានប្រាប់ប្រព័ន្ធផ្សព្វផ្សាយក្នុងស្រុកថា “ផលិតផលកសិកម្ម និងបន្លែស្រស់ក្នុងប្រទេសវៀតណាម មានពេលរក្សាទុកខ្លីត្រឹមតែ ៣ ទៅ ៥ ថ្ងៃប៉ុណ្ណោះ ខណៈដែលប្រទេសផ្សេងទៀតអាចរក្សាទុកបានចន្លោះពី ៥ ទៅ ១០ ថ្ងៃ៕