ក្រចេះ ៖ ជារៀងរាល់យប់រថយន្តដឹកជញ្ជូនឈើ ឆ្លងកាត់ស្រុកស្នួល ខេត្តក្រចេះយ៉ាងអនាធិបតេយ្យ រីឯមន្ត្រីជំនាញរដ្ឋបាលព្រៃឈើ ប្រចាំនៅតំបន់នោះ ឆ្លើយថា មិនមានបទល្មើសនោះទេ។
ប្រភពព័ត៌មានបានឲ្យដឹងថា រថយន្តដឹកឈើតាមផ្លូវជាតិ ពីខេត្តមណ្ឌលគិរី ពីក្រចេះស្នួលយ៉ាងគគ្រឹកគគ្រេង ទៅលក់នៅប្រទេសវៀតណាម នឹងឆ្លងកាត់ចូលខេត្តត្បូងឃ្មុំ ដោយមិនមានសមត្ថកិច្ចណា ចុះបង្ក្រាបឡើយ។
រឿងដែលហួសចិត្តនោះគឺលោក ផូង ឃុនឡាយ នាយសង្កាត់រដ្ឋបាលព្រៃឈើស្នួល អះអាងប្រាប់អ្នកសារព័ត៌មានថា គ្មានទេ បទល្មើសព្រៃឈើ នៅស្រុកស្នួល ។ លោក ថា បើមានៗតែឡានដឹក ២ បីកន្ទុយប៉ុណ្ណោះ។
ទោះបីជាលោកនាយសង្កាត់រដ្ឋបាលព្រៃឈើស្រុកស្នួល ខេត្តក្រចេះ បានអះអាងបែបនេះក្តី គេនៅតែឃើញការដឹកជញ្ជូនឈើ ពេលយប់មិនមានការថមថយឡើយ ស្ងាត់តែមួយយប់ពីរយប់ប៉ុណ្ណោះ។ ការដឹកជញ្ជូនឈើឆ្លងកាត់ស្រុកស្នួល បានក្លាយជារឿងធម្មតា ដោយមិនមានការទប់ស្កាត់ទាល់តែសោះ។
ករណីខាងលើនេះទំនងជាសមត្ថកិច្ចពាក់ព័ន្ធ នៅតំបន់នោះ ទទួលផលប្រយោជន៍ ទើបមិនមានការបង្ក្រាបពីរថយន្តដឹកឈើ៕ រក្សាសិទ្ធិដោយ ៖ សុទ្ធ លី
