កណ្ដាលៈ បុរសម្នាក់ជិះម៉ូតូសណ្ដោងរ៉ឺម៉កដឹកទឹកដើម្បីយកទៅលក់ ដោយល្បឿនលឿនឈប់មិនទាន់ជាន់ហ្វ្រាំងមិនជាប់ ជ្រុលទៅបុកជាមួយរថយន្ដមួយគ្រឿងពេញមួយទំហឹង បណ្ដាលឲ្យរថយន្ដកិនស្លាប់ភ្លាមៗនៅកន្លែងកើតហេតុ កាលពីវេលាម៉ោង១៤ ថ្ងៃសៅរ៍ ទី១២ ខែឧសភា ឆ្នាំ២០១៨ លើផ្លូវបេតុងកាត់ផ្លូវលំបំបែកជាបួន ស្ថិតក្នុងភូមិព្រៃទទឹង ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល ។
មន្ដ្រីនគរបាលចរាចរណ៍ស្រុកកណ្ដាលស្ទឹងបានឲ្យដឹងថា ជនរងគ្រោះស្លាប់ឈ្មោះ ឆាង ប៊ុនរ៉ាត់ អាយុ១២ឆ្នាំ មានទីលំនៅភូមិព្រៃទទឹង ឃុំព្រះនិព្វាន ស្រុកគងពិសី ខេត្តកំពង់ស្ពឺ ជិះម៉ូតូមួយគ្រឿងប្រភេទសណ្ដោងរ៉ឺម៉កម៉ាកស៊ុយហ្ស៊ូគីស្មាស់ ធុនសេ១១០ ពណ៌ខ្មៅ ពាក់ស្លាកលេខ កំពង់ធំ1B-1329 ។ ចំណែកឯរថយន្ដម៉ាកនីសសាន់ ធុនធំ ប្រភេទបែនដឹកដី ពណ៌ត្រីអ៊ី ពាក់ស្លាកលេខ ខេមរភូមិ 3-3927 បើកបរដោយជនមិនស្គាល់អត្ដសញ្ញាណ រត់គេចខ្លួនក្រោយពេលកើតហេតុ ។ជនរងគ្រោះជិះម៉ូតូ ធ្វើដំណើរក្នុងទិសដៅពីកើតទៅលិច លើកំណាត់ផ្លូវបេតុងនិងធ្វើដំណើរដោយល្បឿនលឿន ដោយដឹកទឹកដើម្បីយកទៅលក់ លុះជិះមកដល់ចំណុចកើតហេតុ ត្រង់ចំណុចផ្លូវបំបែកជាបួន ម៉ូតូជនរងគ្រោះក៏ឈប់មិនទាន់ជាន់ហ្វ្រាំងមិនជាប់បានជ្រុលទៅបុកជាមួយរថយន្ដមួយគ្រឿងដែលបើកក្នុងទិសដៅពីត្បូងទៅជើងពេញមួយទំហឹង បណ្ដាលឲ្យម៉ូតូជនរងគ្រោះក្រឡាប់ត្រូវរថយន្ដកិនស្លាប់តែម្ដង ។ ចំណែកអ្នកបើកបររថយន្ដ បានទុករថយន្ដរបស់ខ្លួនចោល រួចរត់គេចខ្លួនបាត់៕ ដោយ ៖ បញ្ញាស័ក្តិ
