នេះជារឿងមួយដ៏គួរឲ្យសោកស្តាយជំនួស និងហួសចិត្តណាស់ នៅពេលដែលផ្លូវរត់ប្រណាំងនៅសល់តែ ៥០ ម៉ែត្រទៀតប៉ុណ្ណោះ អត្តពលិកវៀតណាមម្នាក់ ស្រាប់តែត្រូវបានគូប្រកួតរបស់នាង មករុញច្រានបណ្តាលឱ្យដួល ធ្វើឲ្យនាងមិនអាចបញ្ចប់ការប្រកួតបាន យំសោកស្តាយយ៉ាងខ្លាំង។
ស្ថានភាពនេះបានកើតឡើងនៅក្នុងការប្រកួតចុងក្រោយនៃវិញ្ញាសា៨០០ម៉ែត្រផ្នែកនារី នៅរសៀលថ្ងៃទី១៦ ឧសភា។ អត្តពលិកវៀតណាមមានអត្តពលិកចំនួន ២ នាក់ ចូលរួមក្នុងការប្រណាំងនេះ រួមមានអ្នកការពារជើងឯក Dinh Thi Bich (លេខ 839) និង Khuat Phuong Anh (លេខ 838)។
នៅដំណាក់កាលរត់ចម្ងាយប្រហែល ៥០ ម៉ែត្រទៅដល់ទីបញ្ចប់ Dinh Thi Bich និងអត្តពលិកផ្សេងទៀតបានចាប់ផ្តើមធ្វើការបង្កើនល្បឿន។ រំពេចនោះ អត្តពលិកម៉ាឡេស៊ី (លេខ ៣២៦) បានឆ្លងកាត់យ៉ាងលឿនរវាង Bich និងអត្តពលិកម្នាក់ទៀត។ ទោះបីជាយ៉ាងណាក៏ដោយ អត្តពលិកម៉ាឡេស៊ីរូបនេះ បានធ្វើទង្វើមិនល្អ ដោយបានយកដៃឆ្វេងរបស់ខ្លួនគ្រវៀស «ច្រាន» ទៅលើការិនី Dinh Thi Bich បណ្តាលឲ្យដួលមិនអាចក្រោកឡើងដើម្បីបញ្ចប់ការប្រកួតបានគួរឲ្យអាណិត។
ជាលទ្ធផល នៃហេតុការណ៍នេះ Bich បានទទួលចំណាត់ថ្នាក់លេខ៣ ហើយទំនងជាឈ្នះមេដាយមួយ។ តែយ៉ាងណាមិញ ការលេងមិនល្អរបស់គូប្រកួតបានធ្វើឲ្យនាងបាត់បង់មេដាយជាអកុសលសម្រាប់ក្រុមកីឡាវៀតណាម។ អ្នកឈ្នះមេដាយមាសដំបូងគេ គឺអត្តពលិកវៀតណាមម្នាក់ទៀតគឺ Khuat Phuong Anh។ ចំណែកអត្តពលិក២រូបមកពីប្រទេសឥណ្ឌូណេស៊ី និងម៉ាឡេស៊ីបានមេដាយប្រាក់ និងសំរឹទ្ធរៀងខ្លួន។
ការដួលខ្លាំង បណ្ដាលឱ្យជើង Bich រងរបួសធ្ងន់ធ្ងរ គ្រូពេទ្យត្រូវប្រញាប់ចូលទីលានបន្ទាន់។ គេបានដឹងថា នាងត្រូវបានបញ្ជូនទៅកាន់មន្ទីរពេទ្យភ្លាមៗ ដើម្បីឱ្យគ្រូពេទ្យពិនិត្យស្ថានភាពរបួសយ៉ាងយកចិត្តទុកដាក់។
Dinh Thi Bich មានអាយុ ២២ ឆ្នាំ បានចូលរួម SEA Games 2019 នៅប្រទេសហ្វីលីពីនជាលើកដំបូង ប៉ុន្តែបានបង្កើតការភ្ញាក់ផ្អើលយ៉ាងខ្លាំង នៅពេលដែលនាងឈ្នះមេដាយមាសលើវិញ្ញាសា 800 ម៉ែត្រផ្នែកនារី។ បើប្រៀបធៀបទៅនឹងមិត្តរួមក្រុមផ្សេងទៀត Bich ត្រូវបានចាត់ទុកថាជាអ្នកមានទេពកោសល្យផ្នែកកីឡាវៀតណាម។
នៅស៊ីហ្គេមលើកទី៣១ ដែលវៀតណាមធ្វើជាម្ចាស់ផ្ទះ Dinh Thi Bich ត្រូវបានចាត់ទុកថាជាក្តីសង្ឃឹមមាសមួយរបស់អត្តពលិកវៀតណាម។ តែទោះជាយ៉ាងណា ការលេងដ៏អាក្រក់របស់គូប្រកួតម៉ាឡេស៊ី បានធ្វើឱ្យ Bich បាត់បង់ឱកាសក្នុងការទទួលបានមេដាយ នៅក្នុងការចូលរួមប្រកួតជាប់ៗគ្នាលើកទី២នេះ៕ រក្សាសិទ្ធិដោយ៖ លឹម ហុង
