ប្រិយមិត្តជាច្រើន បានទទួលជ្រាបហើយ ពីដំណឹងដ៏សោកសៅបំផុត ដែលតារាចម្រៀងកញ្ញា សុវត្ថិឌី ធារិកា បានជួបទុក្ខជាទម្ងន់ស្ទើរតែមិនអាចទទួលយកបាន ព្រោះតែក្នុងមួយប៉ព្រិចភ្នែកសោះ នាងត្រូវបាត់បង់ឪពុកម្តាយជាទីស្រលាញ់ ដែលពួកគាត់បានបាត់បង់ជីវិត នៅក្នុងហេតុការណ៍គ្រោះថ្នាក់ចរាចរណ៍ក្រឡាប់រថយន្តចូលប្រឡាយទឹក ស្ថិតក្នុងស្រុកឆែប ខេត្តព្រះវិហារ កាលពីរសៀលថ្ងៃទី១៧ ខែឧសភា ឆ្នាំ២០២២។
ពិតណាស់ ក្រោយពីបានទទួលដំណឹងនេះ ឃើញថាបានធ្វើឲ្យមហាជន និងក៏ដូចមិត្តភ័ក្តិក្នុងរង្វង់សិល្បៈ សម្តែងនូវអារម្មណ៍តក់ស្លុតយ៉ាងខ្លាំង ដែលមិនគួរសោះណា ប្អូនស្រី ធារិកា ត្រូវបាត់បង់អ្នកមានគុណទាំងពីរ ក្នុងពេលតែមួយនៅក្នុងគ្រោះថ្នាក់បែបនេះសោះឡើយ។
ជាមួយទុក្ខដ៏ក្រៀមក្រំបំផុតនេះផងដែរ តារាសម្តែងកញ្ញា ដួង ម៉ានិច ក៏បានចូលរួមរំលែកទុក្ខ និងចូលបុណ្យសពឪពុកម្តាយប្អូនស្រី ធារិកា ថវិកាចំនួន 500$ ដែលកញ្ញាបានបញ្ជាក់ថា នេះជាលុយចំណេញបានមកពីការលក់ផលិតផល…។
ប៉ុន្តែ អ្វីដែលមិននឹកស្មានដល់នោះ គឺក្រោយ ដួង ម៉ានិច ប្រកាសចូលបុណ្យសព 500$ បានមកពីការចំណេញលក់ផលិត ក៏ស្រាប់តែមានមនុស្សមួយចំនួនតូច បានយកទៅគិតក្នុងផ្លូវអវិជ្ជមានបែបនេះថា យកសពដាក់មុខ ព្រោះចង់ល្បីលក់ផលិតផល… រីឯអ្នកខ្លះទៀតថា «ធ្វើបុណ្យទាល់បានលុយចំណេញទើបធ្វើកើតមែន ព្រួញមួយបាញ់បានសត្វពីរ លក់ក៍អស់ បុណ្យក៍បានធ្វើ»។
តែទោះជាយ៉ាងណា មនុស្សជាច្រើនមិនគាំទ្រនូវគំនិតអវិជ្ជមាននេះទេ ដោយបានដាក់ឲ្យទៅវិញថា៖ «ពួកទើស ទើសឥតល្ហែ មើលគេក្នុងផ្លូវល្អខ្លះផង, មិនបានជួយទេសូមមេត្តាកុំគិតគេក្នុងផ្លូវអាក្រក់អី, ក្នុងខ្លួនគិតតែអំពេីរអាក្រក់បានចូលចិត្តគិតគេអាក្រក់ដែរ?, គាត់មានសន្ធាចូលបុណ្យចង់ចូលប៉ុន្មានជារឿងគាត់ បេីមិនបានចូលបុណ្យ ឬជួយ អីទេកុំបំពុល, គេល្បីស្រាប់ហើយគេមិនចាំឆ្លៀត ឱកាសល្បីរឿងនេះទេ គេធ្វើល្អ បានល្អហើយ,…»៕ រក្សាសិទ្ធិដោយ៖ លឹម ហុង
