ក្រោយត្រូវមហាជនរិះគន់យ៉ាងចាស់ដៃ ចំពោះទង្វើអររំភើបខ្លាំងពេក រហូតដល់ថ្នាក់មើល «រំលង» ទឹកចិត្តឪពុកដែលខំរត់លាដៃទៅឱបកូន ដើម្បីអបអរសាទរ តែបែរជាកូនស្រីទៅស្រវ៉ាឱបពិធីការិនីទៅវិញ នៅពេលនេះ សម៉ីខ្លួនបេក្ខនារីមានស្រុកកំណើតនៅខេត្តព្រៃវែង កញ្ញា ស្រ៊ាង ស្រីនិច បានទទួលស្គាល់នូវកំហុសឆ្គងមួយនេះ និងបានបង្ហោះសារសុំទោសទៅដល់បងប្អូនមហាជនជាសាធារណៈ។
បេក្ខនារីវ័យ ២០ ឆ្នាំ រូបនេះ បានធ្វើការសុំទោស និងបកស្រាយចំពោះកំហុសឆ្គងខាងលើនេះ ថា៖ «សូមជម្រាបសួរពុកម៉ែបងប្អូន នាងខ្ញុំ ស្រ៊ាង ស្រីនិច ដែលជាបេក្ខនារីប្រឡងចម្រៀង Cambodian Idol រដូវកាលទី4នេះ ថ្ងៃនេះដែរ នាងខ្ញុំចង់មកសុំទោសជាសាធារណៈ នូវអាកប្បកិរិយាឆ្គាំឆ្គងទៅលើឪពុករបស់នាងខ្ញុំកាលពីវគ្គ Judge Audition នាងខ្ញុំពិតជាគ្មានចេតនា និងមិនបានតាំងចិត្តថា នឹងធ្វើបែបនេះ ហើយក៏មិនចង់បង្កើតអោយមានរឿងខុសឆ្គងបែបនេះទេ ព្រោះតែនាងខ្ញុំត្រេតអរខ្លាំងពេក មិនបានមើលគ្រប់ជ្រុងជ្រោយ នាងខ្ញុំពិតជាសុំទោសពិតមែន សង្ឃឹមថាពុកម៉ែបងប្អូននឹងយោគយល់ និងអភ័យទោសដល់រូបនាងខ្ញុំ។ នាងខ្ញុំក៏សូមអរគុណចំពោះពាក្យលើកទឹកចិត្តដល់រូបនាងខ្ញុំ។ សូមអរគុណ»។
បើទោះជា ស្រីនិច បានលើកហេតុផលយ៉ាងណា តែមតិជាច្រើន ហាក់មិនអាចទទួលយកពាក្យសុំទោសនេះសោះ ដោយម្នាក់ៗបានបញ្ចេញមតិផ្សេងៗគ្នាថា៖ «ខ្ញុំសុំបញ្ចេញយោបល់តិចចុះ ពាក្យថា<មិនបានមើលគ្រប់ជ្រុងជ្រោយ> ឪពុកខំរត់ទៅមុខគេហើយ ហេតុអ្វីមើលមិនឃើញ បែរមើលឃើញអ្នកខាងក្រោយវិញចុះ? សូមមើលទឹកមុខគាត់ឡើងវិញ ពេលដែលឃើញកូនរត់ទៅអោបគេមុនខ្លួនឯងជាឪពុកវិញ, កុំសុំទោសសាធារណៈអី សុំទោសគាត់(ពុក)វិញល្អជាង, គាត់ខ្លាចអត់បានធ្វើជាតារា ចឹងហើយរត់ទៅអោបតារាមុនទៅ តែគាត់បិទភ្នែកអត់មើលឪខ្លួនឯង, ឈប់រិះ.គន់គាត់ទៀតទៅវគ្គក្រោយធ្លាក់ហើយ, គ្រាន់តែជាប់ទៅវគ្គបន្តប្អូនប៉ុណ្ណឹង ចុះបើលើកពានទៀតមិនឡាបល់យហើយទេអី!,…»៕ រក្សាសិទ្ធិដោយ៖ លឹម ហុង
