ថ្មីៗនេះ អ្នកលេងបណ្តាញសង្គមក្នុងប្រទេសថៃ ពិតមានការភ្ញាក់ផ្អើល ស្រឡាំងកាំងជាខ្លាំង ក្រោយពីបានឃើញទំព័រហ្វេសប៊ុកផ្លូវរបស់តារាស្រី តែងម៉ូ នីដា ដាក់ឈ្មោះថា Happy melonmo nida Patcharaweeraphong បានទម្លាយចេញរូបភាព និងវីដេអូជាច្រើនដ៏មិននឹកស្មាន ដែលរូបភាពនិងវីដេអូ គឺសុទ្ធសឹងបានកើតឡើងនៅក្នុងថ្ងៃនាងស្លាប់តែម្តង និងត្រៀមបញ្ចេញភស្តុតាងដែលគ្មានអ្នកណាធ្លាប់ឃើញពីមុនធ្វើឱ្យមនុស្សជាច្រើនឆ្ងល់ថា តើមានអ្វីកើតឡើង។
ជាក់ស្តែង ទំព័រហ្វេសប៊ុកថ្មីនេះ នៅថ្ងៃទី២២ ខែឧសភា ឆ្នាំ២០២២ បានបង្ហោះរូបភាព និងឃ្លីបភស្តុតាងជាបន្តបន្ទាប់ ដោយក្នុងនោះ បានបញ្ចេញឃ្លីប Tangmo អង្គុយនៅក្បាលទូក។ ហើយខណៈពេលនោះ ឃើញថាសក់របស់នាងរសាយផើយផាត់ ដោយសារខ្យល់ និងរលកបក់បោកទូកខ្លាំងនិងបានភ្ជាប់សាររៀបរាប់យ៉ាងចាក់ដោតថា «សូម្បីអង្គុយជិះទូកក៏រលកបោកបក់ចង់ធ្លាក់ទៅហើយ ចុះទម្រាំទៅអង្គុយបត់ជើងតូចខាងក្រោយទូក តើអាចទៅរួចទេ? មែនទេ មិត្តសម្លាញ់ទាំងអស់គ្នា!»។
ជាមួយវីដេអូខាងលើនេះផងដែរ បងប្រុសរបស់នាងលោក Toi Daiyot ក៏បានលើកឡើងថា «ខ្យល់ខ្លាំង រលកខ្លាំង និងស្ថិតក្នុងសម្លៀកបំពាក់បែបនេះ បើតាមគំនិតខ្ញុំ នោះរឿងដែលពួកគេបង្ខូចបង្កាច់ថា មកពីប្អូនស្រីខ្ញុំទៅបត់ជើងតូចខាងក្រោយទូក គឺខ្ញុំមិនជឿតាំងពីថ្ងៃដំបូងម្ល៉េះ»៕ រក្សាសិទ្ធិដោយ៖ លឹម ហុង
