បេក្ខជនកម្មវិធីប្រឡងចម្រៀង Cambodian Idol រដូវកាលទី៤ វគ្គ Judge Audition សប្តាហ៍ទី៤ (យប់ថ្ងៃទី២៩ ខែឧសភា) លោក ទុំ សុវត្ថិ បានធ្វើឱ្យមហាជនសម្តែងក្តីអាណិត និងផ្ទុះការរិះគន់ឡើងកក្រើក ព្រោះតែគណៈកម្មការពីររូប បានវិនិច្ឆ័យកាត់សេចក្តីឲ្យ «No» ដែលធ្វើឱ្យលោកមិនអាចជាប់ឈានទៅវគ្គបន្ទាប់ទៀតបាន។
តែយ៉ាងណាមិញ ស្របពេលដែលមហាជន ផ្ទុះការរិះគន់សឹងមួយប្រទេស ជាពិសេសសំដៅទៅលើតារាចម្រៀងលោក ឆន សុវណ្ណរាជ ដែលមហាជនលើកឡើងថា កាត់សេចក្តីស្រេចតែមាត់នឹកឃើញ គ្មានសមត្ថភាពក្នុងការវាយតម្លៃទៅលើទឹកដមសំឡេង ព្រោះថា អ្នកច្រៀងពិរោះឲ្យធ្លាក់ រីឯអ្នកមុខស្អាតបែរឲ្យជាប់នោះ គេក៏ស្រាប់តែឃើញឧកញ៉ា សិរីមន្តបានប្រកាសផ្ដល់ថវិកាលើកទឹកចិត្តបេក្ខជន ទុំ សុវត្ថិ ចំនួន ១,០០០ ដុល្លារ។
ឧកញ៉ា សិរីមន្ត បានបង្ហោះនៅលើទំព័រហ្វេសប៊ុករបស់ខ្លួន ដោយបានលើកឡើងយ៉ាងដូច្នេះថា៖ «កុំបាក់ទឹកចិត្តអីប្អូនស៊ូៗបងសូមលើកទឹកចិត្តប្អូននៅថវិការ1000$ មានសមត្ថភាពពិតតស៊ូគង់បានសំរេច មានបងប្អូនណាស្គាល់លេខគាត់អត់ជួយប្រាប់ផង»។
ដោយឡែក តារាចម្រៀងសំឡេងផ្អែមស្រទន់ លោក ខាន់ ជេមស៍ វិញក៏បានលើកទឹកចិត្តដល់បេក្ខជន ទុំ សុវត្ថិ ផងដែរថា៖ «មិនអីទេប្អូនប្រុសកុំបាក់ទឹកចិត្ត ទោះបីជាប្អូនធ្លាក់តែប្អូនបានឈ្នះចិត្តមហាជនទូទាំងប្រទេស បងសូមលើកទឹកចិត្តប្អូន បងនឹងផលិតបទចម្រៀង original song ជូនប្អូនមួយបទ និងចេញ MV ជូនប្អូនមានបងប្អូន សូមទំនាក់ទំនងមកបងនេះជា លេខ telegram 010222168 បង»៕ រក្សាសិទ្ធិដោយ៖ លឹម ហុង
